ବ୍ରହ୍ମପୁର ଅଫିସ,୧୬।୬: ଗଞ୍ଜାମ ଜିଲା ବୈଦ୍ୟନାଥପୁର ଥାନା ଅଧୀନ ରାମନଗର ତୃତୀୟ ଲାଇନରେ ରହୁଥିବା ଜଣେ ବ୍ୟକ୍ତିଙ୍କ ଘରୁ ୩ ବସ୍ତା ପିତଳ ଓ କଂସା ବାସନ ଚୋରି ହୋଇଛି। ଏନେଇ ବୈଦ୍ୟନାଥପୁର ଥାନାରେ ଏକ ଅଭିଯୋଗ ହୋଇଛି। ଅଭିଯୋଗକୁ ଭିତ୍ତି କରି ପୋଲିସ ମାମଲା(ନଂ.୧୯୦/୨୨) ରୁଜୁ କରି ଘଟଣାର ତଦନ୍ତ ଚଳାଇଛି।
ଅଭିଯୋଗ ମୁତାବକ, ରାମନଗର ତୃତୀୟ ଲାଇନରେ ରହୁଥିବା କାନ୍ତା ମିଶ୍ରଙ୍କ ଝିଅ ବାହାଘର ଥିବା ବେଳେ ଘରର ରଙ୍ଗ କାମ ଆରମ୍ଭ କରିଥିଲେ। ଏନେଇ ସେ ଆଙ୍କୁଲି ବୃନ୍ଦାବନନଗର ଅଞ୍ଚଳର ୨ଜଣ ଯୁବକଙ୍କୁ ନିୟୋଜିତ କରିଥିଲେ। ଏହି ୨ ଯୁବକ ସମ୍ପୃକ୍ତ ଘରେ ପ୍ରତ୍ୟେକ ଦିନ ରଙ୍ଗ କରିବାକୁ ଆସି କାନ୍ତାଙ୍କଠାରୁ ଚାବି ନେଇ କାମ ସରିବା ପରେ ପୁଣି ଥରେ ଚାବି ଫେରାଇ ଦେଉଥିଲେ। ହେଲେ ୧୦ ଦିନ ହେଲା ଏହି ଦୁଇ ଯୁବକ ଆଉ ରଙ୍ଗ କରିବାକୁ ଆସୁନାହାନ୍ତି। ଏଣୁ ଉକ୍ତ ଘରର ବଳକା କାମ ପାଇଁ ସେ ଅନ୍ୟ ଶ୍ରମିକଙ୍କୁ ଲଗାଇ ଶେଷ କରିଥିଲେ। ତେବେ ଉକ୍ତ ଘରେ ଝିଅ ବାହାଘର ପାଇଁ ୩ଟି ବସ୍ତାରେ ରଖାଯାଇଥିବା ପିତଳ, କଂସା, ଷ୍ଟିଲ ଆଦି ବିଭିନ୍ନ ବାସନ ସାମଗ୍ରୀ ନ ଥିବା କାନ୍ତା ଜାଣିବାକୁ ପାଇଥିଲେ। ବହୁ ଖୋଜାଖୋଜି ପରି ବସ୍ତାଗୁଡ଼ିକ ନ ମିଳିବାରୁ ପୂର୍ବରୁ ରଙ୍ଗ କାମ କରିବାକୁ ଆସୁଥିବା ଦୁଇ ଯୁବକଙ୍କୁ ସନ୍ଦେହ କରି ସେ ବୈଦ୍ୟନାଥପୁର ଥାନାରେ ଅଭିଯୋଗ କରିଛନ୍ତି। ପୋଲିସ ଘଟଣାର ତଦନ୍ତ ଚଳାଇଛି।
