ଭୁବନେଶ୍ୱର, ୨୮ା୭(ବ୍ୟୁରୋ):ଓଡ଼ିଶାରେ ବନାଗ୍ନି ବିପର୍ଯ୍ୟୟ ବଢୁଛି। ୨୦୨୦ ନଭେମ୍ବରରୁ ୨୦୨୧ ଜୁନ୍ (୭ମାସ) ମଧ୍ୟରେ ରାଜ୍ୟରେ ସର୍ବାଧିକ ଜଙ୍ଗଲ ପୋଡ଼ି ଦୃଷ୍ଟିଗୋଚର ହୋଇଛି। ଏହି ସମୟ ମଧ୍ୟରେ ଦେଶରେ ସମୁଦାୟ ୩ ଲକ୍ଷ ୪୫ ହଜାର ୯୮୯ଟି ବନାଗ୍ନି ଘଟଣା ତାଲିକାଭୁକ୍ତ ହୋଇଥିବାବେଳେ କେବଳ ଓଡ଼ିଶାରେ ୫୧ ହଜାର ୯୬୮ ଜଙ୍ଗଲ ବନାଗ୍ନି କବଳକୁ ଆସିଥିଲା। ଭାରତୀୟ ଜଙ୍ଗଲ ସର୍ଭେ (ଏଫ୍ଏସ୍ଆଇ) ଦ୍ୱାରା କରାଯାଇଥିବା ସାଟେଲାଇଟ ସର୍ଭେରୁ ଏହି ତଥ୍ୟ ଜଣାପଡ଼ିଛି। କେନ୍ଦ୍ର ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରୀ ଭୂପେନ୍ଦର ଯାଦବ ପାର୍ଲାମେଣ୍ଟରେ ଏହି ସୂଚନା ଦେଇଛନ୍ତି। ତେବେ ବନାଗ୍ନି କାରଣରୁ ମୋଟ କେତେ ଜଙ୍ଗଲ ନଷ୍ଟ ହୋଇଛି, ତାହା ଆକଳନ କରାଯାଇ ନ ଥିବା ମନ୍ତ୍ରୀ କହିଛନ୍ତି।
ବନାଗ୍ନି ଘଟଣାରେ ଓଡ଼ିଶା ପରେ ଦ୍ୱିତୀୟ ସ୍ଥାନରେ ରହିଛି ମଧ୍ୟପ୍ରଦେଶ। ଏଠାରେ ୪୭ ହଜାର ୭୯୫ ବନାଗ୍ନି ଘଟଣା ସାମ୍ନାକୁ ଆସିଛି। ସେହିପରି ଛତିଶଗଡ଼ରେ ୩୮ ହଜାର ୧୦୬, ମହାରାଷ୍ଟ୍ରରେ ୩୪ ହଜାର ୨୫, ଝାଡ଼ଖଣ୍ଡରେ ୨୧ ହଜାର ୭୧୩, ଉତ୍ତରାଖଣ୍ଡରେ ୨୧ ହଜାର ୪୮୭, ଆନ୍ଧ୍ରପ୍ରଦେଶରେ ୧୯ ହଜାର ୩୨୮, ତେଲଙ୍ଗାନାରେ ୧୮ ହଜାର ୨୩୭, ମିଜୋରାମରେ ୧୨ ହଜାର ୮୪୬, ଆସାମରେ ୧୦ ହଜାର ୭୧୮ ଏବଂ ମଣିପୁରର ୧୦ ହଜାର ୪୫୭ ସ୍ଥାନରେ ଜଙ୍ଗଲରେ ନିଆଁ ଲାଗିଥିଲା। କେତେକ ସ୍ଥାନରେ ପ୍ରାକୃତିକ ଉପାୟରେ ନିଆଁ ଲାଗି ଥିବାବେଳେ ଅନ୍ୟ କେତେକ ସ୍ଥାନରେ ବିଡ଼ି, ସିଗାରେଟ ନିଅଁ। ବନାଗ୍ନିର କାରଣ ବୋଲି ଏଫ୍ଏସ୍ଆଇ ପକ୍ଷରୁ କୁହାଯାଇଛି। ସୂଚନାଯୋଗ୍ୟ, ସାଟେଲାଇଟ ଆଧାରିତ ସ୍ବୟଂକ୍ରିୟ ଜଙ୍ଗଲ ନିଆଁ ତଦାରଖ ଓ ସତର୍କ ବ୍ୟବସ୍ଥା ମାଧ୍ୟମରେ ବନାଗ୍ନି ଉପରେ ନଜର ରଖିବା ଲାଗି ଏଫ୍ଏସଆଇ ପକ୍ଷରୁ ବ୍ୟବସ୍ଥା କରାଯାଇଛି। ତଦନୁଯାୟୀ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ ନିୟମିତ ଏସଏମ୍ଏସ ଜରିଆରେ ସୂଚନା ପ୍ରଦାନ କରାଯାଉଛି। ଜଙ୍ଗଲ ନିଆଁକୁ ନିୟନ୍ତ୍ରଣ କରିବା ଲାଗି କାର୍ଯ୍ୟକାରୀ ହେଉଥିବା ବିଭିନ୍ନ ଯୋଜନା ପାଇଁ କେନ୍ଦ୍ର ସରକାର ଆର୍ଥିକ ସହାୟତା ଯୋଗାଇ ଦେଇଥାଆନ୍ତି। ଜଙ୍ଗଲ ସୁରକ୍ଷା ଓ ପରିଚାଳନା ଦାୟିତ୍ୱ ଉଭୟ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର। ଏହାଛଡ଼ା ଜଙ୍ଗଲ ନିଆଁ ସମ୍ପର୍କରେ ଏଫ୍ଏସ୍ଆଇ ପକ୍ଷରୁ ପ୍ରତି ସପ୍ତାହରେ ଆଗୁଆ ସୂଚନା ଦିଆଯାଇଥାଏ ବୋଲି ମନ୍ତ୍ରୀ କହିଛନ୍ତି।
