ଥୁଆମୂଳ ରାମପୁର,୨୩ା୫(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ଅନ୍ତର୍ଗତ ନାକୁରୁଣ୍ଡି ପଞ୍ଚାୟତରେ କାଳବୈଶାଖୀ ଜନିତ ବ୍ୟାପକ କ୍ଷୟକ୍ଷତି ପରେ ପ୍ରଭାବିତ ଅଞ୍ଚଳରେ ଶନିବାର ବିଜେଡିର ଏକ ପ୍ରତିନିଧି ଦଳ ପହଞ୍ଚି ସ୍ଥିତି ସମୀକ୍ଷା କରିଛନ୍ତି। ବ୍ଲକ ବିଜେଡି ଟିମ୍ ସର୍ବସ୍ବ ହରାଇଥିବା ବିପନ୍ନ ପରିବାରଗୁଡ଼ିକୁ ସାକ୍ଷାତ କରି ସେମାନଙ୍କ ଦୁଃଖ ବୁଝିବା ସହ ତୁରନ୍ତ ସରକାରୀ ସହାୟତା ଯୋଗାଇ ଦେବା ପାଇଁ ପ୍ରତିଶ୍ରୁତି ଦେଇଛନ୍ତି।
ପ୍ରଳୟଙ୍କରୀ କାଳବୈଶାଖୀ ପବନରେ ନାକୁରୁଣ୍ଡି ପଞ୍ଚାୟତର ଟୁରି ଭେଜିଗୁଡା ଏବଂ ଝୁଡୁଙ୍ଗିଜୋର୍ ଗ୍ରାମର ଅନେକ ଗରିବ ପରିବାରର ଘରଦ୍ୱାର ଭାଙ୍ଗି ଯାଇଥିବା ବେଳେ ଖାଦ୍ୟସାମଗ୍ରୀ ନଷ୍ଟ ହୋଇଯାଇଛି। ଖବର ପାଇ ବିଜେଡି ବ୍ଲକ ସଭାପତି କପିଳାସ ନାଏକଙ୍କ ନେତୃତ୍ୱରେ ଏକ ସ୍ବତନ୍ତ୍ର ଟିମ ବିପନ୍ନ ଅଞ୍ଚଳ ପରିଦର୍ଶନ କରିଥିଲେ। ଏହି ପ୍ରତିନିଧି ଦଳରେ ଜିଲା ବିଜେଡି ସମ୍ପାଦକ ଗୋବିନ୍ଦ ଚନ୍ଦ୍ର ପ୍ରଧାନି, ପଞ୍ଚାୟତ ବିଜେଡି ସଭାପତି ରାମଚନ୍ଦ୍ର ନାଏକ ଏବଂ ପୂର୍ବତନ ସମିତି ସଭ୍ୟସାନୁ ମାଝୀ ପ୍ରମୁଖ ସାମିଲ ଥିଲେ। ନେତୃବୃନ୍ଦ ପ୍ରତ୍ୟେକ କ୍ଷତିଗ୍ରସ୍ତ ପରିବାର ନିକଟକୁ ଯାଇ ସେମାନଙ୍କୁ ସାନ୍ତ୍ୱନା ଦେବା ସହ ତତ୍କାଳୀନ ସାହାଯ୍ୟ ସ୍ବରୂପ ବ୍ୟକ୍ତିଗତ ପାଣ୍ଠିରୁ ପ୍ରତି ପରିବାରକୁ ନଗଦ ୧,୦୦୦ ଟଙ୍କା ଲେଖାଏ ଆର୍ଥିକ ସହାୟତା ପ୍ରଦାନ କରିଥିଲେ।
କାଳବୈଶାଖୀର ଏହି ତାଣ୍ଡବ ଯୋଗୁ ଲୋକେ ବାସହୀନ ହୋଇ ଖୋଲା ଆକାଶ ତଳେ ରହିଥିବାରୁ ବିଜେଡି ନେତୃବୃନ୍ଦ ଗଭୀର ଚିନ୍ତା ପ୍ରକଟ କରିଛନ୍ତି। ଏ ସମ୍ପର୍କରେ ଟିମ୍ ପକ୍ଷରୁ ସ୍ଥାନୀୟ ତହସିଲଦାର ଏବଂ ସମ୍ପୃକ୍ତ ରାଜସ୍ବ ନିରୀକ୍ଷକ (RI)ଙ୍କ ସହ ଆଲୋଚନା କରାଯାଇଛି। ବିପନ୍ନ ଅଞ୍ଚଳରେ ତୁରନ୍ତ ସରକାରୀ ସ୍ତରରେ ଯୁଦ୍ଧକାଳୀନ ଭିତ୍ତିରେ କ୍ଷୟକ୍ଷତିର ଆକଳନ (Assessment) କରାଯାଇ ରିପୋର୍ଟ ପ୍ରସ୍ତୁତ କରିବାକୁ ସେମାନେ ପ୍ରଶାସନ ନିକଟରେ ଦାବି କରିଛନ୍ତି। ଏଥିସହ ପ୍ରଭାବିତ ପରିବାରଗୁଡ଼ିକୁ ଯଥାଶୀଘ୍ର ସରକାରୀ ଗୃହ ନିର୍ମାଣ ସହାୟତା, ପଲିଥିନ ଏବଂ ଅନ୍ୟାନ୍ୟ ସାମଗ୍ରୀ ଯୋଗାଇ ଦେବା ପାଇଁ ପ୍ରଶାସନିକ ସ୍ତରରେ ଦୃଢ଼ ପଦକ୍ଷେପ ନେବାକୁ ନେତୃବୃନ୍ଦ ପ୍ରତିଶ୍ରୁତି ଦେଇଛନ୍ତି। ପ୍ରଶାସନ ପକ୍ଷରୁ ତୁରନ୍ତ ସହାୟତା ପ୍ରଦାନ କରା ନ ଗଲେ ଆଗାମୀ ଦିନରେ ବ୍ଲକ ଟିମ୍ ଏନେଇ ଉଚ୍ଚପଦସ୍ଥ ଅଧିକାରୀଙ୍କ ଦ୍ୱାରସ୍ଥ ହେବେ ବୋଲି ସୂଚନା ମିଳିଛି।
