ବରଗଡ଼,୨୪।୫(ପ୍ରେମାନନ୍ଦ ଖମାରୀ): ବରଗଡ଼ ଜିଲା ଭଟଲି ଥାନା ଅନ୍ତର୍ଗତ କୁଶନପୁରୀ ଗ୍ରାମର ଦନାର୍ଦ୍ଦନ ମେହେର(୬୫)ଙ୍କ ଘରେ ଶୁକ୍ରବାର ବିଳମ୍ବିତ ରାତିରେ ହୋଇଥିବା ସୁନା ଗହଣା ଚୋରି ଘଟଣାର ପର୍ଦ୍ଦାଫାଶ ହୋଇଛି। ପୋଲିସ ୨୪ଘଣ୍ଟା ମଧ୍ୟରେ ଏଥିରେ ସମ୍ପୃକ୍ତ ୪ଅଭିଯୁକ୍ତଙ୍କୁ ଗିରଫ କରିବା ସହିତ ଚୋରି ସାମଗ୍ରୀକୁ ଉଦ୍ଧାର କରିବାରେ ସକ୍ଷମ ହୋଇଛି ।
ଗିରଫ ଅଭିଯୁକ୍ତମାନେ ହେଲେ, ଭଟଲି ଥାନା କୁଶନପୁରୀ ଗ୍ରାମର ଗୋବିନ୍ଦ ଡନସନା(୨୭), ସାହିଲ୍ ରାଜ ମହମ୍ମଦ(୨୬), କୁଶନପୁରୀ ତଳିପଡ଼ାର ଗୁରୁଦେବ ପଟେଲ(୨୩) ଏବଂ କୁଶନପୁରୀ ସହରାପଡ଼ାର ବନମାଳୀ ବିଶ୍ୱାଳ(୧୯)। ସେମାନଙ୍କ ପାଖରୁ ଗୋଟିଏ ସୁନାହାର, ଗୋଟିଏ ସୁନା କାନଫୁଲ ଏବଂ ୨ଟି ଶାଢ଼ି ଜବତ ହୋଇଛି । ଗିରଫ ଅଭିଯୁକ୍ତମାନଙ୍କୁ ରବିବାର କୋର୍ଟଚାଲାଣ କରାଯାଇଛି। ଜାମିନ ନାମଞ୍ଜୁର ହେବା ଯୋଗୁ ସେମାନଙ୍କୁ ଜିଲା କାରାଗାରକୁ ପଠାଇ ଦିଆଯାଇଛି। ଏ ନେଇ ଭଟଲି ଥାନାରେ ଏକ ମାମଲା(ନଂ-139/26) ରୁଜୁ ହୋଇଛି।
ସୂଚନା ଅନୁଯାୟୀ, ଶୁକ୍ରବାର ରାତିରେ କୁସନପୁରୀ ଗ୍ରାମର ଦନାର୍ଦ୍ଦନ ମେହେରଙ୍କ ପରିବାର ଲୋକେ ଶୋଇଥିବାବେଳେ ଅଭିଯୁକ୍ତମାନେ ତାଙ୍କ ଘର ଭିତରକୁ ପଶିଥିଲେ । ଘରେ ରହିଥିବା ଆଲମିରା ଭାଙ୍ଗି ସେଥିରେ ରହିଥିବା ସୁନା ଗହଣା, ଶାଢ଼ି, ନଗଦ ଟଙ୍କା ଚୋରି କରି ନେଇଥିଲେ। ଏ ନେଇ ଦନାର୍ଦ୍ଦନ ଶନିବାର ଭଟଲି ଥାନାରେ ଏତଲା ଦେଇଥିଲେ। ତାଙ୍କ ଏତଲାକୁ ଭିତ୍ତି କରି ପୋଲିସ ଉପରୋକ୍ତ ମାମଲା ରୁଜୁ କରିବା ସହିତ ଅନୁସନ୍ଧାନୀ କୁକୁର ସହାୟତାରେ ତଦନ୍ତ ଅାରମ୍ଭ କରିଥିଲା ଏବଂ ଅଭିଯୁକ୍ତଙ୍କୁ ଧରିବାରେ ସକ୍ଷମ ହୋଇଥିଲା। ଗିରଫ ହୋଇଥିବା ଅଭିଯୁକ୍ତ ଗୋବିନ୍ଦ ଡନସନାଙ୍କ ବିରୋଧରେ ପୂର୍ବରୁ ଭଟଲି ଥାନାରେ ୩ଟି ମାମଲା ରହିଥିବା ପୋଲିସ ସୂଚନା ଦେଇଛି।
