ଶ୍ରୀନଗର,୨୫।୫: ଜମ୍ମୁ କଶ୍ମୀରର ପ୍ରସିଦ୍ଧ ଗୁଲମାର୍ଗ ଗୋଣ୍ଡୋଲାରେ ଏକ ଯାନ୍ତ୍ରିକ ତ୍ରୁଟି ଦେଖାଦେବା ପରେ ଶହ ଶହ ପର୍ଯ୍ୟଟକ ଫସି ରହିଛନ୍ତି । ଖବର ଲେଖାଯିବା ସୁଦ୍ଧା ପ୍ରାୟ ୩୦୦ ଲୋକ ବର୍ତ୍ତମାନ ରୋପୱେ କ୍ୟାବିନ ଭିତରେ ଫସି ରହିଛନ୍ତି । କ୍ୟାବିନଗୁଡ଼ିକ ହଠାତ୍ ବନ୍ଦ ହୋଇଯିବାରୁ ଆତଙ୍କ ସୃଷ୍ଟି ହୋଇଥିଲା ଏବଂ ଆକାଶରେ ଫସି ରହିଥିବା ପର୍ଯ୍ୟଟକମାନେ ଚିତ୍କାର କରିଥିଲେ । ସେନା, ପୋଲିସ ଏବଂ ପ୍ରଶାସନକୁ ନେଇ ଉଦ୍ଧାରକାର୍ଯ୍ୟ ଆରମ୍ଭ ହୋଇଛି । ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା କହିଛନ୍ତି ଯେ ପରିସ୍ଥିତି ଉପରେ କଡ଼ା ନଜର ରଖାଯାଇଛି, ଭୟଭୀତ ହେବାର କୌଣସି ଆବଶ୍ୟକତା ନାହିଁ।
ଗୁଲମାର୍ଗରେ SDRF, NDRF ଏବଂ ଗୁଲମାର୍ଗ ଗୋଣ୍ଡୋଲାର କ୍ୱିକ୍ ରେସପନ୍ସ ଟିମ୍ (QRT) ପୂର୍ବରୁ ମୁତୟନ ଥିବାରୁ, ତୁରନ୍ତ ରିଲିଫ୍ ଏବଂ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଥିଲା। ପ୍ରତିକୂଳ ପାଗ ପରିସ୍ଥିତି ଯୋଗୁଁ ଉଦ୍ଧାର କାର୍ଯ୍ୟରେ କିଛି ଅସୁବିଧାର ସମ୍ମୁଖୀନ ହେଉଛି । ଗତ କିଛି ଦିନ ଧରି କାଶ୍ମୀରରେ ବର୍ଷା ଏବଂ କୁଆପଥର ମାଡ଼ ହେଉଛି । ଉଦ୍ଧାର ଦଳ ସିଡ଼ି ସାହାଯ୍ୟରେ ପ୍ରତ୍ୟେକ କ୍ୟାବିନରେ ପହଞ୍ଚିବାରେ ଲାଗିଛି । କିଛି ଘଣ୍ଟାର ପ୍ରୟାସ ପରେ, ଅଧିକାଂଶ ପର୍ଯ୍ୟଟକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି।
ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଦ୍ୱାରା ଜାରି ଏକ ବିବୃତ୍ତିରେ କୁହାଯାଇଛି ଯେ ଯାନ୍ତ୍ରିକ ତ୍ରୁଟି ଯୋଗୁଁ ଗୁଲମାର୍ଗ ଗୋଣ୍ଡୋଲା କେବୁଲ କାର୍ ସେବା ଅସ୍ଥାୟୀ ଭାବରେ ବନ୍ଦ କରାଯିବା ପରେ ସରକାର ପରିସ୍ଥିତି ଉପରେ ନଜର ରଖିଛନ୍ତି । ସମସ୍ତ କ୍ୟାବିନ ସୁରକ୍ଷିତ ଅଛି, ଏବଂ ଫସି ରହିଥିବା ପର୍ଯ୍ୟଟକଙ୍କୁ ସୁରକ୍ଷିତ ଭାବରେ ସ୍ଥାନାନ୍ତର କରିବା ପାଇଁ ତାଲିମପ୍ରାପ୍ତ ଦଳ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି । ପରିସ୍ଥିତି ସମ୍ପୂର୍ଣ୍ଣ ନିୟନ୍ତ୍ରଣରେ ଅଛି, ଏବଂ ଭୟଭୀତ ହେବାର କୌଣସି କାରଣ ନାହିଁ ।
