ପାରଳାଖେମୁଣ୍ଡି, ୧୮।୦୫ (ଗିରିଧାରୀ ପରିଛା): ଗଜପତି ଜିଲାର କାଶୀନଗର ଥାନା ଅନ୍ତର୍ଗତ ସାରା ଗ୍ରାମର ୨୦୨୩ ମସିହାର ବହୁ ଚର୍ଚ୍ଚିତ ବିଭତ୍ସ ହତ୍ୟାକାଣ୍ଡ ମାମଲାର ଶୁଣାଣି କରି ସୋମବାର ମାନ୍ୟବର ଜିଲା ଦୌରା ଜଜ ଜଗଦୀଶ ପ୍ରସାଦ ମହାନ୍ତି ମୁଖ୍ୟ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି।
ମାମଲାରେ କାଶୀନଗର ଥାନା ଅନ୍ତର୍ଗତ ସାରା ଗ୍ରାମର ଚନ୍ଦ୍ରଶେଖର କାର୍ଜି ଓରଫ ମୁନା (୩୯)ଙ୍କୁ ଧାରା ୩୦୨ ଅନୁଯାୟୀ ଦୋଷୀ ସାବ୍ୟସ୍ତ କରି ଆଜୀବନ କାରାଦଣ୍ଡ ସହ ୧୫ ହଜାର ଟଙ୍କା ଜରିମାନା ଶୁଣାଯାଇଛି। ସେହିପରି ପ୍ରମାଣ ନଷ୍ଟ କରିବା ଅପରାଧରେ ଧାରା ୨୦୧ ଅନୁଯାୟୀ ଦୁଇ ବର୍ଷର ସଶ୍ରମ କାରାଦଣ୍ଡ ସହ ୫ ହଜାର ଟଙ୍କା ଜରିମାନା ନିଦ୍ଦେର୍ଶ ମଧ୍ୟ ଦିଆଯାଇଛି। ଜରିମାନା ଅଦାୟ ନ ହେଲେ ଅତିରିକ୍ତ ଦୁଇ ମାସ କାରାଦଣ୍ଡ ଭୋଗିବାକୁ ପଡିବ ବୋଲି ନ୍ୟାୟାଧୀଶ ରାୟରେ ଉଲ୍ଲେଖ କରିଛନ୍ତି।
ସରକାର ପକ୍ଷରୁ ଭାରପ୍ରାପ୍ତ କ୍ୟାଡର ପବ୍ଲିକ ପ୍ରସିକ୍ୟୁଟର ରାଜେଶ କୁମାର ମିଶ୍ର ମାମଲାଟିର ପରିଚାଳନା କରିଥିଲେ। ତାଙ୍କୁ ଅତିରିକ୍ତ ପବ୍ଲିକ ପ୍ରସିକ୍ୟୁଟର ଏମ୍. ଲୋକନାଦମ ଓ ଗୌରହରି କରସୁଧା ପଟ୍ଟନାୟକ ସହଯୋଗ କରିଥିଲେ।
ସୂଚନାଯୋଗ୍ୟ ଯେ, ୨୦୨୩ ମେ ୨୫ ତାରିଖରେ ଏତଲାକାରୀ ଯୁବରାଜ ସାହୁ (୬୦) ନିଜ ଜମିକୁ ଯାଇଥିବା ବେଳେ ତାଙ୍କ ଝିଅ ଲାବନ୍ୟା ଘର ଆଗରେ ବସିଥିଲେ। ସେତେବେଳେ ଅଭିଯୁକ୍ତ ଚନ୍ଦ୍ରଶେଖର କାର୍ଜି ଗୋଟିଏ ବ୍ୟାଗ ଆଣି ଲାବନ୍ୟାଙ୍କ ସମ୍ମୁଖରେ ରଖି ବ୍ୟାଗ ଖୋଲିବାକୁ କହିଥିଲେ। ବ୍ୟାଗ ଖୋଲିବା ପରେ ସେଥିରେ ଗୋଟିଏ କଟା ମୁଣ୍ଡ ଦେଖି ଲାବନ୍ୟା ଭୟଭୀତ ହୋଇ ପଡ଼ିଥିଲେ। ପରେ ଜଣାପଡ଼ିଥିଲା ଯେ ସେହି କଟା ମୁଣ୍ଡଟି ଅଭିଯୁକ୍ତଙ୍କ ସ୍ତ୍ରୀ ଉର୍ମିଳା କାର୍ଜିଙ୍କର ଥିଲା।
ଏହାପରେ ଲାବନ୍ୟା ଚିତ୍କାର କରିବାରୁ ଗ୍ରାମବାସୀମାନେ ଏକାଠି ହୋଇ ଅଭିଯୁକ୍ତଙ୍କୁ ଧରି ପୋଲିସକୁ ହସ୍ତାନ୍ତର କରିଥିଲେ। ଅଭିଯୁକ୍ତ ହତ୍ୟାରେ ବ୍ୟବହୃତ ଟାଙ୍ଗିଆ ଓ ବ୍ୟାଗକୁ ଲୁଚାଇ ଦେଇଥିବା ବେଳେ ପରେ ପୋଲିସ ହେପାଜତରେ ଦୋଷ ସ୍ୱୀକାର କରି ଲୁଚାଇଥିବା ରକ୍ତଲଗା ଟାଙ୍ଗିଆକୁ ଦେଖାଇଥିଲେ।
ପୋଲିସ କାଶୀନଗର ଥାନାରେ ମାମଲା ନମ୍ବର ୬୦/୨୩ ରୁଜୁ କରି ତଦନ୍ତ ଆରମ୍ଭ କରିଥିଲା। ତତ୍କାଳୀନ ସବ୍-ଇନ୍ସପେକ୍ଟର ସିନ୍ଧୁ ସାରକା ମାମଲାର ତଦନ୍ତ କରି ଅଭିଯୁକ୍ତଙ୍କୁ କୋର୍ଟକୁ ଚାଲାଣ କରିଥିଲେ।
ଏହି ମାମଲାରେ ୨୦ ଜଣ ସାକ୍ଷୀଙ୍କ ବଳିଷ୍ଠ ସାକ୍ଷ୍ୟ ଓ ଦଲିଲପତ୍ରକୁ ଆଧାର କରି ନ୍ୟାୟାଳୟ ଏହି ରାୟ ଦେଇଛନ୍ତି। ଅନ୍ୟ ଜଣେ ଅଭିଯୁକ୍ତଙ୍କ ଶୁଣାଣି ସମୟରେ ମୃତ୍ୟୁ ହୋଇଥିବାରୁ କେବଳ ମୁଖ୍ୟ ଅଭିଯୁକ୍ତଙ୍କୁ ଏହି ସଜା ଦିଆଯାଇଛି।
ସ୍ତ୍ରୀଙ୍କ ଚରିତ୍ର ଉପରେ ସନ୍ଦେହ କରି ଏପରି ଭୟାବହ କାଣ୍ଡ ଘଟାଇଥିବା କଥା ଅଭିଯୁକ୍ତ ଗ୍ରାମବାସୀଙ୍କ ସମ୍ମୁଖରେ ମାନିଥିଲେ। ତତ୍କାଳୀନ ସବ୍-ଇନ୍ସପେକ୍ଟର ସିନ୍ଧୁ ସାରକା ଉକ୍ତ ମାମଲାର ତଦନ୍ତ କରି ଅଭିଯୁକ୍ତଙ୍କୁ କୋର୍ଟକୁ ଚାଲାଣ କରିଥିଲେ।
ଆଜି ୨୦ ଜଣ ବଳିଷ୍ଠ ସାକ୍ଷୀଙ୍କ ସାକ୍ଷ୍ୟ ଓ ଦସ୍ତାବିଜକୁ ଆଧାର କରି ଜିଲ୍ଲା ଦୌରା ଜଜ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡର ସଜା ଶୁଣାଇଛନ୍ତି।
ମାମଲାର ଅନ୍ୟ ଜଣେ ଅଭିଯୁକ୍ତଙ୍କ ଶୁଣାଣି ସମୟରେ ମୃତ୍ୟୁ ଘଟିଥିବାରୁ କେବଳ ମୁଖ୍ୟ ଅଭିଯୁକ୍ତଙ୍କୁ ଏହି ସଜା ଦିଆଯାଇଛି।
