ହାଟଡିହୀ/ଛେନାପଦୀ, ୧୮/୫ (ଶୁଭକାନ୍ତ ନାୟକ/ନିରାକାର ପରିଡ଼ା): କେନ୍ଦୁଝର ଜିଲାରେ ବାଲି ବ୍ୟବସାୟୀ ଓ ମାଫିଆଙ୍କ ବିରୋଧରେ ପୋଲିସ ପକ୍ଷରୁ ବଡ଼ ଧରଣର ଚଢ଼ାଉ କରାଯାଇଛି। ଜିଲା ଏସ୍ପି ନୀତିନ କୁଶଲକର ଦାଗୁଡଙ୍କ ନିର୍ଦ୍ଦେଶରେ ଏକାଧିକ ପୋଲିସ ଟିମ୍ ଗଠନ କରି ଏହି କାର୍ଯ୍ୟାନୁଷ୍ଠାନ ନିଆଯାଇଛି।
ଆନନ୍ଦପୁର ଉପଖଣ୍ଡର ୧୧ଟି ସ୍ଥାନ ଓ ଘଟଗାଁ ଅଞ୍ଚଳର ଗୋଟିଏ ସ୍ଥାନ ସହ ମୋଟ ୧୨ଟି ସ୍ଥାନରେ ସୋମବାର ସକାଳୁ ବାଲି ବ୍ୟବସାୟୀ ଓ ମାଫିଆଙ୍କ ଘରେ ଚଢ଼ାଉ କରାଯାଇଛି। ଅତିରିକ୍ତ ଏସ୍ପି ସ୍ନେହାଶିଷ ସାହୁଙ୍କ ସୂଚନାନୁସାରେ ଚଢ଼ାଉ ଏବେ ମଧ୍ୟ ଜାରି ରହିଛି।
ଏଯାବତ୍ ୧୨ଟି ସ୍ଥାନରେ ଚଢ଼ାଉ କରାଯାଇଥିବାବେଳେ ମୋଟ ୧୧ ଜଣଙ୍କୁ ଗିରଫ ରଖାଯାଇଛି। ହାଇୱା, ପିକଅପ୍, ଟ୍ରାକ୍ଟର ଓ ଦାମୀ ଚାରିଚକିଆ ଗାଡି ମିଶି ପ୍ରାୟ ୫୦ଟି ଗାଡି ଜବତ ହୋଇଛି। ଏହା ସହିତ ପ୍ରାୟ ୮୦ ଲକ୍ଷ ଟଙ୍କାର ୮୦ଟି ବ୍ୟାଙ୍କ ଆକାଉଣ୍ଟ, ନଗଦ ୨୮ ଲକ୍ଷ ଟଙ୍କା ଏବଂ ବିପୁଳ ପରିମାଣର ସୁନା-ରୁପା ଅଳଙ୍କାର ମଧ୍ୟ ଜବତ କରାଯାଇଛି।
ଏଥିସହ ବାଲି ଚାଲାଣ ସମ୍ବନ୍ଧୀୟ ନକଲି କାଗଜପତ୍ର ମଧ୍ୟ ପୋଲିସ ଜବତ କରିଛି। ଆୟ ବର୍ହିଭୂତ ସମ୍ପତ୍ତି ସଂଗ୍ରହ ଅଭିଯୋଗରେ ଏହି ଚଢ଼ାଉ କରାଯାଇଥିବା ସୂଚନା ମିଳିଛି।
ଆନନ୍ଦପୁର ଡିଏସ୍ପି କମଲ କୁମାର ପଣ୍ଡା କହିଛନ୍ତି ଯେ, ସ୍ପେଶାଲ ସ୍କୱାଡ୍, ଉପଖଣ୍ଡ ଅଧୀନ ବିଭିନ୍ନ ଥାନାର ଅଧିକାରୀ ଓ ଅନ୍ୟାନ୍ୟ ପୋଲିସ କର୍ମଚାରୀଙ୍କ ସମ୍ମିଳିତ ଅଭିଯାନରେ ଏହି ଚଢ଼ାଉ କରାଯାଇଛି।
ହାଟଡିହୀ ବ୍ଲକ ଉପାଧ୍ୟକ୍ଷ ରତିକାନ୍ତ ରାଉତ ସହ ଶାଳନିଆଁର ଗୁରୁବ୍ରତ ଖଣ୍ଡାୟୀ, ବୀରଗୋବିନ୍ଦପୁରର ଅଜିତ ପୃଷ୍ଟି ଓ ସୌମ୍ୟରଂଜନ ମହାପାତ୍ର, ହାଟଡିହୀର ବାପି ନାୟକ, ଏଲକଣିଆର ଯୋଗେନ୍ଦ୍ର ବେହେରା, ଆନନ୍ଦପୁରର ମିକୁଲ ଦାସ, ଧକୋଠାର ଉଦର ସାହୁ, ଶାନ୍ତନୁ ନାୟକ, ଅମାରଙ୍ଗର ସନ୍ତୋଷ ନାୟକ ଓ ଘଟଗାଁର ଜିତେନ୍ଦ୍ର ସାଙ୍କ ଘରେ ଚଢ଼ାଉ ହୋଇଥିଲା।
ଏବେ ପର୍ଯ୍ୟନ୍ତ ଯାଞ୍ଚ ପ୍ରକ୍ରିୟା ଜାରି ରହିଛି। ସମ୍ପୂର୍ଣ୍ଣ ତଦନ୍ତ ସରିବା ପରେ ଘଟଣାର ବିସ୍ତୃତ ତଥ୍ୟ ପ୍ରକାଶ ପାଇବ ବୋଲି ପୋଲିସ ପକ୍ଷରୁ ସୂଚନା ମିଳିଛି।
