ବରଗଡ଼,୨୫।୫(ପ୍ରେମାନନ୍ଦ ଖମାରୀ): ସୋମବାର ଅପରାହ୍ନ ପ୍ରାୟ ୩ଟାରେ କାଳବୈଶାଖୀ ପ୍ରଭାବରେ ହୋଇଥିବା ଝଡବତାସରେ ବରଗଡ଼ ସହର ଥାନା ଛକରେ ଲକ୍ଷ ଲକ୍ଷ ଟଙ୍କା ବ୍ୟୟରେ ନିର୍ମିତ ଧନୁଯାତ୍ରା ତୋରଣ ଭାଙ୍ଗି ଯାଇ ରାସ୍ତା ଉପରେ ପଡ଼ିଛି। ତୋରଣ ଭାଙ୍ଗି ପଡିବାରୁ ସେଠାରେ ରହିଥିବା ୨ ରିକ୍ସା ଚାଳକ ଗୁରୁତର ଆହତ ହୋଇଛନ୍ତି। ଆହତମାନେ ହେଲେ, ଭଟଲି ବ୍ଲକ ଚଢ଼େଇଗାଁ ଗ୍ରାମର ସଞ୍ଜୟ କୁମ୍ଭାର ଓ ଅଜିତ କୁମ୍ଭାର । ସେମାନେ ୨ ଭାଇ ଅଟନ୍ତି। ଆହତଙ୍କୁ ବରଗଡ଼ ସହରାଞ୍ଚଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପ୍ରାଥମିକ ଚିକିତ୍ସା ପରେ ସ୍ଥାନୀୟ ଏକ ଘରୋଇ ଡ଼ାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଛି ।
ପ୍ରକାଶ ଥାଉକି,ଏହା ପୂର୍ବରୁ ବରପାଲିରେ ମଧ୍ୟ ଏଭଳି ଲକ୍ଷାଧିକ ଟଙ୍କା ବ୍ୟୟରେ ନିର୍ମିତ ତୋରଣ ଭାଙ୍ଗି ପଡିଥିଲା। ନୂଆ ସରକାର ଆସିବା ପରେ ସୌନ୍ଦର୍ଯ୍ୟକରଣ ପାଇଁ ଜିଲାର ବିଭିନ୍ନ ସ୍ଥାନରେ ଏଭଳି ତୋରଣ ନିର୍ମାଣ କରାଯାଇଛି। ମାତ୍ର ଝଡବତାସରେ ତାହା ଭାଙ୍ଗି ପଡୁଥିବା ଯୋଗୁ ଲକ୍ଷଲକ୍ଷ ଟଙ୍କା ପାଣିରେ ମିଶି ଯାଉଛି। ନିମ୍ନମାନର କାମ ଯୋଗୁ ଏଭଳି ହେଉଥିବା ଅଭିଯୋଗ ହେଉଛି।
Dharitri – Odisha’s No.1 Odia Daily
