ସାଣ୍ଟିଆଗୋ,୧୩ା୧୧: ଦକ୍ଷିଣ ଆମେରିକୀୟ ଦେଶ ଚିଲି ଏହାର ସୁନ୍ଦର ପାହାଡ଼ ପାଇଁ ସାରା ବିଶ୍ୱରେ ଜଣାଶୁଣା। ଏହି ଦେଶରେ ୨୦ ହଜାର ଫୁଟରୁ ଅଧିକ ଉଚ୍ଚର ୨୦ଟି ପାହାଡ଼ ରହିଛି। ମାତ୍ର ଚିଲିର ଆଟାକାମା ମରୁଭୂମିରେ ଏକ ପାହାଡ଼ ରହିଛି, ଯାହା ପୋଷାକ ଏବଂ ଜୋତାରେ ନିର୍ମିତ। ଏହି ପାହାଡ଼ରେ ସ୍ବେଟରଠାରୁ ଆରମ୍ଭ କରି ସ୍କାଇ ବୁଟ୍ ପର୍ଯ୍ୟନ୍ତ ଅଳିଆ ଆବର୍ଜନାରେ ଗଦା ହୋଇଥାଏ।
ଏଠାରେ ପକାଯାଇଥିବା ପୋଷାକର ପାହାଡ଼ ପ୍ରତିବର୍ଷ ଅତି କମ୍ରେ ୩୯ ହଜାର ଟନ୍ ବୃଦ୍ଧି ପାଉଛି। ଦ୍ରୁତ ଗତିରେ ବଢୁଥିବା ଫ୍ୟାଶନ ଇଣ୍ଡଷ୍ଟ୍ରି ଯୋଗୁ ପ୍ରଦୂଷଣ ମଧ୍ୟ ବୃଦ୍ଧି ପାଉଛି। ଏହି ପୋଷାକଗୁଡ଼ିକୁ ଖାଲିସ୍ଥାନରେ ଗଦାଇ ଦିଆଯିବା ପରେ ସେଗୁଡ଼ିକ ପରିବେଶ ପ୍ରତି କ୍ଷତି ପହଞ୍ଚାଇଥାନ୍ତି। ଏହାର ରାସାୟନିକ ପଦାର୍ଥ ବାୟୁ ଏବଂ ଭୂତଳ ଜଳରେ ପହଞ୍ଚି ଏହାକୁ ଅପରିଷ୍କାର କରିଥାଏ।
ଚିଲିରେ ଦୀର୍ଘଦିନରୁ ବିକ୍ରି ହୋଇ ନ ଥିବା ପୋଷାକ ପାଇଁ ଏକ ହବ୍ ହୋଇଆସୁଛି। ଏହି ପୋଷାକ ଚାଇନା ଏବଂ ବାଂଲାଦେଶରେ ତିଆରି କରାଯାଇଥାଏ। ପ୍ରତିବର୍ଷ ପ୍ରାୟ ୩୯୦୦୦ ଟନ୍ କପଡା ଉତ୍ତର ଚିଲିର ଅଲ୍ଟୋ ହୋସ୍ପିସିଓ ଅଞ୍ଚଳର ଇକ୍ୱିକ୍ ବନ୍ଦରକୁ ପଠାଯାଏ, ଯେଉଁଠାରେ ଏହି ପୋଷାକକୁ ବ୍ୟବସାୟୀମାନେ କିଣିଥାନ୍ତି।
କିଛି ଲୋକ ସେମାନଙ୍କ ପରିବାର ପାଇଁ ପୋଷାକଗୁଡ଼ିକୁ ନେବା ପାଇଁ ଏଠାକୁ ଆସିଥାନ୍ତି। ପାହାଡ଼ ଆକାରରେ ଗଦା ହୋଇଥିବା ପୋଷାକ ମଧ୍ୟରୁ ମନପସନ୍ଦର ପୋଷାକ ବାଛିବା କାଠିକର ପାଠ ହୋଇଥାଏ।
