ବ୍ରହ୍ମପୁର ଅଫିସ,୧୪।୪: ବ୍ରହ୍ମପୁର ବଡ ମେଡିକାଲ ରକ୍ତ ଭଣ୍ଡାରରେ ଜଣେ କର୍ମଚାରୀ ନିଶାସକ୍ତ ଅବସ୍ଥାରେ କାର୍ଯ୍ୟ କରୁଥିବା ନେଇ ସାମାଜିକ ଗଣମାଧ୍ୟମରେ ଭିଡିଓ ଭାଇରଲ ହୋଇଥିଲା। କର୍ମଚାରୀ ଜଣଙ୍କ ନିଶାସକ୍ତ ଅବସ୍ଥାରେ ବିଭିନ୍ନ ଦାୟିତ୍ୱ ତୁଲାଉଥିବାରୁ ଶହଶହ ରୋଗୀଙ୍କ ଜୀବନ ପ୍ରତି ମଧ୍ୟ ବିପଦ ସୃଷ୍ଟି ହେଉଛି। ଏହି କର୍ମଚାରୀ ଜଣଙ୍କ ଲେବ୍ରୋରେଟୋରୀ ଟେକ୍ନିସିଆନ ଭାବେ ରକ୍ତଭଣ୍ଡାରରେ କାମ କରୁଛନ୍ତି। ବୁଧବାର ସେ ରକ୍ତଭଣ୍ଡାର ଭିତରେ ଥିବା ଏକ କୋଠରୀରେ ଜଣେ ସେବିକାଙ୍କ ନିକଟରେ ବସିଥିବା ବେଳେ କିଛି ଜଣ ତାଙ୍କ ହାବଭାବ ଦେଖି ସେ ନିଶାସକ୍ତ ଥିବା ଜାଣିପାରିଥିଲେ। ଏ ନେଇ ସେଠାରେ ଥିବା କେତେକ ରୋଗୀ ସମ୍ପର୍କୀୟ ଉକ୍ତ କର୍ମଚାରୀଙ୍କୁ ପଚାରିିବାରେ ସେ ହଠାତ ଉତ୍ତ୍ୟକ୍ତ ହୋଇପଡ଼ିଥିଲେ। ମୁଁ କୌଣସି ଭୂଲ କରିନାହିଁ ବୋଲି ଓଲଟା ପ୍ରଶ୍ନ କରିଥିଲେ। ଏହାପରେ ସେ ସେହି ସ୍ଥାନରୁ ଉଠି ବାହାରକୁ ଚାଲିଯାଇଥିଲେ।
ଏନେଇ ମେଡିକାଲ ଅଧୀକ୍ଷକ ପ୍ରଫେସର ଡା. ସନ୍ତୋଷ କୁମାର ମିଶ୍ର କହିଛନ୍ତି, ସମ୍ପୃକ୍ତ କର୍ମଚାରୀ ଜଣଙ୍କ ରକ୍ତଭଣ୍ଡାରରେ ଠିକାରେ ଲେବୋରେଟୋରୀ ଟେକ୍ନିସିଆନ ଭାବେ କାମ କରୁଛନ୍ତି। ୬ ମାସ ତଳେ ସମ୍ପୃକ୍ତ କର୍ମଚାରୀ ଜଣଙ୍କ ରକ୍ତଭଣ୍ଡାରରେ ଏଭଳି କାରନାମା କରିଥିବାରୁ ଏମକେସିଜି କର୍ତ୍ତୃପକ୍ଷ ତାଙ୍କୁ କିଛି ଦିନ ପାଇଁ ନିଲମ୍ବିତ କରିଥିଲେ। ସେ ସୁଧୁରିଯିବେ ବୋଲି ପ୍ରତିଶ୍ରୁତି ଦେବା ପରେ ତାଙ୍କୁ ପୁଣି କାର୍ଯ୍ୟ କରିବାକୁ ଅନୁମତି ଦିଆଯାଇଥିଲା। ହେଲେ ବର୍ତ୍ତମାନ ପୁଣିଥରେ ସେ ନିଶାସକ୍ତ ହୋଇ କାର୍ଯ୍ୟ କରୁଥିବା ଏକ ଭିଡିଓ ଭାଇରାଲ ହୋଇଥିବା ଦେଖିବାକୁ ମିଳିଛି। ଏନେଇ ରକ୍ତଭଣ୍ଡାର ଅଧିକାରୀଙ୍କୁ ଘଟଣାର ତଦନ୍ତ କରି ଏକ ରିପୋର୍ଟ ଦେବାକୁ ସେ ନିର୍ଦ୍ଦେଶ ଦେଇଛନ୍ତି। ସମ୍ପୃକ୍ତ କର୍ମଚାରୀ ଜଣଙ୍କ ବିରୋଧରେ ରିପୋର୍ଟ ମିଳିବା ପରେ ତାଙ୍କୁ କାର୍ଯ୍ୟରୁ ନିଲମ୍ବନ କରାଯିବ ବୋଲି ଅଧୀକ୍ଷକ ମିଶ୍ର ସୂଚନା ଦେଇଛନ୍ତି।
