ଭୁବନେଶ୍ୱର,୬।୯(ବ୍ୟୁରୋ): ରାଜ୍ୟ ସରକାର ସମ୍ବଲପୁରସ୍ଥିତ ବୀର ସୁରେନ୍ଦ୍ର ସାଏ ଇନଷ୍ଟିଚ୍ୟୁଟ ଅଫ ମେଡିକାଲ ସାଇନ୍ସ ଆଣ୍ଡ ରିସର୍ଚ୍ଚ(ଭିମସାର)ରେ ୧୦୦ ଶର୍ଯ୍ୟା ବିଶିଷ୍ଟ କୋଭିଡ ହସ୍ପିଟାଲ କରିବାକୁ ଘୋଷଣା କରିଛନ୍ତି। ସେଠାରେ ୨୦ଟି ଆଇସିୟୁ ମଧ୍ୟ ରହିବ। ଆସନ୍ତା ୧୦ ଦିନ ମଧ୍ୟରେ ଏହି ହସ୍ପିଟାଲ କାର୍ଯ୍ୟକ୍ଷମ ହେବ ବୋଲି ମୁଖ୍ୟ ଶାସନ ସଚିବ ଅସୀତ ତ୍ରିପାଠୀ କହିଛନ୍ତି। ମୁଖ୍ୟ ଶାସନ ସଚିବ ଏବଂ ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ଶନିବାର ଭୀମସାର ପରିଦର୍ଶନ କରି ସେଠକାର ପରିସ୍ଥିତିର ସମୀକ୍ଷା କରିଥିଲେ। ସେଠାରେ ଆଇସିୟୁକୁ ପରିଚାଳନା କରିବା ପାଇଁ ପର୍ଯ୍ୟାପ୍ତ ପରିମାଣର ଡାକ୍ତର ନାହାନ୍ତି। ସେଥିପାଇଁ ଆଉ ୧୦ ଜଣ ବରିଷ୍ଠ ଡାକ୍ତରଙ୍କୁ ସେଠାରେ ନିୟୋଜିତ କରାଯିବ ବୋଲି ମୁଖ୍ୟ ଶାସନ ସଚିବ କହିଛନ୍ତି। ଏଥିସହିତ ଜିଲା କୋଭିଡ ହସ୍ପିଟାଲ ପାଇଁ ଆଉଟସୋର୍ସରୁ ୨୦ ଜଣ ଆଟେଣ୍ଡାଣ୍ଟ ଓ ୩୦ ଜଣ ଏଏନଏମଙ୍କୁ ନିଯୁକ୍ତି ଦିଆଯିବ। ସମ୍ବଲପୁର ଜିଲାରେ କୋଭିଡ ସଂକ୍ରମିତଙ୍କ ଆରୋଗ୍ୟ ହାର ୭୭ ପ୍ରତିଶତ ରହିଛି। ୭୪ ପ୍ରତିଶତ ରୋଗୀ ହୋମ ଆଇସୋଲେଶନରେ ରହିଛନ୍ତି।
