ଦିଗପହଣ୍ଡି,୭ା୭(ଡି.ଏନ.ଏ.)-ଗଞ୍ଜାମ-ଗଜପତି ଜିଲା ସୀମାନ୍ତ ଦିଗପହଣ୍ଡି ବ୍ଲକ ସହଦେବ ଟିକରପଡ଼ା ପଞ୍ଚାୟତ ଘାସିଆମ୍ବ ଗାଁରେ ଶନିବାର ସକାଳ ପ୍ରାୟ ୮ଟାରେ ଜଣେ ମହିଳା ବଗଡ଼କୁ କାମ କରିବାକୁ ଯାଇଥିଲେ। ସେ ପାହାଡ଼ରୁ ୫ ଫୁଟ ତଳକୁ ଖସି ପଡ଼ି ଗୁରତର ହୋଇଛନ୍ତି। ସେ ହେଲେ ଘାସିଆମ୍ବ ଗାଁର ପାଗଡ଼ା ମଣ୍ଡଳଙ୍କ ସ୍ତ୍ରୀ ମାଙ୍ଗି । ଆମ୍ବୁଲାନ୍ସ ସେବା ପାଇଁ ଫୋନ କରିଥିଲେ ମଧ୍ୟ ମିଳିନଥିଲା। ଗାଁକୁ ଭଲ ରାସ୍ତା ନ ଥିବାରୁ ଅଟୋ ଚାଳକ ମଧ୍ୟ ମନା କରିଥିଲେ। ଦୀର୍ଘ ଦୁଇ ଘଣ୍ଟା ପରେ ମଧ୍ୟ ଗାଡ଼ି ବ୍ୟବସ୍ଥା ନ ହେବାରୁ ବାଧ୍ୟହୋଇ ପରିବାର ଲୋକେ ମାଙ୍ଗିଙ୍କୁ ଏକ ଖଟିଆରେ ବୋହି ନେଇଥିଲେ। ପୋଡ଼ାମାରି ନିକଟ ବୋରିଗାଁ ଗ୍ରାମରେ ପହଞ୍ଚତ୍ ସେଠାରୁ ଏକ ଅଟୋ ଯୋଗେ ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ। ସେଠାରେ ପ୍ରାଥମିକ ଚିକିତ୍ସା ପରେ ତାଙ୍କୁ ବ୍ରହ୍ମପୁର ବଡ଼ ଡ଼ାକ୍ତରଖାନାକୁ ସ୍ଥାନାନ୍ତର କରାଯାଇଛି। ମାଙ୍ଗିଙ୍କୁ ଖଟିଆରେ ବୋହି ନେବା ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା। ଦିଗପହଣ୍ଡି ନିର୍ବାଚନ ମଣ୍ଡଳୀ ଅଧୀନ ସହଦେବ ଟିକରପଡ଼ା ପଞ୍ଚାୟତ ଘାସିଆମ୍ବ, ଦାଦୁରୁମା, କୁରୁମା, ଗୋଚ୍ଛାପାଟ, ପିତାମହୁଲ ଭଳି ଅନେକ ଗଁାକୁ ଏବେ ବି ରାସ୍ତା ନାହିଁ । ପାହାଡ଼ ଚଢ଼ି ଲୋକେ ଯା’ଆସ କରୁଛନ୍ତିି । ରାସ୍ତା ନିର୍ମାଣ ପାଇଁ ଗ୍ରାମୋନ୍ନୟନ ବିଭାଗ ଓ ବିଡିଓଙ୍କୁ ଜଣାଇଲେ ମଧ୍ୟ କୌଣସି ସୁଫଳ ମିଳୁନାହିଁ ବୋଲି ଘାସିଆମ୍ବ ଗ୍ରାମବାସୀ ଅଭିଯୋଗ କରିଛନ୍ତି। ଏସବୁ ଗ୍ରାମ୍ୟ ରାସ୍ତା ପଞ୍ଚାୟତିରାଜ ବିଭାଗ ଆମକୁ ହସ୍ତାନ୍ତର କଲେ ଏନେଇ ପଦକ୍ଷେପ ନିଆଯିବ ବୋଲି ଦିଗପହଣ୍ଡି ଗ୍ରାମୋନ୍ନୟନ କାର୍ଯ୍ୟାଳୟ ଉପ ନିର୍ବାହୀ ଯନ୍ତ୍ରୀ ଇଂ. ପ୍ରଭାତ କୁମାର ପାଣିଗ୍ରାହୀ କହିଛନ୍ତି । ଘଟଣା ଆମ ଦୃଷ୍ଟିକୁ ଆସିନାହିଁ । ଲିଖିତ ଆବେଦନ ମିଳିଲେ ରାସ୍ତା ନିର୍ମାଣ ପାଇଁ ଆକ୍ସନ୍ ପ୍ଲାନ ପ୍ରସ୍ତୁତ କରାଯିବ ବୋଲି ବିଡିଓ ହଳଧର ଶବର କହିଛନ୍ତି । ସହଦେବ ଟିକରପଡ଼ା ପଞ୍ଚାୟତ ୧ନଂ ୱାର୍ଡ ଅଧୀନ ଘାସିଆମ୍ବ ଗ୍ରାମରେ ପ୍ରାୟ ୨ ଶହ ପରିବାରର ୫ ଶହରୁ ଊର୍ଦ୍ଧ୍ୱ ବାସିନ୍ଦା ରହୁଥିବା ସରପଞ୍ଚ ବାବୁଲା ମଳିକ ଜଣାଇଛନ୍ତି । ଖାଦ୍ୟ ସୁରକ୍ଷା ଯୋଜନା ଓ ଭତ୍ତା ନିମନ୍ତେ ଲୋକେ ପୋଡ଼ାମାରିରୁ ୨୧ କିମି ଅତିକ୍ରାନ୍ତ କରି ପଞ୍ଚାୟତ କାର୍ଯ୍ୟାଳୟରେ ପହଞ୍ଚୁଥିବା କହିଛନ୍ତି ।
