ପାଟନା,୨୯।୬: ଲୋକ ସଭା ନିର୍ବାଚନରେ ଶୋଚନୀୟ ପରାଜୟ ପରେ ନିଖୋଜ ହୋଇଯାଇଥିବା ରାଷ୍ଟ୍ରୀୟ ଜନତା ଦଳ(ଆର୍ଜେଡି)ର ନେତା ତେଜସ୍ବୀ ଯାଦବ ଏବେ ନିଜ ସ୍ଥାନକୁ ଫେରିଛନ୍ତି। ଏଥିସହ କାହିଁକି ସେ ଏତେ ଦିନ ନିଖୋଜ ହୋଇଯାଇଥିଲେ ତାର କାରଣ ସର୍ବସମ୍ମୁଖରେ ରଖିଛନ୍ତି। ତେବେ ଫେରିବା ପରେ ସେ ଏକ ଟୁଇଟ କରିଛନ୍ତି। ସେଥିରେ ସେ ଲେଖିଛନ୍ତି, ବନ୍ଧୁଗଣ, କିଛି ସପ୍ତାହରୁ ମୋର ଲିଗାମେଣ୍ଟ ଇନଜ୍ୟୁରି ଓ ଏସିଏଲ୍ ଇନଜ୍ୟୁରି ହୋଇଥିବାରୁ ଚିକିତ୍ସାରେ ମୁଁ ବ୍ୟସ୍ତ ଥିଲି। ହେଲେ ବିରୋଧୀ ଦଳ ଓ ଗଣମାଧ୍ୟମ ଏହାକୁ ଏକ ମସାଲାଦାର କାହାଣୀର ରୂପ ଦେଇଥିବା ଦେଖି ମୁଁ ବହୁତ ମଜା ନେଇଥିଲି ବୋଲି ତେଜସ୍ବୀ କହିଛନ୍ତି। ଯେଉଁମାନେ ଆମକୁ ସାମାଜିକ ନ୍ୟାୟର ବିକଳ୍ପ ଭାବୁଛନ୍ତି ସେମାନଙ୍କ ପାଇଁ ଆମେ ସବୁବେଳେ ଦାୟିତ୍ୱବାନ ହୋଇ ରହିଛୁ। ଏଠାରେ ଆମେ ଅଛୁ ଏବଂ ଲଢ଼େଇ ଜାରି ରଖିଛୁ ବୋଲି ସେ ଜନସାଧାରଣଙ୍କୁ ଆଶ୍ୱସ୍ତ କରିଛନ୍ତି। ପରାଜୟ ପଛର କାରଣ ଜାଣିବା ପାଇଁ ସେ ଅଲଗା ପ୍ରକ୍ରିୟା ଦ୍ୱାରା ଅଧ୍ୟୟନ କରିବା ସହ ଏହାର ବିଶ୍ଳେଷଣ ଓ ମୂଲ୍ୟାୟନ କରିଛନ୍ତି। ଅପରପକ୍ଷରେ ମସ୍ତିଷ୍କ ଜ୍ୱରରେ ହଠାତ୍ ଏତେ ସଂଖ୍ୟାରେ ହୋଇଥିବା ପିଲାଙ୍କ ମୃତ୍ୟୁକୁ ନେଇ ସେ ଦୁଃଖ ପ୍ରକାଶ କରିଛନ୍ତି। ଏହି ଦୁଃଖ ସମୟରେ ଆରଜେଡି କର୍ମକର୍ତ୍ତାଙ୍କୁ ଓ ନେତାଙ୍କୁ ପୀଡିତ ପରିବାରଙ୍କ ଘରକୁ ଯାଇ ବିନା ଫଟୋ ପ୍ରଦର୍ଶନ କରି ତାଙ୍କୁ ଭେଟିବାକୁ ସେ ନିର୍ଦ୍ଦେଶ ଦେଇଥିଲେ। ଏଥିସହ ଏମ୍ପିମାନେ ଏହି ମାମଲାକୁ ସଂସଦରେ ଉଠାଇବା ପାଇଁ ସେ ପ୍ରସ୍ତାବ ଦେଇଛନ୍ତି। ସୂଚନାଯୋଗ୍ୟ, ନିର୍ବାଚନ ଫଳାଫଳ ପରେ ତେଜସ୍ବୀ ଯାଦବଙ୍କ କିଛି ପତ୍ତା ମିଳି ନ ଥିଲା। ସେ ବହୁ ଦିନରୁ ନିଖୋଜ ହୋଇଯାଇଥିଲେ।
