ରସୁଲପୁର,୨୫ା୫(ରଞ୍ଜିତ ରାଉତ): ରସୁଲପୁର ବ୍ଲକ ଅଞ୍ଚଳର ବିଭିନ୍ନ ସ୍ଥାନରେ ବେଆଇନ ଇଟାଭାଟି ଜଳୁଛି। ବାୟୁମଣ୍ଡଳ ତାପମାତ୍ରା ୪୨ଂ ଉପରେ ରହୁଥିବାବେଳେ ଅସାଧୁ ଇଟା ବ୍ୟବସାୟୀ ବେଧଡ଼କ ଇଟାଭାଟିରେ ନିଆଁ ଲଗାଇ ଜନଜୀବନକୁ ଅସ୍ତବ୍ୟସ୍ତ କରିପକାଉଛନ୍ତି। ମାତ୍ର ଏଥିପ୍ରତି ତହସିଲ ପ୍ରଶାସନର ନିଘା ରହୁନାହିଁ। ଏପରି କି ଯାଜପୁର ଜିଲାପାଳ ଅମ୍ବର କୁମାର କର ବେଆଇନ ଇଟାଭାଟିକୁ ବନ୍ଦ କରିବାକୁ ଦେଇଥିବା ନିର୍ଦ୍ଦେଶକୁ ଅଣଦେଖା କରାଯାଉଛି। ଉକ୍ତ ବ୍ଲକ୍ ଅନ୍ତର୍ଗତ ଭୋଟକା ପଞ୍ଚାୟତରେ ବେଆଇନ ଇଟାଭାଟି ବନ୍ଦ ପାଇଁ ଜିଲାପାଳଙ୍କ ନିକଟରେ ହୋଇଥିବା ଅଭିଯୋଗରୁ ଏହାସ୍ପଷ୍ଟ ହୋଇଛି। ଭୋଟକା ଗ୍ରାମର ଜଣେ ବ୍ୟକ୍ତି ଛିଣ୍ଡା ଖରସ୍ରୋତା ନଦୀପଠାରେ ଇଟାଭାଟି ଜାଳୁଛନ୍ତି ବୋଲି ଗ୍ରାମବାସୀଙ୍କ ପକ୍ଷରୁ ଯାଜପୁର ଜିଲାପାଳଙ୍କ ମିଳିତ ଜନ ଅଭିଯୋଗ ଶୁଣାଣି ପ୍ରକୋଷ୍ଠରେ ଅଭିଯୋଗ କରାଯାଇଛି।
୧୮ା୦୩ା୨୦୨୬ରେ ଅଭିଯୋଗ ପଞ୍ଜୀକୃତ ହୋଇଛି। ଉକ୍ତ ଅଭିଯୋଗ ଆଧାରରେ ଜିଲାପାଳ ରସୁଲପୁର ତହସିଲଦାରଙ୍କୁ ବେଆଇନ ଇଟାଭାଟି ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି। ଏହାରି ଭିତରେ ସପ୍ତାହ ବିତିବାକୁ ବସିଲାଣି, ହେଲେ ତହସିଲ ପ୍ରଶାସନ ପକ୍ଷରୁ ଇଟାଭାଟି ମାଲିକଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ। ପ୍ରଶାସନର ଢିଲାପଣ ଯୋଗୁ ଇଟାଭାଟି ମାଲିକ ଦୁଇଦିନ ତଳେ ଆଉ ଏକ ନୂଆ ଇଟାଭାଟିରେ ନିଆଁ ଲଗାଇଛନ୍ତି ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ତେବେ ବେଆଇନ ଇଟାଭାଟି ବନ୍ଦ ଦିଗରେ ଜିଲା ପ୍ରଶାସନ ତ୍ୱରିତ ପଦକ୍ଷେପ ଗ୍ରହଣ ନ କଲେ ଗ୍ରାମବାସୀ ମାନବାଧିକାର କମିଶନଙ୍କ ଦ୍ୱରାସ୍ଥ ହେବେ ବୋଲି ଚେତାବନୀ ଦେଇଛନ୍ତି।
ଇଟାଭାଟି ଚତୁଃପାର୍ଶ୍ୱରେ ଜନବସତି, ବ୍ୟବସାୟିକ ପ୍ରତିଷ୍ଠାନ, ସ୍କୁଲ, ମନ୍ଦିର, ପଞ୍ଚାୟତ କାର୍ଯ୍ୟାଳୟ, ଅଙ୍ଗନୱାଡି କେନ୍ଦ୍ର ଆଦି ରହିଛି। ପ୍ରଚଣ୍ଡ ରୌଦ୍ରତାପ ଓ ଗରମ ଗୁଳୁଗୁଳିରେ ଜନଜୀବନ ଅସ୍ତବ୍ୟସ୍ତ ହୋଇପଡୁଥିବା ବେଳେ ଇଟାଭାଟିର ଧୂଆଁ ଓ ଉତ୍ତାପରେ ଲୋକେ ଅସ୍ତବ୍ୟସ୍ତ ହୋଇପଡିଲେଣି। ମାତ୍ର ବାୟୁମଣ୍ଡଳର ତାପମାତ୍ରାକୁ ବହୁଗୁଣିତ କରୁଥିବା ଜଳନ୍ତା ଇଟାଭାଟିକୁ ବନ୍ଦ କରିବାକୁ ପ୍ରଶାସନ ପଛଘୁଞ୍ଚା ଦେବା ଘଟଣା ତହସିଲ ପ୍ରଶାସନର ଭୂମିକାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି।
ଏନେଇ ମଧୁବନ ରାଜସ୍ବ ସର୍କଲର ରାଜସ୍ବ ନିରୀକ୍ଷକ ଲକ୍ଷ୍ମୀପ୍ରିୟା ପାତ୍ରଙ୍କୁ ପଚାରିବାରୁ ସେ କହିଛନ୍ତି, ଜିଲାପାଳଙ୍କ ପ୍ରକୋଷ୍ଠରେ ହୋଇଥିବା ଅଭିଯୋଗ ଆଧାରରେ ସେ ଘଟଣାସ୍ଥଳକୁ ଯାଇ ଇଟାଭାଟିରେ ନିଆଁ ଲଗାଇବା ବନ୍ଦ କରିବାକୁ ମାଲିକଙ୍କୁ ନିର୍ଦ୍ଦେଶ ଦେଇଥିଲେ। ମାତ୍ର ମାଲିକ ତାଙ୍କ କଥା ନ ଶୁଣି ଇଟାଭାଟିରେ ନିଆଁ ଲଗାଇଥିଲେ ବୋଲି ସେ ଜାଣିବାକୁ ପାଇଥିଲେ। ଏହାପରେ ରାଜସ୍ବ ନିରୀକ୍ଷକ ତହସିଲଦାରଙ୍କୁ ୩ଦିନ ହେଲା ଲିଖିତ ଭାବରେ ରିପୋର୍ଟ କରିଛନ୍ତି। ହେଲେ ତାଙ୍କ ରିପୋର୍ଟ ଆଧାରରେ ତହସିଲଦାରଙ୍କ ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ। ଏ ସମ୍ପର୍କରେ ରସୁଲପୁର ତହସିଲଦାର ସିଦ୍ଧାର୍ଥ କୁମାର ବେହେରାଙ୍କୁ ପଚାରିବାରୁ ସେ କହିଛନ୍ତି, ବେଆଇନ ଇଟାଭାଟି ବନ୍ଦ ପାଇଁ ଇଟା ବ୍ୟବସାୟୀଙ୍କୁ ନିର୍ଦ୍ଦେଶ ଦିଆଯାଉଛି। ହେଲେ ସେମାନେ ପ୍ରଶାସନ କଥା ମାନୁନାହାନ୍ତି। ରାଜସ୍ବ ନିରୀକ୍ଷକଙ୍କଠାରୁ ରିପୋର୍ଟ ତଲବ କରାଯାଇଛି। ରିପୋର୍ଟ ଆଧାରରେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏବେ ଦେଖିବାକୁ ଅପେକ୍ଷା କେବେ ଏହା ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି।
