ନୂଆଦିଲ୍ଲୀ,୨୬।୫: ଭାରତୀୟ ପାଣିପାଗ ବିଭାଗ (IMD) ଅନୁଯାୟୀ, ସୋମବାର ଉତ୍ତର ପ୍ରଦେଶର ବାନ୍ଦା ଏବଂ ବିଦର୍ଭର ବ୍ରହ୍ମପୁରୀରେ ତାପମାତ୍ରା ୪୭ଡିଗ୍ରୀରୁ ଅଧିକ ରହିଥିଲା। ଛତରପୁରର ଖଜୁରାହୋରେ ୪୭.୨ ଏବଂ ନୌଗାଓଁରେ ୪୬.୮ ତାପମାତ୍ରା ରେକର୍ଡ କରାଯାଇଛି। ଏହା ସହିତ ଏହି ଚାରୋଟି ସହର ଦେଶର ସବୁଠାରୁ ଉତ୍ତପ୍ତ ସହର ପାଲଟିଛନ୍ତି। ପ୍ରବଳ ଗ୍ରୀଷ୍ମ ପ୍ରବାହ ଯୋଗୁ ଉତ୍ତର ଏବଂ ପଶ୍ଚିମ ଭାରତର ରାଜ୍ୟଗୁଡ଼ିକରେ ସ୍କୁଲଗୁଡ଼ିକୁ ଛୁଟି ଘୋଷଣା କରାଯାଇଛି। ଅଫିସ ସମୟ ବଦଳାଇ ଦିଆଯାଇଛି। ସମର କ୍ୟାମ୍ପଗୁଡ଼ିକରେ ଆଉଟଡୋର ଆକ୍ଟିଭିଟି ବନ୍ଦ କରିଦିଆଯାଇଛି।
IMD ଅନୁଯାୟୀ, ମେ ୨୮ ରେ ଉତ୍ତର-ପଶ୍ଚିମ ଭାରତରେ ଏକ ନୂତନ ପଶ୍ଚିମା ଝଡ଼ ଆସିବାର ସମ୍ଭାବନା ରହିଛି। ଅନ୍ୟପଟେ ଦକ୍ଷିଣ-ପଶ୍ଚିମ ମୌସୁମୀ ବାୟୁ ଆଗାମୀ ୨-୩ ଦିନ ମଧ୍ୟରେ ଦକ୍ଷିଣ-ପଶ୍ଚିମ ଏବଂ ଦକ୍ଷିଣ-ପୂର୍ବର ଆଉ କିଛି ଅଞ୍ଚଳକୁ ଅଗ୍ରସର ହେବା ପାଇଁ ଅନୁକୂଳ ପରିସ୍ଥିତି ରହିଛି। କିନ୍ତୁ ମୌସୁମୀ ଗତ ୩ ଦିନ ହେବ କେରଳ ଉପକୂଳରୁ ୩୦-୩୫ କିଲୋମିଟର ଦୂରରେ ଅଟକି ରହିଛି। ଯଦିଓ କେରଳର ଉପକୂଳବର୍ତ୍ତୀ ଅଞ୍ଚଳ, ତାମିଲନାଡୁ ଏବଂ କର୍ନାଟକରେ ବର୍ଷା ହେଉଛି, ତଥାପି ମୌସୁମୀ ଆଗମନର ସମ୍ପୂର୍ଣ୍ଣ ସ୍ଥିତି ସୃଷ୍ଟି ହୋଇନାହିଁ।
IMD ଅନୁଯାୟୀ, ମଧ୍ୟ ଏବଂ ଉତ୍ତର-ପଶ୍ଚିମ ଭାରତରେ ଆଗାମୀ ୪-୫ ଦିନ ପର୍ଯ୍ୟନ୍ତ ପ୍ରବଳରୁ ଅତି ପ୍ରବଳ ଗ୍ରୀଷ୍ମ ପ୍ରବାହ (ଲୁ) ସ୍ଥିତି ଜାରି ରହିବାର ସମ୍ଭାବନା ଅଛି। ପୂର୍ବ ଏବଂ ତାହାକୁ ଲାଗି ରହିଥିବା ସଂଲଗ୍ନ ଦ୍ୱୀପପୁଞ୍ଜ ଭାରତରେ ଆଗାମୀ ୩-୪ ଦିନ ପର୍ଯ୍ୟନ୍ତ ଏଭଳି ସ୍ଥିତି ରହିବ। ମେ ୨୯ରୁ ମଧ୍ୟ ଏବଂ ତା’ ସହିତ ଜଡ଼ିତ ଉତ୍ତର, ପୂର୍ବ ଏବଂ ଉତ୍ତର-ପଶ୍ଚିମ ଭାରତରେ ସର୍ବୋଚ୍ଚ ତାପମାତ୍ରା ହ୍ରାସ ପାଇବା ସହ ଗ୍ରୀଷ୍ମ ପ୍ରବାହରୁ ଆଶ୍ୱସ୍ତି ମିଳିବାର ସମ୍ଭାବନା ରହିଛି। ଉତ୍ତର-ପୂର୍ବ ଭାରତରେ ଆଗାମୀ ୬-୭ ଦିନ ପର୍ଯ୍ୟନ୍ତ ଅଲଗା ଅଲଗା ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ଅଛି।
ଦିଲ୍ଲୀରେ ଗତକାଲି ରାତିର ଗରମ ୧୪ ବର୍ଷର ରେକର୍ଡ ଭାଙ୍ଗିଛି। ସୋମବାର ରାତିଟି ଗତ ୧୪ ବର୍ଷ ମଧ୍ୟରେ ମେ ମାସର ସବୁଠାରୁ ଗରମ ରାତି ଥିଲା। ଗତ ରାତିର ସର୍ବନିମ୍ନ ତାପମାତ୍ରା ସ୍ବାଭାବିକଠାରୁ ୫.୭ ଡିଗ୍ରୀ ଅଧିକ ଅର୍ଥାତ୍ ୩୨.୪ ଡିଗ୍ରୀ ରେକର୍ଡ କରାଯାଇଛି, ଯାହାକି ୨୬ ମେ ୨୦୧୨ରେ ୩୨.୫ ଡିଗ୍ରୀ ଥିଲା। ୪ ଦିନ ପୂର୍ବେ ମେ ୨୧ ରେ ମଧ୍ୟ ସର୍ବନିମ୍ନ ତାପମାତ୍ରା ୩୧.୯ ଡିଗ୍ରୀ ଥିଲା। ଏବେ ପାଣିପାଗ ବଦଳିପାରେ। ଆଜି ଆହୁରି ପ୍ରବଳ ଗ୍ରୀଷ୍ମ ପ୍ରବାହ ଏବଂ ରାତି ଗରମ ରହିବାର ସମ୍ଭାବନା ଅଛି। ଏହା ପରେ ମେ ୨୮ ରୁ ୩୧ ପର୍ଯ୍ୟନ୍ତ ବର୍ଷା ହୋଇପାରେ।
IMD ଅନୁଯାୟୀ, ମେ ୩୧ ପର୍ଯ୍ୟନ୍ତ ପଞ୍ଜାବ, ହରିୟାଣା, ଚଣ୍ଡିଗଡ଼, ଉତ୍ତର ପ୍ରଦେଶ, ରାଜସ୍ଥାନ, ମଧ୍ୟପ୍ରଦେଶ, ଛତିଶଗଡ଼, ଉପକୂଳ ଆନ୍ଧ୍ରପ୍ରଦେଶ, ୟାନମ, ତେଲଙ୍ଗାନା, ଓଡ଼ିଶା, ଝାଡ଼ଖଣ୍ଡ, ବିହାର, ଜମ୍ମୁ-କାଶ୍ମୀର, ହିମାଚଳ ପ୍ରଦେଶ, ଉତ୍ତରାଖଣ୍ଡ, ସୌରାଷ୍ଟ୍ର, କଚ୍ଛ, କୋଙ୍କଣ, ଗୋଆ, ଗାଙ୍ଗେୟ ପଶ୍ଚିମବଙ୍ଗ, ତାମିଲନାଡୁ, ପୁଡୁଚେରୀ ଏବଂ କରାଇକାଲରେ ରାତି ଗରମ ରହିବାର ସମ୍ଭାବନା ଅଛି। କେତେକ ସ୍ଥାନରେ ପ୍ରବଳ ଗ୍ରୀଷ୍ମ ପ୍ରବାହ ସହ ଗୁଳୁଗୁଳି ଜନିତ ଗରମ ଲୋକଙ୍କୁ ବେହାଲ କରିପାରେ।
