ଭୁବନେଶ୍ୱର,୩୧।୮(ବ୍ୟୁରୋ): ଅର୍ଥମନ୍ତ୍ରୀ ନିର୍ମଳା ସୀତାରାମନ ନ୍ୟାଶନାଲ ମନିଟାଇଜେଶନ ପାଇପ୍ଲାଇନ ଯୋଜନା ସମ୍ପର୍କରେ ଚଳିତ ମାସ ୨୩ ତାରିଖରେ ଘୋଷଣା କରିଥିଲେ। ଏଥିରେ ରାଜପଥ, ବନ୍ଦର, ବିମାନ ବନ୍ଦର, ରେଳପଥ, ଖଣି, ବିଦ୍ୟୁତ୍ ସରବରାହ ବ୍ୟବସ୍ଥା, ଷ୍ଟାଡିୟମ, ପାନ୍ଥନିବାସ ଭଳି ଅନେକ ସରକାରୀ ଉଦ୍ୟୋଗ ତଥା ପ୍ରକଳ୍ପଗୁଡିକୁ ସାମିଲ କରାଯାଇଛି। ଏ ବାବଦରେ କେନ୍ଦ୍ର ସରକାର ଆଗାମୀ ୪ ବର୍ଷ ମଧ୍ୟରେ ୬ ଲକ୍ଷ କୋଟି ଟଙ୍କା ପାଇବା ପାଇଁ ଲକ୍ଷ୍ୟ ରଖିଛନ୍ତି। ମୋଦି ସରକାର ଦେଶର ବିକାଶ ନାଁରେ ଗୁଡ଼ାଏ ମିଛ ବିକ୍ରି ପରେ ଏବେ ଦେଶର ସମ୍ପତ୍ତି ବିକ୍ରି ଆରମ୍ଭ କରିଛନ୍ତି ବୋଲି ରାଜ୍ୟ କଂଗ୍ରେସ ଅଭିଯୋଗ ଆଣିଛି। ସୋମବାର ରାଜ୍ୟ କଂଗ୍ରେସ କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ବରିଷ୍ଠ କଂଗ୍ରେସ ନେତା ପଞ୍ଚାନନ କାନୁନ୍ଗୋ ଏ ନେଇ ଅଭିଯୋଗ ଆଣିବା ସହ କଡ଼ା ସମାଲୋଚନା କରି କହିଛନ୍ତି, ବିଗତ ୭ବର୍ଷ ମଧ୍ୟରେ ଦେଶରେ କେବଳ ଅର୍ଥନୀତି ବିନାଶ ପ୍ରକ୍ରିୟା ସୃଷ୍ଟି ହୋଇଛି। ୭୦ବର୍ଷର ସମ୍ପତ୍ତିକୁ କେନ୍ଦ୍ର ସରକାର ଶାଗମାଛ ଦରରେ ବିକ୍ରି କରୁଛନ୍ତି। ଯେତେବେଳେ କେନ୍ଦ୍ର ଅର୍ଥମନ୍ତ୍ରୀ ମାସକୁ ଜିଏସ୍ଟି ବାବଦରେ ୧ଲକ୍ଷ କୋଟି ଟଙ୍କା ଆଦାୟ ହେଉଥିବା ଦାବି କରୁଛନ୍ତି, ସେତେବେଳେ ମାତ୍ର କେଇ ମାସର ଜିଏସ୍ଟି ଆଦାୟ ସହ ସମାନ ଅର୍ଥ ବଦଳରେ ଦେଶର ଏତେଗୁଡିଏ ସମ୍ପତ୍ତି ବିକିବା କେତେଦୂର ଯଥାର୍ଥ। କେନ୍ଦ୍ର ସରକାର ଏହି ନିଷ୍ପତ୍ତିକୁ ତୁରନ୍ତ ପ୍ରତ୍ୟାହାର କରିବା ପାଇଁ କଂଗ୍ରେସ ଦାବି କରିଛି। ଅପରପକ୍ଷରେ ଦେଶର ଅର୍ଥନୀତିରେ ସୃଷ୍ଟି ହୋଇଥିବା ଅସ୍ଥିରତା ପାଇଁ ସେ କେନ୍ଦ୍ର ସରକାରଙ୍କୁ ଦାୟୀ କରିଛନ୍ତି। କେନ୍ଦ୍ରର ତ୍ରୁଟିପୂର୍ଣ୍ଣ ନୀତି ଯୋଗୁ ଦେଶର ଅଭିବୃଦ୍ଧି ହାର ୪ ପ୍ରତିଶତ ରହିଛି। ଏଥିପାଇଁ କରୋନାକୁ ଦାୟୀ କରିବା ଠିକ୍ ନୁହେଁ ବୋଲି କାନୁନ୍ଗୋ କହିଛନ୍ତି।
