ବୟସର ଅପରାହ୍ନରେ ଏକୁଟିଆ ରହୁଥିବା ବରିଷ୍ଠ ନାଗରିକଙ୍କୁ ସେମାନଙ୍କ ସାଥୀ ଯୋଗାଡ଼ କରିବାରେ ଏକ ନିଆରା ଅଭିଯାନ ଚଳାଇଛନ୍ତି ପୁଣେର ମାଧବ ଡାମ୍ଲେ। ଏଥିପାଇଁ ସେ ‘ହାପି ସିନିୟର୍ସ’ ଅଭିଯାନ ଆରମ୍ଭ କରିଛନ୍ତି। ଏହା ମାଧ୍ୟମରେ ଏବେ ସେ ୭୫ ଜଣ ବରିଷ୍ଠ ନାଗରିକଙ୍କ ପାଇଁ ସାଥୀ ଯୋଗାଡ଼ କରି ସେମାନଙ୍କୁ ଲିଭ୍-ଇନ୍ ରିଲେଶନଶିପ୍ରେ ରହିବାର ସୁବିଧା କରିଛନ୍ତି। ପରିଣତ ସମୟରେ ପରସ୍ପରକୁ ସହଯୋଗ କରିବା ଏବଂ ଏକ ସୁଖଦ ଜୀବନ ବିତାଇବା ଉଦ୍ଦେଶ୍ୟରେ ମାଧବ ଏହି କାର୍ଯ୍ୟ ଜାରି ରଖିଛନ୍ତି। ବିଭିନ୍ନ ବୃଦ୍ଧାଶ୍ରମରେ ଅନ୍ତେବାସୀମାନେ ସେମାନଙ୍କ ପ୍ରେମମୟ ଜୀବନକୁ ପୁଣି ଫେରିପାଇବା ଲାଗି ସେ ୨୦୧୨ରେ ହାପି ସିନିୟର୍ସ ଆରମ୍ଭ କରିଥିଲେ। ଏଥିରେ ପ୍ରତିମାସରେ ୨୦ ଜଣ ସଦସ୍ୟ ଯୋଗ ଦେଇ ସେମାନଙ୍କ ଏକୁଟିଆ ଜୀବନର ସମାଧାନ ପାଇଁ ଚେଷ୍ଟା କରୁଛନ୍ତି। ମାଧବ କହନ୍ତି, ପୁନଃବିବାହ ସମାଧାନର ପଥ ନୁହେଁ, ବରଂ ସହଯୋଗଭିତ୍ତିକ ସାଥୀ ଜୀବନ ଗୁରୁତ୍ୱପୂର୍ଣ୍ଣ। ମାଧବ ବି ଏକ ବୃଦ୍ଧାଶ୍ରମ ଚଳାଉଛନ୍ତି।
