ଭୁବନେଶ୍ବର୨୬।୫(ପ୍ରସନଜିତ୍ ସାହୁ): ଚନ୍ଦକା ଥାନା ଅଞ୍ଚଳରେ ଏକ ଫାର୍ମ ହାଉସର ରୋଷେୟା ଏକ ପୋଷା ଡାଲ୍ମିଶନ କୁକୁରକୁ ଆକ୍ରମଣ ସହ ଅପ୍ରାକୃତ ସମ୍ପର୍କ ଉଦ୍ୟମ କରିଥିବା ନେଇ ଚନ୍ଦକା ଥାନାରେ ଅଭିଯୋଗ ହୋଇଛି। ସେ ହେଲେ ବାଲେଶ୍ବର ସୋର ଅଞ୍ଚଳର ଅନିଲ କୁମାର ମହାନ୍ତି। କୁକୁରର ସ୍ପାଇନାଲ କର୍ଡ ଓ ଆଖିରେ ଆଘାତ କାରଣରୁ ଚିକିତ୍ସା କରାଯାଉଛି । ଏହି ଘଟଣାରେ ପୋଲିସ ବିଏନ୍ଏସ୍ ଦଫା ୨୯୬, ୩୫୧(୨) ଓ ପଶୁ ସୁରକ୍ଷା ଆଇନ ଧାରା ୧୧ ଅନୁଯାୟୀ ଏକ ମାମଲା (ନଂ. ୨୯୬/୨୦୨୬) ରୁଜୁ କରି ଯୁବକଙ୍କୁ ଧରିବାକୁ ଚେଷ୍ଟା ଚଳାଇଛି।
ସୂଚନା ଅନୁସାରେ, ବାଲେଶ୍ବର ସୋର ଅଞ୍ଚଳର ଅନିଲ କୁମାର ମହାନ୍ତି ଚନ୍ଦକାର ଏକ ଫାର୍ମ ହାଉସରେ ରୋଷେୟା ଭାବରେ କାମ କରନ୍ତି। ଗତ ୧୫ତାରିଖ ରାତି ପ୍ରାୟ ୧୧ ଟାର ସେ ମଦ୍ୟପାନ କରି ଫାର୍ମ ହାଉସକୁ ଫେରିଥିଲେ। ଏହି ସମୟରେ ଗେଟ୍ ପାଖରେ ଥିବା ଏକ ପୋଷା ଡାଲ୍ମିଶନ କୁକୁରକୁ ସେ ଗୋଇଠା ମାରିଥିଲେ। ଆଘାତ ପରେ କୁକୁରଟି ଭୋକିବାରୁ ତାକୁ ସେ ଏକ ଘରେ ବନ୍ଦ କରି ନିସ୍ତୁକ ମାଡ଼ ମାରିବା ସହ ଅପ୍ରାକୃତ ସମ୍ପର୍କ ରଖିବାକୁ ଉଦ୍ୟମ କରି ଦ୍ୱିତୀୟ ମହଲା ବାଲ୍କୋନୀକୁ ଫୋପାଡି ଦେଇଥିଲେ।
ଫଳରେ କୁକୁରଟିର ଆଖି ଓ ସ୍ପାଇନାଲ କର୍ଡରେ ଶକ୍ତ ଆଘାତ ଲାଗିଥିଲା। ଏହି ଘଟଣା ଦେଖିଥିବା ସମସ୍ତ କର୍ମଚାରୀଙ୍କୁ ଅନିଲ ହତ୍ୟା ଧମକ ଦେବା ସହିତ କାହାକୁ ନ ଜଣାଇବାକୁ କହି ଫେରାର ହୋଇଯାଇଥିଲେ। ଗତ ୨୧ତାରିଖରେ ଏହି ଘଟଣା ସମ୍ପର୍କରେ ଜାଣିବା ପରେ ୨୪ ତାରିଖରେ ଚନ୍ଦକା ଥାନାରେ ଅଭିଯୋଗ ହୋଇଛି।
