ଭୁବନେଶ୍ବର,୨୨ା୫: ଦେଶର ଅଧିକାଂଶ ଭାଗରେ ପାରଦ ଏବେ ୪୫ ରୁ ୪୮ ଡିଗ୍ରୀ ସେଲସିୟସ ପାର୍ କରିସାରିଲାଣି। ଦିଲ୍ଲୀ-ଏନସିଆର, ଉତ୍ତର ଭାରତ ଏବଂ ଓ ସମେତ ବିଭିନ୍ନ ଅଞ୍ଚଳ ଏପରିକି ଆମ ଓଡ଼ିଶା ମଧ୍ୟ ଭୟଙ୍କର ଗ୍ରୀଷ୍ମ ପ୍ରବାହ ଓ ଲୁ’ (Heatwave) କବଳରେ ରହିଛି। ବୈଜ୍ଞାନିକମାନଙ୍କ ଅନୁସାରେ, ଏହି ଜୀବନହନ୍ତା ଗରମ ପଛରେ କେବଳ ସ୍ଥାନୀୟ କାରଣ ନାହିଁ, ବରଂ ପ୍ରଶାନ୍ତ ମହାସାଗରରେ ସୃଷ୍ଟି ହେଉଥିବା ଏକ ଶକ୍ତିଶାଳୀ ‘ସୁପର ଏଲ-ନିନୋ’ (Super El-Nino) ଦାୟୀ। ଏହା ୧୫୦ ବର୍ଷର ରେକର୍ଡ ଭାଙ୍ଗିବା ସହ ଭାରତରେ ମରୁ ଏବଂ ବନ୍ୟା ପରି ପରିସ୍ଥିତି ସୃଷ୍ଟି କରିପାରେ।
ଯେତେବେଳେ ସମୁଦ୍ର ପୃଷ୍ଠର ତାପମାତ୍ରା ଦୀର୍ଘକାଳୀନ ହାରାହାରି ତାପମାତ୍ରା ଠାରୁ ୧.୫ ଡିଗ୍ରୀ ସେଲସିୟସ ଅଧିକ ହୋଇଯାଏ, ତାକୁ ‘ସୁପର ଏଲ-ନିନୋ’ କୁହାଯାଏ। କିନ୍ତୁ ଚଳିତ ବର୍ଷର ପୂର୍ୱାନୁମାନ ଅନୁସାରେ, ସମୁଦ୍ରର ତାପମାତ୍ରା ୩ ଡିଗ୍ରୀ ସେଲସିୟସରୁ ଅଧିକ ବଢ଼ିପାରେ। ଏହା ପୂର୍ୱରୁ ୧୮୭ ମସିହାରେ ସର୍ୱାଧିକ ୨.୭ ଡିଗ୍ରୀ ରେକର୍ଡ କରାଯାଇଥିଲା। ବୈଜ୍ଞାନିକମାନେ ଚେତାବନୀ ଦେଇଛନ୍ତି ଯେ ୧୮୭୭ ମସିହାରେ ଆସିଥିବା ଏହି ମହାବିପଦ ଯୋଗୁଁ ସେତେବେଳେ ବିଶ୍ୱର ପ୍ରାୟ ୪% ଜନସଂଖ୍ୟା ମୃତ୍ୟୁମୁଖରେ ପଡ଼ିଥିଲେ। ଏଥର ସ୍ଥିତି ତା’ଠାରୁ ବି ଭୟଙ୍କର ହୋଇପାରେ।
IMD ଅନୁଯାୟୀ, ଭାରତର ଉତ୍ତର, ପଶ୍ଚିମ ଏବଂ କେନ୍ଦ୍ରୀୟ ଅଞ୍ଚଳରେ ମରୁ (Drought) ପରିସ୍ଥିତି ସୃଷ୍ଟି ହୋଇପାରେ। ପାଣିପାଗ ବିଶେଷଜ୍ଞମାନେ ଏନେଇ ସତର୍କ କରାଇଛନ୍ତି। ସେହିପରି ଅନ୍ୟପଟେ କିଛି ର୍ନିଦ୍ଦିଷ୍ଟ ସ୍ଥାନ (ଯେପରିକି ଚେନ୍ନାଇ ଓ ଦକ୍ଷିଣ ଭାରତର କିଛି ଅଞ୍ଚଳ) ରେ ଅତ୍ୟଧିକ ବର୍ଷା ଯୋଗୁଁ ଭୟଙ୍କର ବନ୍ୟା ମଧ୍ୟ ଆସିପାରେ।
ପୂର୍ୱ ରେକର୍ଡ ଦେଖିଲେ, ୧୯୮୨-୮୩ ର ଏଲ-ନିନୋ ଯୋଗୁଁ ବିଶ୍ୱ ଅର୍ଥନୀତିକୁ ୪.୧ ଟ୍ରିଲିଅନ ଡଲାର ଏବଂ ୧୯୯୭-୯୮ ର “ଶତାବ୍ଦୀର ସବୁଠାରୁ ବଡ଼ ଏଲ-ନିନୋ” ଯୋଗୁଁ ୫.୭ ଟ୍ରିଲିଅନ ଡଲାରର କ୍ଷତି ସହିବାକୁ ପଡ଼ିଥିଲା। ଚଳିତ ବର୍ଷର ‘ସୁପର ଏଲ-ନିନୋ’ ବିଶ୍ୱ ତଥା ଭାରତର ବଜାର ଓ ଜୀବନଯାତ୍ରାକୁ ଓଲଟପାଲଟ କରିଦେବାର ଆଶଙ୍କା ସୃଷ୍ଟି କରିଛି।
ଓଡ଼ିଶା ଉପରେ ଏହାର ବ୍ୟାପକ ଏବଂ ଗମ୍ଭୀର (Severe) ପ୍ରଭାବ ପଡ଼ିବାର ଆଶଙ୍କା ରହିଛି। ପାଣିପାଗ ବିଜ୍ଞାନୀ ଏବଂ କୃଷି ବିଶେଷଜ୍ଞଙ୍କ ମତରେ, ‘ସୁପର ଏଲ-ନିନୋ’ (Super El-Nino) ଓଡ଼ିଶାର ଜଳବାୟୁ ଏବଂ ଅର୍ଥନୀତିକୁ ସିଧାସଳଖ ଆଘାତ କରିବ।
-ମରୁଡ଼ି ଆଶଙ୍କା ଏବଂ ମୌସୁମୀରେ ବିଭ୍ରାଟ
– ସୁପର ଏଲ-ନିନୋ ଯୋଗୁଁ ମୌସୁମୀ ବାୟୁ ଦୁର୍ୱଳ ହେବ, ଯାହାଫଳରେ ଓଡ଼ିଶାରେ ସୱାଭାବିକ ଠାରୁ ବହୁତ କମ ବର୍ଷା ହୋଇପାରେ।
– ଜୁନ ଏବଂ ଜୁଲାଇ ମାସରେ ଧାନ ଚାଷ ପାଇଁ ତଳି ରୁଆ ଏବଂ ମରୁଆ କାମ ଆରମ୍ଭ ହୁଏ। ବର୍ଷାର ଅଭାବ ଯୋଗୁଁ ଚାଷୀମାନେ ଜମି ପ୍ରସ୍ତୁତ କରିପାରିବେ ନାହିଁ। ଓଡ଼ିଶାର ପଶ୍ଚିମାଞ୍ଚଳ (ଯେପରିକି ବଲାଙ୍ଗୀର, କଳାହାଣ୍ଡି, ନୂଆପଡ଼ା, ବରଗଡ଼) ଏବଂ ଆଭ୍ୟନ୍ତରୀଣ ଜିଲ୍ଲାଗୁଡ଼ିକରେ ମରୁଡ଼ି (Drought) ପରିସ୍ଥିତି ସୃଷ୍ଟି ହେବାର ସବୁଠାରୁ ଅଧିକ ବିପଦ ରହିଛି।
-ଓଡ଼ିଶାରେ ଏବେଠାରୁ ହିଁ ତାପମାତ୍ରା ୪୫ ଡିଗ୍ରୀ ପାର୍ କରିସାରିଲାଣି। ସୁପର ଏଲ-ନିନୋ ପ୍ରଭାବରେ ଏହି ଗରମ ଆହୁରି ଅସହ୍ୟ ହେବ।
-ସାଧାରଣତଃ ଜୁନ ପ୍ରଥମ କିମ୍ୱା ଦ୍ୱିତୀୟ ସପ୍ତାହ ସୁଦ୍ଧା ମୌସୁମୀ ଛୁଇଁଲେ ଗରମ କମିଯାଏ। କିନ୍ତୁ ଏଲ-ନିନୋ ଯୋଗୁଁ ମୌସୁମୀ ଆସିବାରେ ବିଳମ୍ୱ ହେବ ଏବଂ ପ୍ରଚଣ୍ଡ ତାପମାତ୍ରା ଦୀର୍ଘ ଦିନ ଧରି ଜାରି ରହିବ।
– ରାଜ୍ୟର ପଶ୍ଚିମ ଭାଗରେ ଶୁଖିଲା ଗରମ ହେଉଥିବା ବେଳେ ଭୁବନେଶ୍ୱର, କଟକ, ପୁରୀ, ବାଲେଶ୍ୱର ଭଳି ଉପକୂଳବର୍ତ୍ତୀ ଅଞ୍ଚଳରେ ବାୟୁମଣ୍ଡଳରେ ଆଦ୍ରତା (Humidity) ଅଧିକ ରହିବା ଯୋଗୁଁ ଅସ୍ୱାଭାବିକ ଗୁଳୁଗୁଳି ହେବ, ଯାହା ଜୀବନଯାତ୍ରାକୁ ଦୁର୍ୱିଷହ କରିଦେବ।
– ବର୍ଷା ନହେବା ଏବଂ ପ୍ରଚଣ୍ଡ ଗରମ ଯୋଗୁଁ ଓଡ଼ିଶାର ପ୍ରମୁଖ ନଦୀ, ନାଳ, ପୋଖରୀ ଏବଂ ଡ୍ୟାମ (ଜଳଭଣ୍ଡାର) ଗୁଡ଼ିକର ଜଳସ୍ତର ଶୀଘ୍ର ହ୍ରାସ ପାଇବ। ଏହାଦ୍ୱାରା କେବଳ ଚାଷ ନୁହେଁ, ବରଂ ପାନୀୟ ଜଳର ମଧ୍ୟ ଘୋର ଅଭାବ ଦେଖାଦେବ।
-ରାଜ୍ୟର ଅନେକ ସହର ଓ ଗାଁରେ ନଳକୂପ (Tube wells) ଏବଂ କୂଅ ଶୁଖିଯିବାର ଆଶଙ୍କା ରହିଛି।
-ଏଲ-ନିନୋ କେବଳ ମରୁଡ଼ି ଆଣେ ନାହିଁ, ବରଂ ପାଣିପାଗରେ ବଡ଼ ଓଲଟପାଲଟ କରେ।
-ଅତ୍ୟଧିକ ଗରମ ଯୋଗୁଁ ବାୟୁମଣ୍ଡଳରେ ସ୍ଥାନୀୟ ସ୍ତରରେ ନିମ୍ନଚାପ ସୃଷ୍ଟି ହୋଇ ଭୟଙ୍କର କାଳବୈଶାଖୀ ଏବଂ ଝଡ଼ବର୍ଷା ହେବ। ଓଡ଼ିଶାରେ ବଜ୍ରପାତ (Lightning) ଜନିତ ମୃତ୍ୟୁସଂଖ୍ୟା ବଢ଼ିବାର ଆଶଙ୍କା ଅଛି।
– କିଛି ସୀମିତ ଅଞ୍ଚଳରେ କମ ସମୟ ମଧ୍ୟରେ ଅତି ପ୍ରବଳ ବର୍ଷା (Cloudburst/Flash flood) ହୋଇପାରେ, ଯାହା ସହରାଞ୍ଚଳରେ କୃତ୍ରିମ ବନ୍ୟା ପରିସ୍ଥିତି ସୃଷ୍ଟି କରିବ।
-ଆର୍ଥିକ ପ୍ରଭାବ ଏବଂ ମହଙ୍ଗା ମାଡ଼ (Economic Impact & Inflation)
-ଓଡ଼ିଶାରେ ଧାନ ସହିତ ପନିପରିବା ଚାଷ ପ୍ରଭାବିତ ହେବ। ସ୍ଥାନୀୟ ଉତ୍ପାଦନ କମିଗଲେ ବଜାରରେ ପରିବା, ଡାଲି ଏବଂ ଚାଉଳ ଦର ଆକାଶଛୁଆଁ ହେବ।
-ଜଳଭଣ୍ଡାରଗୁଡ଼ିକରେ ପାଣି କମିଗଲେ ଜଳବିଦ୍ୟୁତ (Hydro Power) ଉତ୍ପାଦନ ହ୍ରାସ ପାଇବ। ଅନ୍ୟପଟେ ଗରମ ଯୋଗୁଁ ବିଦ୍ୟୁତ ଚାହିଦା ସର୍ୱାଧିକ ରହିବ, ଯାହା ଓଡ଼ିଶାରେ ପାୱାର କଟ ବା ବିଦ୍ୟୁତ ସଙ୍କଟ ସୃଷ୍ଟି କରିପାରେ।
