ନୂଆଦିଲ୍ଲୀ,୨୬।୫: ଇତିମଧ୍ୟରେ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ମୂଲ୍ୟ ହ୍ରାସ ପାଇଛି। ଇରାନ ଏବଂ ଆମେରିକା ମଧ୍ୟରେ ଯୁଦ୍ଧ ବୁଝାମଣା ସହ ବହୁଚର୍ଚ୍ଚିିତ ହର୍ମୁଜ୍ ପ୍ରଣାଳୀକୁ ମୁକ୍ତ କରି ତୈଳ ଯୋଗାଣ ପ୍ରକ୍ରିୟାକୁ ତୁରନ୍ତ ସ୍ବାଭାବିକ କରିବା ଲାଗି ଆଲୋଚନା ଆରମ୍ଭ ହେବାର ସୂଚନା ମିଳିବା ପରେ ଅଶୋଧିତ ତୈଳ ମୂଲ୍ୟ ବ୍ୟାରେଲ ପିଛା ୧୦୦ ଡଲାର ତଳକୁ ଖସିଛି। ସୋମବାର ମଧ୍ୟାହ୍ନ ସୁଦ୍ଧା ବ୍ରେଣ୍ଟ୍କ୍ରୁଡ୍ ଏବଂ ଡବ୍ଲ୍ୟୁଟିଆଇ( ହ୍ବାଇଟ୍ ଇଣ୍ଟରମିଡିଏଟ୍ ଟେକ୍ସାସ୍) ମୂଲ୍ୟରେ ଅନୂ୍ୟନ ୬ ପ୍ରତିଶତ ହ୍ରାସ ଘଟି ଏଗୁଡିକର ମୂଲ୍ୟ ଯଥାକ୍ରମେ ୯୭.୭୦ ଏବଂ ୯୦.୮୦ ଡଲାର ରହିଛି।
ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ମୂଲ୍ୟ ୧୦୦ ଡଲାରରୁ କମ୍ ହେବା ନିଶ୍ଚିତ ଭାବେ ଏକ ବଡ଼ ଘଟଣା। କାରଣ ତୈଳ ମୂଲ୍ୟ ୧୦୦ ଡଲାର ଟପିଲେ ବଜାର ସ୍ଥିତି ଅସ୍ବାଭାବିକ ଦିଗକୁ ଗତି କରିଥାଏ। କିନ୍ତୁ ମୂଲ୍ୟ ୧୦୦ ଡଲାର ତଳକୁ ଖସିଲେ ବଜାର ସ୍ଥିତି ଅପେକ୍ଷାକୃତ ସ୍ବାଭାବିକ ରହିବା ସହ ପରୋକ୍ଷରେ ବୈଶ୍ୱିକ କାରବାର ଦିଗର ଅନେକ କ୍ଷେତ୍ରକୁ ସନ୍ତୁଳିତ କରିଥାଏ। କିନ୍ତୁ ଏବେ ଅନ୍ତର୍ଜାତୀୟ ବଜାରରେ ତୈଳ ମୂଲ୍ୟ ହ୍ରାସ ସତ୍ତ୍ୱେ ଭାରତରେ କାହିଁକି ପେଟ୍ରୋଲ ଓ ଡିଜେଲ ମୂଲ୍ୟ ବଢୁଛି ବୋଲି ସାଧାରଣରେ ପ୍ରଶ୍ନ ଉଠୁଛି। ସୋମବାର ପେଟ୍ରୋଲ ଏବଂ ଡିଜେଲ ମୂଲ୍ୟରେ ପୁଣି ବୃଦ୍ଧି କରାଯାଇଥିଲା ବେଳେ ମେ’ ୧୫ରୁ ୨୫ ମଧ୍ୟରେ ଉଭୟ ସାମଗ୍ରୀର ମୂଲ୍ୟ ୪ ଥର ବୃଦ୍ଧି କରାଯାଇ ଲିଟର ପିଛା ଅନୂ୍ୟନ ୭.୫୦ ଟଙ୍କା ବୃଦ୍ଧି କରାଯାଇଛି, ଯାହାକୁ ନେଇ ବର୍ତ୍ତମାନ ପେଟ୍ରୋଲ ଏବଂ ଡିଜେଲ ମୂଲ୍ୟ ୨୦୨୨ ମେ’ ପରେ ସର୍ବୋଚ୍ଚ ସ୍ତରରେ ପହଞ୍ଚିଛି। କିନ୍ତୁ ଏବେ ଅନ୍ତର୍ଜାତୀୟ ବଜାର ମୂଲ୍ୟ ହ୍ରାସ ପାଇଥିବାରୁ ଆଗକୁ ପେଟ୍ରୋଲ, ଡିଜେଲ ମୂଲ୍ୟ ହ୍ରାସ ପାଇବ ବୋଲି ଆଶା କରାଯାଉଥିଲେ ମଧ୍ୟ ଏହା ସମ୍ଭବ ନୁହେଁ ବୋଲି ବିଶେଷଜ୍ଞମାନେ କହିଛନ୍ତି। ବରଂ ମୂଲ୍ୟ ହ୍ରାସ ପାଇବା ବଦଳରେ ପୁଣି କିଛିଟା ବଢିବାର ସମ୍ଭାବନାକୁ ଏଡାଇ ଦିଆଯାଇ ପାରିବନି ବୋଲି ସେମାନେ କହିଛନ୍ତି।
ସେମାନେ କହିଛନ୍ତି, ଇରାନ-ଆମେରିକା ଯୁଦ୍ଧ ଆରମ୍ଭ ହେବା ପରେ ପ୍ରାୟ ୨ ମାସରୁ ଅଧିକ ସମୟ ଧରି ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ମୂଲ୍ୟ ବୃଦ୍ଧି ସହ ବ୍ୟାରେଲ ପିଛା ମୂଲ୍ୟ ୧୨୦ ଡଲାର ନିକଟବର୍ତ୍ତୀ ହୋଇଥିଲା, ଯାହାକୁ ନେଇ ରାଷ୍ଟ୍ରାୟତ୍ତ ତୈଳ କମ୍ପାନୀ ବିପୁଳ ମାତ୍ରାରେ କ୍ଷତିର ସମ୍ମୁଖୀନ ହୋଇଥିଲେ। ବର୍ତ୍ତମାନ ମୂଲ୍ୟ ହ୍ରାସ ପାଇଥିଲେ ମଧ୍ୟ ଏହି କ୍ଷତି ପୂରଣ କରିବାକୁ ତୈଳ କମ୍ପାନୀଗୁଡିକ ବର୍ଦ୍ଧିତ ମୂଲ୍ୟ ଜାରି ରଖିବେ। ପେଟ୍ରୋଲ ଏବଂ ଡିଜେଲ ମୂଲ୍ୟ ତୁରନ୍ତ ନ କମିବାର ଅନ୍ୟ ୨ଟି ମୁଖ୍ୟ କାରଣ ହେଲା ଡଲାର ତୁଳନାରେ ଭାରତୀୟ ଟଙ୍କାର ଅବମୂଲ୍ୟାୟନ ଏବଂ ଟିକସ ବ୍ୟବସ୍ଥା।
ବର୍ତ୍ତମାନ ଆମେରିକୀୟ ଡଲାର ତୁଳନାରେ ଟଙ୍କା ମୂଲ୍ୟର ସର୍ବାଧିକ ହ୍ରାସ ଘଟିବା ସହ ଆମଦାନୀ ଖର୍ଚ୍ଚ ବୃଦ୍ଧି ପାଉଥିବାରୁ ତୈଳ କମ୍ପାନୀ ସମୂହ ଘରୋଇ ବଜାରରେ ପେଟ୍ରୋଲ ଏବଂ ଡିଜେଲ ମୂଲ୍ୟରେ ତୁରନ୍ତ ହ୍ରାସ କରିବାକୁ ଆଗ୍ରହୀ ହେବେ ନାହିଁ। ଅନ୍ୟପକ୍ଷରେ କେନ୍ଦ୍ରୀୟ ଅବକାରୀ ଶୁଳ୍କ ସହ ରାଜ୍ୟ ଭାଟ୍ ଏବଂ ଅନ୍ୟାନ୍ୟ ଟିକସ ଖାଉଟି ସ୍ତରରେ ପେଟ୍ରୋଲ ଓ ଡିଜେଲ ମୂଲ୍ୟ ନିର୍ଦ୍ଧାରଣ କରୁଥିବାରୁ ଟିକସ ହ୍ରାସ ନ ହେଲେ ମୂଲ୍ୟ ହ୍ରାସ ପାଇବା ସହଜ ହେବ ନାହିଁ ବୋଲି ବିଶେଷଜ୍ଞମାନେ ମତ ଦେଇଛନ୍ତି।
