କେସିଙ୍ଗା,୨୩।୫(ତୁମେଶ୍ୱର ସାହୁ): କଳାହାଣ୍ଡି ଜିଲାବାସୀଙ୍କ ପାଇଁ ଏକ ବଡ଼ ଖୁସିର ଖବର। ଜିଲାର ଏକମାତ୍ର ବିମାନବନ୍ଦର ଉତ୍କେଲା ବିମାନ ବନ୍ଦରରୁ ରାଜଧାନୀ ଭୁବନେଶ୍ୱରକୁ ପ୍ରତିଦିନ ବିମାନ ଉଡ଼ିବ। ଯାତ୍ରୀଙ୍କ ସୁବିଧା ପାଇଁ ଦିନକୁ ଦୁଇ ଦୁଇ ଥର ଏହି ସେବା ଯୋଗାଇ ଦିଆଯିବ ବୋଲି ବିମାନ କମ୍ପାନୀ ‘ଇଣ୍ଡିଆ ଏୟାରୱାନ’ ପକ୍ଷରୁ ସୂଚନା ମିଳିଛି। ଚଳିତ ମେ’ ୨୫ ତାରିଖରୁ ଏହି ସବୁଦିନିଆ ବିମାନ ସେବା ଆରମ୍ଭ ହେବାକୁ ଯାଉଛି।
ଏହି ସୂଚନା ମିଳିବା ପରେ ସମଗ୍ର କଳାହାଣ୍ଡି, ବଲାଙ୍ଗିର ଓ ନୂଆପଡ଼ା ଜିଲ୍ଲାର ଜନସାଧାରଣଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି। ବିଶେଷ କରି ମେଡ଼ିକାଲ, ଜରୁରୀକାଳୀନ ପରିସ୍ଥିତି ଏବଂ ସରକାରୀ ବା ଅଫିସିଆଲ କାମରେ ଯାଉଥିବା ଲୋକମାନେ ଏହା ଦ୍ୱାରା ବେଶ ଉପକୃତ ହେବେ ବୋଲି କୁହାଯାଉଛି।
ପୂର୍ବରୁ ଟିଟିଲାଗଡ଼ରୁ ଟ୍ରେନ ଯୋଗେ ଭୁବନେଶ୍ୱର ଯିବା ପାଇଁ ପ୍ରାୟ ୧୨ ଘଣ୍ଟା ସମୟ ଲାଗୁଥିବା ବେଳେ, ଏବେ ବିମାନ ସାହାଯ୍ୟରେ ଉତ୍କେଲାରୁ ମାତ୍ର ୧ ଘଣ୍ଟା ୧୦ ମିନିଟରେ ଭୁବନେଶ୍ୱର ପହଞ୍ଚି ହେବ। ଏହି ଯାତ୍ରା ପାଇଁ ଟିକେଟ ମୂଲ୍ୟ ୩,୨୮୭ ଟଙ୍କା ରଖାଯାଇଛି।
ଇଣ୍ଡିଆ ଏୟାରୱାନ ପକ୍ଷରୁ ଜାରି ହୋଇଥିବା ସୂଚନା ଅନୁଯାୟୀ ପ୍ରଥମ ପର୍ଯ୍ୟାୟ ଉଡ଼ାଣ ବିମାନ ଭୁବନେଶ୍ୱରରୁ ସକାଳ ୫.୫୦ ରେ ବାହାରି ସକାଳ ୭ଟାରେ ଉତ୍କେଲାରେ ପହଞ୍ଚିବ। ସେହିଭଳି ଉତ୍କେଲାରୁ ଉକ୍ତ ବିମାନ ସକାଳ ୭.୧୫ ରେ ବାହାରି ଭୁବନେଶ୍ୱରରେ ସକାଳ ୮.୨୦ ରେ ପହଞ୍ଚିବ।
ସେହିଭଳି ଦ୍ୱିତୀୟ ପର୍ଯ୍ୟାୟରେ ବିମାନ ଦିନ ୧୧.୨୦ରେ ଭୁବନେଶ୍ୱରରୁ ବାହାରି ମଧ୍ୟାହ୍ନ ୧୨.୩୦ ଉତ୍କେଲାରେ ପହଞ୍ଚିବ। ଉକ୍ତ ବିମାନ ମଧ୍ୟାହ୍ନ ୧୨.୪୫ ରେ ଉତ୍କେଲାରୁ ବାହାରି ଦିବା ୧.୫୫ ରେ ଭୁବନେଶ୍ୱରରେ ପହଞ୍ଚିବ।
ସୂଚନାଯୋଗ୍ୟ ଯେ, ପ୍ରଥମେ ଉତ୍କେଲାରୁ ସପ୍ତାହକୁ ମାତ୍ର ଦୁଇ ଦିନ ବିମାନ ଚଳାଚଳ କରୁଥିଲା, ଯାହା ପରବର୍ତ୍ତୀ ସମୟରେ ୬ ଦିନକୁ ବୃଦ୍ଧି ପାଇଥିଲା। ଏବେ ଏହାକୁ ସବୁଦିନିଆ ଏବଂ ଦୈନିକ ଦୁଇଥର କରାଯିବା ନିଶ୍ଚିତ ଭାବେ ଅଞ୍ଚଳର ବିକାଶ ଓ ଯୋଗାଯୋଗ କ୍ଷେତ୍ରରେ ଏକ ବଡ଼ ସଫଳତା।
