ନୟାଗଡ଼ ଅଫିସ/ନୂଆଗାଁ, ୫ା୩(ଡି.ଏନ.ଏ.): ନୟାଗଡ଼ ଜିଲା ନୂଆଗାଁ ଥାନା ପୋଲିସ ବେଆଇନ ଭାବେ ଚାଲାଣ ହେଉଥିବା ୯,୬୦୦ କଫ ସିରପ୍ ବୋତଲକୁ ଜବତ କରିଛି। ସେହିଭଳି ୪ ଷ୍ଟ୍ରିଫ ଆଲପ୍ରା ଜୋଲମ, ୫ ମୋବାଇଲ ଫୋନ, ୧୬ ଶହ ଟଙ୍କା ଅନୁରୂପ ଭାବେ ଜବତ ହୋଇଛି। ଏହି ଘଟଣାରେ ପୋଲିସ ୩ ଜଣ ବ୍ୟବସାୟୀଙ୍କୁ ଶୁକ୍ରବାର ଗିରଫ କରିଛି। ସେମାନେ ହେଲେ କଟକ ଜିଲା ଜଗତପୁର ଥାନା ଗୁଜରପୁର ଗାଁର ମୁସ୍ତାକ୍ ଖାନ(୨୬), କେନ୍ଦ୍ରାପଡ଼ା ଜିଲା ପାଟକୁରା ଥାନା ଗୋବିନ୍ଦପୁର ଗାଁର ଚନ୍ଦ୍ରଶେଖର ଗ୍ରହାଚାର୍ଯ୍ୟ(୩୯), ନୟାଗଡ ଟାଉନ ଥାନା ସିନ୍ଦୁରିଆ ଗାଁର ହାଇଦର ମଲ୍ଲିକ ଓରଫ ଲାଲା (୩୮)ଙ୍କୁ ପୋଲିସ ଗିରଫ କରିଛି। ଏହି ୩ ଅଭିଯୁକ୍ତଙ୍କ ଜାମିନ ନାମଞ୍ଜୁର ପରେ ଶୁକ୍ରବାର ସେମାନଙ୍କୁ ନୟାଗଡ ସବ୍ଜେଲକୁ ପଠାଇ ଦିଆଯାଇଛି।
ଏ ନେଇ ନୟାଗଡରେ ଏସ୍ଡିପିଓଙ୍କ କାର୍ଯ୍ୟାଳୟରେ ଶୁକ୍ରବାର ଏକ ଖବରଦାତା ସମ୍ମିଳନୀ କରି ଅତିରିକ୍ତ ଏସ୍ପି ଉମାକାନ୍ତ ମଲ୍ଲିକ କହିଥିଲେ, କଟକରୁ ଦଶପଲ୍ଲା ଅଞ୍ଚଳକୁ କଫ ସିରପ୍ ବେଆଇନ ଭାବେ ଚାଲାଣ ହେଉଥିଲା। ବଲାଙ୍ଗୀର-ଖୋର୍ଦ୍ଧା ୫୭ ନଂ. ଜାତୀୟ ରାଜପଥର ନୂଆଗାଁ ମେଗା ନର୍ସରୀଠାରେ ନୂଆଗାଁ ଥାନା ପୋଲିସ ଗୁରୁବାର ଅପରାହ୍ନ ୪ଟାରେ ପାଟ୍ରୋଲିଂ କରୁଥିଲା। ପୋଲିସ କଫ ସିରପ୍ ବୋଝେଇ ପିକ୍ଅପ୍ ଭ୍ୟାନ (ନଂ. ଓଡି ୦୨ ୟୁ ୫୯୩୨)କୁ ଜବତ କରିଥିଲା। ଏ ନେଇ ପୋଲିସ ଦଫା ୨୭୪, ୨୭୫, ୩୪ ଆଇପିସିରେ ନଂ. ୪୨/୨୨ରେ ମାମଲା ରୁଜୁ କରି ତଦନ୍ତ କରିଥିଲା।ଖବରଦାତା ସମ୍ମିଳନୀରେ ନୟାଗଡ଼ ଏସ୍ଡିପିଓ ଶୁଭେନ୍ଦୁ ସିଂ, ନୂଆଗାଁ ଆଇଆଇସି ବସନ୍ତ କୁମାର ସାହୁ ଉପସ୍ଥିତ ଥିଲେ।
