ଭୋଗରାଇ, ୧୦।୧୧(ଡି.ଏନ.ଏ.)-ସାମୁଦ୍ରିକ ଝଡ଼ ‘ବୁଲ୍ବୁଲ୍’ ବାଲେଶ୍ୱର ଉପକୂଳରେ ତାଣ୍ଡବ ରଚିଛି। ଏହାର ପ୍ରଭାବରେ ଶନିବାର ସକାଳଠୁ ତୁହାକୁ ତୁହା ଅବିଶ୍ରାନ୍ତ ବର୍ଷା ସହ ବତାଶର ବେଗ ବଢ଼ିଛି। ଘଣ୍ଟାକୁ ୮୦ରୁ ୧୦୦ କି.ମି. ବେଗରେ ପବନ ବୋହିବାରୁ ବହୁ ନଡ଼ା ଛପର ଘର, ବଡ଼ ବଡ଼ ଗଛ ଭାଙ୍ଗି ଧରାଶାୟୀ ହୋଇଛି। ଉତ୍ତରବାଲେଶ୍ୱର ଭୋଗରାଇ, ଜଳେଶ୍ୱର, ବାଲିଆପାଳ, ବସ୍ତାରେ ‘ବୁଲ୍ବୁଲ୍’ର ପ୍ରଭାବରେ ଜନଜୀବନ ଅସ୍ତବ୍ୟସ୍ତ ହୋଇପଡିଛି। ବାଲେଶ୍ୱର ଉପକୂଳ ଉଦୟପୁରଠାରୁ ଗୋପାଳପୁର ପର୍ଯ୍ୟନ୍ତ ସମୁଦ୍ରର ଉଚ୍ଚ ଢେଉ କୂଳ ଆଡ଼କୁ ମାଡ଼ି ଆସି ସ୍ଥାନୀୟ ବାସିନ୍ଦାଙ୍କୁ ଭୟଭୀତ କରିଛି।
ଦୀଘା ସମୁଦ୍ରକୂଳରେ ତିନି ନମ୍ବର ବିପଦ ସଙ୍କେତ ଦିଆଯାଇଥିବା ବେଳେ ଉଦୟପୁର, ତାଳସାରୀ, କୀର୍ତ୍ତନିଆ, ଚୌମୁଖ, ଡଗରା, ବାହାବଳପୁର, କଷାଫଳ ଆଦି ସମୁଦ୍ରକୂଳରେ ଏନଡିଆର୍ଏଫ୍ ଓ ଓଡ୍ରାଫ ବାହିନୀ ସହ ସମସ୍ତ ମେରାଇନ ଥାନା ପୋଲିସ, ତହସିଲଦାର, ବିଡିଓ, ଜିଲା ପ୍ରଶାସନିକ ଅଧିକାରୀ ବାତ୍ୟା ମୁକାବିଲା ପାଇଁ ସ୍ଥିତି ଅନୁଧ୍ୟାନ କରୁଛନ୍ତି। ଅଶାନ୍ତ ସମୁଦ୍ରର ଢେଉ ୮ରୁ ୯ ଫୁଟ୍ ଉଚ୍ଚରେ ମାଡ଼ି ଆସି କୂଳରେ ମାଡ଼ କରିବାରୁ ସୁବର୍ଣ୍ଣଦୀପ, ଡଗରା ଆଦି ଝାଉଁ ଜଙ୍ଗଲ ଧରାଶାୟୀ ହୋଇଛି। ଘୂର୍ଣ୍ଣିଝଡ଼ରେ ଧାନଚାଷ, ରବି ଫସଲ କିଆରିରେ ବର୍ଷା ପାଣି ଲହଡ଼ି ଭାଙ୍ଗୁଥିବାରୁ ଚାଷୀକୁଳ ମୁଣ୍ଡରେ ହାତଦେଇ ବସିଛନ୍ତି। କୁସୁଡ଼ା ଗ୍ରାମର ସମିତିସଦସ୍ୟ ସତ୍ୟନାରାୟଣ ପାଣିଗ୍ରାହୀଙ୍କ ଆଜବେଷ୍ଟସ୍ ଘର ଉପରେ ବଡ଼ ତେନ୍ତୁଳିଗଛ ପଡ଼ିଯିବାରୁ ଘର ଭାଙ୍ଗି ଧରାଶାୟୀ ହୋଇଛି। ବହୁ ଗରିବ ଲୋକଙ୍କ ମାଟିକାନ୍ଥ, ନଡ଼ାଛପର ଘର ବତାଶ ଓ ବର୍ଷାରେ ଭାଙ୍ଗିଯିବାରୁ ସେମାନେ ବାସହରା ହୋଇଛନ୍ତି। ତାଳସାରୀ ନିକଟସ୍ଥ ହାସିମ୍ପୁର ବାତ୍ୟା ଆଶ୍ରୟସ୍ଥଳୀରେ ସୁବର୍ଣ୍ଣଦୀପରୁ ୧୫ଟି ପରିବାରର ୫୦ରୁ ଅଧିକ ଲୋକଙ୍କୁ ରଖାଯାଇ ମାଗଣା ଖାଦ୍ୟ ପ୍ରଶାସନ ପକ୍ଷରୁ ଦିଆଯାଉଛି। କୁସୁଡ଼ା ଗ୍ରାମ ମଧ୍ୟରେ ବହୁ ଘର ଭାଙ୍ଗିଯିବାରୁ ଗ୍ରାମବାସୀ ସ୍ଥାନୀୟ ସ୍କୁଲରେ ଆଶ୍ରୟ ନେଇଛନ୍ତି। ଶୁକ୍ରବାର ରାତି ୮ଟା ୩୦ମିନିଟ୍ ସମୟରୁ ବିଦ୍ୟୁତ୍ ସରବରାହ ବ୍ୟାହତ ହୋଇଛି। ଭୋଗରାଇ ବିଧାୟକ ଅନନ୍ତ ଦାସ, ବସ୍ତା ବିଧାୟକ ନିତ୍ୟାନନ୍ଦ ସାହୁ, ଜଳେଶ୍ୱର ବିଧାୟକ ଅଶ୍ୱିନୀ ପାତ୍ର ବାତ୍ୟା ପ୍ରଭାବିତ ଅଞ୍ଚଳକୁ ଯାଇ ସ୍ଥିତି ଅନୁଧ୍ୟାନ କରିଛନ୍ତି।
