କଟକ ଅଫିସ, ୧୨ା୧୧:ବର୍ତ୍ତମାନର ଆରକ୍ଷୀ ମହାନିର୍ଦ୍ଦେଶକ (ଡିଜିପି) ଅଭୟ ଆସନ୍ତା ଡିସେମ୍ବର ୩୧ରେ ଅବସର ଗ୍ରହଣ କରୁଛନ୍ତି। ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁସାରେ ଆରକ୍ଷୀ ମହାନିର୍ଦ୍ଦେଶକଙ୍କ କାର୍ଯ୍ୟକାଳ ଅତି କମ୍ରେ ୨ବର୍ଷ ହେବା ଆବଶ୍ୟକ। ଯଦିଓ ସ୍ବାଭାବିକ ଭାବେ ଅଭୟ ଗତ ଜୁନ୍ରେ ଅବସର ଗ୍ରହଣ କରିବା କଥା, ସୁପ୍ରିମକୋର୍ଟ ନିର୍ଦ୍ଧାରିତ କରିଥିବା ବ୍ୟବସ୍ଥା ଅନୁସାରେ ତାଙ୍କ କାର୍ଯ୍ୟକାଳକୁ ୬ମାସ ବୃଦ୍ଧି କରାଯାଇଛି। ଏହାଛଡ଼ା ସେ ପଦ ନିବୃତ୍ତ ହେବାର ୩ମାସ ଆଗରୁ ପରବର୍ତ୍ତୀ ଆରକ୍ଷୀ ମହାନିର୍ଦ୍ଦେଶକ ନିଯୁକ୍ତି ପ୍ରକ୍ରିୟା ରାଜ୍ୟ ସରକାର ଆରମ୍ଭ କରିଛନ୍ତି। ଏହି କ୍ରମରେ ୩୦ବର୍ଷ କାର୍ଯ୍ୟକାଳ ପୂରଣ କରିଥିବା ସମସ୍ତ ଆଇପିଏସ୍ ଅଫିସରଙ୍କ ଏକ ତାଲିକା କେନ୍ଦ୍ର ସରକାରଙ୍କ ନିକଟକୁ ପଠାଇଛନ୍ତି। କେନ୍ଦ୍ର ସରକାର ଏହି ତାଲିକା କେନ୍ଦ୍ରୀୟ ଲୋକ ସେବା ଆୟୋଗଙ୍କ ନିକଟକୁ ପଠାଇବେ। ଏହି ତାଲିକାରୁ ବୟୋଜ୍ୟେଷ୍ଠତା ଭିତ୍ତିରେ ପ୍ରଥମ ତିନି ଜଣଙ୍କ ନାମ କେନ୍ଦ୍ରୀୟ ଲୋକ ସେବା ଆୟୋଗ ରାଜ୍ୟ ସରକାରଙ୍କ ନିକଟକୁ ପଠାଇବେ। ଅର୍ଥାତ ତାଲିକାରେ ବରିଷ୍ଠତା ଭିତ୍ତିରେ ଯେଉଁ ୩ଜଣଙ୍କ ନାମ ଆସିବ, ସେମାନେ ହେଲେ ୧୯୮୬ ବ୍ୟାଚର ପ୍ରଦୀପ କପୁର ଓ ବିଜୟ ଶର୍ମା ଏବଂ ୧୯୮୭ ବ୍ୟାଚର ସୁନୀଲ ବନ୍ଶଲ। ଯଦି କୌଣସି କାରଣରୁ ବିଜୟ ଶର୍ମାଙ୍କ ନାମ ବାଦ୍ ପଡ଼େ, ତେବେ ତୃତୀୟ ନାମ ଭାବରେ ୧୯୮୮ ବ୍ୟାଚର ମନୋଜ ଛାବ୍ରାଙ୍କ ନାମ ଅନ୍ତର୍ଭୁକ୍ତ ହେବ। ତେଣୁ ଅନ୍ୟମାନଙ୍କ ନାମ ଏହି ତାଲିକାରେ ଅନ୍ତର୍ଭୁକ୍ତ ହେବାର କୌଣସି ସମ୍ଭାବନା ନାହିଁ।
ଏହି ଦୃଷ୍ଟିକୋଣରୁ କଳ୍ପନାଜଳ୍ପନା କରି ଅନେକ ଅଫିସରଙ୍କ ନାମ ବିଭିନ୍ନ ଗଣମାଧ୍ୟମରେ ପ୍ରକାଶିତ ହେଲେ ମଧ୍ୟ ତାଲିକା ଉପର ୩ଜଣଙ୍କ ମଧ୍ୟରେ ସୀମିତ ରହିବ। ପ୍ରଦୀପ କପୁର ଆଗରୁ କଟକ, ବାଲେଶ୍ୱର ଓ ପୁରୀ ଜିଲାର ଆରକ୍ଷୀ ଅଧୀକ୍ଷକ, ରାଉରକେଲାର ଡିଆଇଜି ଭାବେ କାର୍ଯ୍ୟ କରିଛନ୍ତି। ଏହାଛଡ଼ା ସେ ରାଜ୍ୟ ଗୋଇନ୍ଦା ବିଭାଗରେ ଅନେକ ଦିନ କାର୍ଯ୍ୟରତ ଥିଲେ। ତେଣୁ ଉଭୟ ବରିଷ୍ଠତା ଓ ଅନୁଭୂତି ଦୃଷ୍ଟିରୁ ବର୍ତ୍ତମାନର ସ୍ଥିତି ସମ୍ଭାଳିବାକୁ ରାଜ୍ୟ ସରକାର ତାଙ୍କୁ ହିଁ ମନୋନୀତ କରିବା ସମ୍ଭାବନା ଥିବା ସୂଚନା ମିଳୁଛି।
