ଅଷ୍ଟ୍ରେଲିଆର ଜଣେ ୨୭ ବର୍ଷୀୟ ଯୁବକ ଏକ ସଡ଼କ ଦୁର୍ଘଟଣାରେ କୋମାକୁ ଚାଲିଯାଇଥିଲେ। ଯେତେବେଳେ କୋମାରୁ ବାହାରିଲେ ସେତେବେଳେ ନିଜର ମୂଳଭାଷା ପରିବର୍ତ୍ତେ ଅଲଗା ଦେଶର ଭାଷା କହିବାକୁ ଲାଗିଲେ। ଯାହା ଶୁଣି ଲୋକେ ଆଶ୍ଚର୍ଯ୍ୟ ହୋଇଯାଇଛନ୍ତି। ଏକ ରିପୋର୍ଟରୁ ପ୍ରକାଶ, ମେଲବର୍ଣ୍ଣ ନିବାସୀ ବେନ୍ ମକ୍ମୋହନ ୨୦୧୩ରେ ଏକ କାର୍ ଦୁର୍ଘଟଣାରେ ଗୁରୁତର ହୋଇଥିଲେ। ଦୁର୍ଘଟଣା ପରେ ବେନ୍ କୋମାକୁ ଚାଲିଯାଇଥିଲେ। ତାଙ୍କର ମସ୍ତିଷ୍କ କିଛି କାମ କରୁ ନ ଥିଲା। ଗୋଟିଏ ସପ୍ତାହ କୋମାରେ ରହିବା ପରେ ଇଂରାଜୀ ବଦଳରେ ଚାଇନାର ମଣ୍ଡାରିନ୍ ଭାଷା କହିଲେ। ତାଙ୍କର ଏପରି କହିବା ଦେଖି ପରିବାର ଲୋକେ ଚକିତ ହୋଇପଡ଼ିଲେ। ବିଶେଷଜ୍ଞଙ୍କ କହିବା ଅନୁସାରେ, ଦୁର୍ଘଟଣା ପରେ ମସ୍ତିଷ୍କ ସଞ୍ଚାଳନରେ ପରିବର୍ତ୍ତନ ଘଟିଥିଲା। ତେଣୁ ଇଂରାଜୀ କହିବା କ୍ଷମତା ସେ ହରାଇ ବସିଥିଲେ। ଏକ କାର୍ଯ୍ୟକ୍ରମରେ ବେନ୍ ଥରେ ଚାଇନା ଯାଇଥିଲେ। ସେଠାରେ ସେ ମଣ୍ଡାରିନ୍ ଭାଷା ଶିଖିଥିଲେ। ଦୁର୍ଘଟଣା ପରେ ଇଂରାଜୀ ପରିବର୍ତ୍ତେ ଚାଇନା ଭାଷା କହିଥିଲେ।
