ବ୍ରହ୍ମପୁର ଅଫିସ,୧୦ା୩: ବ୍ରହ୍ମପୁର ଉନ୍ନୟନ କର୍ତ୍ତୃପକ୍ଷ (ବିଡିଏ) ଓ ବ୍ରହ୍ମପୁର ମହାନଗର ନିଗମ (ବିଏମ୍ସି) ପକ୍ଷରୁ ସହର ବିଭିନ୍ନ ୱାର୍ଡରେ ଥିବା ଖାଲି ସ୍ଥାନ ଗୁଡିକରେ ଶିଶୁ ଉଦ୍ୟାନ ନିର୍ମାଣ କରାଯାଇଛି। ତେବେ ବ୍ରହ୍ମପୁର ଉନ୍ନୟନ କର୍ତ୍ତୃପକ୍ଷଙ୍କ ପକ୍ଷରୁ ଶିଶୁ ଉଦ୍ୟାନଗୁଡିକର ପୁନରୁଦ୍ଧାର ଓ ମରାମତି କାର୍ଯ୍ୟ ବର୍ତ୍ତମାନ ନିର୍ବାଚନ ଆଚରଣ ବିଧି ଯୋଗୁ ବନ୍ଦ ରହିଛି। ତେବେ ବିଭିନ୍ନ ୱାର୍ଡରେ ଥିବା ଶିଶୁ ଉଦ୍ୟାନକୁ ନେଇ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି। ବ୍ରହ୍ମପୁର ମହାନଗର ନିଗମ ୪୦ ନଂ. ୱାର୍ଡ ଅନ୍ତର୍ଗତ ଆଙ୍କୁଲି ମୌଜାରେ ଥିବା ଲକ୍ଷ୍ମୀ ନାରାୟଣ ନଗରଠାରେ ବିଡିଏ ପକ୍ଷରୁ ନିର୍ମିତ ଶିଶୁ ଉଦ୍ୟାନକୁ ନେଇ ଅସନ୍ତୋଷ ପ୍ରକାଶ ପାଇଛି। ସ୍ଥାନୀୟ ବାସିନ୍ଦାଙ୍କ କହିବା ମୁତାବକ, ଏହି ପାର୍କଟି ଶ୍ମଶାନ ନିକଟରେ ରହିଛି। ଫଳରେ ପାର୍କ ନିର୍ମାଣ ହେବା ପରଠାରୁ ଛୋଟ ଶିଶୁ କିମ୍ବା ବୟୋଜ୍ୟେଷ୍ଠ ଯିବା ପାଇଁ ଇଚ୍ଛା କରୁନାହାନ୍ତି। ପାର୍କଟି ବ୍ୟବହୃତ ନ ହେବାରୁ ପାର୍କ ମଧ୍ୟରେ ଅନାବନା ଘାସ ଉଠି ରହିଥିଲା। ଫଳରେ ବିଡିଏ କର୍ତ୍ତୃପକ୍ଷଙ୍କ ପକ୍ଷରୁ ଗତ କିଛି ଦିନ ତଳେ କାର୍ଯ୍ୟ ଜାରି ରହିଥିଲା। ବର୍ତ୍ତମାନ ପାର୍କ ମଧ୍ୟରେ ନୂତନ ଭାବେ ଭଲିବଲ ପିଚ୍ ନିର୍ମାଣ କରାଯାଇଛି। ଏଥିସହ ପାର୍କ ପରିସରକୁ ସଫା ସୁତରା ମଧ୍ୟ କରାଯାଇଛି। କିନ୍ତୁ ବର୍ତ୍ତମାନ କାର୍ଯ୍ୟ ବନ୍ଦ ରହିଥିବା ଦେଖିବାକୁ ମିଳିଛି।
ଅନ୍ୟପଟେ ପାର୍କ ନିକଟରେ ଶବ ସଂସ୍କାର ସାଙ୍ଗକୁ ଅନ୍ୟାନ୍ୟ ଶୁଦ୍ଧି କାର୍ଯ୍ୟ ମଧ୍ୟ କରାଯାଉଥିବା ସ୍ଥାନୀୟ ବାସିନ୍ଦା କହିଛନ୍ତି। ଏପରିକି ଶୁଦ୍ଧି କାର୍ଯ୍ୟ ସମୟରେ ବ୍ୟବହୃତ ବିଭିନ୍ନ ସାମଗ୍ରୀ ପାର୍କ ସମ୍ମୁଖରେ ପଡି ରହୁଛି। ଏହାକୁ ସଫେଇ କରିବା କ୍ଷେତ୍ରରେ କେହି ବି ପଦକ୍ଷେପ ଗ୍ରହଣ କରୁ ନ ଥିବା ଅଭିଯୋଗ ହୋଇଛି। ଏଥିସହ ପାର୍କ ମଧ୍ୟରେ ଅନେକ ସମୟରେ ବିଷାକ୍ତ ସରୀସୃପ ବିଚରଣ କରୁଥିବାରୁ ଏହାକୁ ନେଇ ମଧ୍ୟ ସ୍ଥାନୀୟ ବାସିନ୍ଦା ଭୟଭୀତ ହେଉଛନ୍ତି। ଏଣୁ ପାର୍କଟିକୁ ଅନ୍ୟତ୍ର ସ୍ଥାନକୁ ସ୍ଥାନାନ୍ତର କରାଗଲେ ସାଧାରଣ ଲୋକଙ୍କ କ୍ଷେତ୍ରରେ ବ୍ୟବହାର ଉପଯୋଗୀ ହୋଇପାରିବ ବୋଲି ସାଧାରଣରେ ମତ ପ୍ରକାଶ ପାଇଛି। ଏ ନେଇ ବିଡିଏ ସଚିବ ସମ୍ବିତ ରାଉତଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି ଯେ, ବର୍ତ୍ତମାନ ନିର୍ବାଚନ ଆଚରଣ ବିଧି ଯୋଗୁ ବହୁ ପାର୍କର କାର୍ଯ୍ୟ ବନ୍ଦ ରହିଛି। ଆଚରଣ ବିଧି ଉଠିବା ପରେ ପାର୍କର ଉନ୍ନତୀକରଣ କାର୍ଯ୍ୟ ସାଙ୍ଗକୁ ଜନସାଧାରଣଙ୍କ ସମସ୍ୟା ଦିଗରେ ଗୁରୁତ୍ୱ ଦିଆଯିବ ବୋଲି ସେ କହିଛନ୍ତି।
