ମୋହନା, ୨୫।୫( ମନ୍ମଥ ମିଶ୍ର ): ଜଣେ ବିବାହିତା ମହିଳା ବେକରେ ଶାଢ଼ି ବାନ୍ଧି ଭଡ଼ା ଘରେ ଆତ୍ମହତ୍ୟା କରିଥିବା ଜଣାପଡିଛି। ସୂଚନା ପ୍ରକାରେ ମୋହନା ନିବାସୀ ସୀମାଞ୍ଚଳ ସାହୁ(୭୦)ଙ୍କର ଏକମାତ୍ର ଝିଅ ଶିଳ୍ପା ସାହୁ(୨୮) କିଛି ବର୍ଷ ପୂର୍ବେ ଗଞ୍ଜାମ ଜିଲାରେ ବିବାହ କରିଥିଲେ । କୌଣସି କାରଣରୁ ତାଙ୍କ ସ୍ବାମୀଙ୍କର ମୃତ୍ୟୁ ଘଟିଥିଲା । ଏହାପରେ ସେ ମୋହନା ଚ଼ାଲିଆସି ବାପାଙ୍କ ସହିତ ଭଡ଼ା ଘରେ ରହି ଆସୁଥିଲେ । ବାପା ଓ ଝିଅ ମିଶି ଥାନା ସମ୍ମୁଖ ମୁଖ୍ୟ ସଡ଼କ ପାର୍ଶ୍ୱରେ ଫଳ ଦୋକାନ କରି ନିଜର ବ୍ୟବସାୟ କରୁଥିଲେ। ସୋମବାର ମଧ୍ୟାହ୍ନରେ ଶିଳ୍ପା ଦୋକାନରେ ବାପାଙ୍କୁ କୌଣସି କାମରେ ବ୍ରହ୍ମପୁର ଯିବି କହି ଭଡ଼ା ଘରକୁ ଆସିଥିଲେ। ତା’ପରେ ସେ ଫ୍ୟାନ ହୁକରେ ନିଜ ଶାଢ଼ିକୁ ବାନ୍ଧି ଆତ୍ମହତ୍ୟା କରିଥିବା ବାପା କହିଛନ୍ତି । ଖବରପାଇ ଘଟଣାସ୍ଥଳରେ ବାପା ପହଞ୍ଚି ଝିଅକୁ ସେଠାରୁ ଉଦ୍ଧାର କରି ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । କିନ୍ତୁ ଡା. ଜିତେନ୍ଦ୍ର ପ୍ରସାଦ ଦାଶ ଶିଳ୍ପାକୁ ମୃତ ଘୋଷଣା କରିଥିଲେ । ସ୍ବାମୀଙ୍କ ମୃତ୍ୟୁ ପରେ ଶିଳ୍ପାଙ୍କ ଆର୍ଥିକ ଅବସ୍ଥା ସ୍ବଚ୍ଛଳ ନଥିବାରୁ ସେ ମୋହନାର ବହୁ ଲୋକଙ୍କଠାରୁ ଟଙ୍କା ଧାର କରଜ କରି ମାନସିକ ଦୁଶ୍ଚିନ୍ତାରେ ରହିଥିଲେ । ଏଣୁ ସେ ଆତ୍ମହତ୍ୟା କରିଥାଇପାରନ୍ତି ବୋଲି ଶୁଣିବାକୁ ମିଳୁଛି । ତାଙ୍କର ମୃତ୍ୟୁ ସନ୍ଦେହ ଘେରରେ ରହିଥିବା ବେଳେ ପୋଲିସର ତଦନ୍ତ ଜାରି ରହିଛି । ଶବକୁ ବ୍ରହ୍ମପୁର ବଡ଼ ମେଡ଼ିକାଲକୁ ବ୍ୟବଚ୍ଛେଦ ନିମନ୍ତେ ପଠାଯାଇଛି । ତାଙ୍କର ୭ ବର୍ଷର ଗୋଟିଏ ଝିଅ ରହିଛି । ୭/୨୬ ରେ ଏକ ଅପମୃତ୍ୟୁ ମାମଲା ରୁଜୁ ହୋଇଥିବା ଥାନା ଅଧିକାରୀ ଓମ ପ୍ରସାଦ ପାତ୍ର କହିଛନ୍ତି।
