ଭୁବନେଶ୍ୱର,୭।୧୨ରିଲାଏନ୍ସ ଫାଉଣ୍ଡେଶନର ପ୍ରତିଷ୍ଠାତା ତଥା ଅଧ୍ୟକ୍ଷା ନୀତା ଏମ୍. ଅମ୍ବାନୀଙ୍କୁ ନିକଟରେ ସ୍ପୋଟର୍ସ ଲିଡର ଅଫ୍ ଦି ଇୟର (ମହିଳା) ଆଓ୍ବାର୍ଡ (ପୁରସ୍କାର)ରେ
ସମ୍ମାନିତ କରାଯାଇଛି। ବିଶେଷକରି କ୍ରୀଡ଼ା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ନୀତାଙ୍କୁ ଉପରୋକ୍ତ ଆଓ୍ବାର୍ଡ ଦିଆଯାଇଛି। ଉଲ୍ଲେଖଯୋଗ୍ୟ, ନୂଆଦିଲ୍ଲୀଠାରେ ଆୟୋଜିତ ସିଆଇଆଇ ସ୍କୋରକାର୍ଡ଼-୨୦୨୩ ସମ୍ମାନ ସମାରୋହରେ ନୀତାଙ୍କୁ ସମ୍ମାନିତ ଓ ପୁରସ୍କୃତ କରାଯାଇଥିଲାବେଳେ କ୍ରୀଡ଼ା କ୍ଷେତ୍ରରେ ଉତ୍କର୍ଷର ମାନକ ସ୍ଥାପନ କରିଥିବାରୁ ରିଲାଏନ୍ସ ଫାଉଣ୍ଡେଶନକୁ ମଧ୍ୟ କର୍ପୋରେଟ ଆଓ୍ବାର୍ଡ (କ୍ରୀଡ଼ାକୁ ପ୍ରୋତ୍ସାହନ ଦେଉଥିବା ଶ୍ରେଷ୍ଠ କର୍ପୋରେଟ ପୁରସ୍କାର) ପ୍ରଦାନ କରାଯାଇଛି।
ଏହି ପରିପ୍ରେକ୍ଷୀରେ ରିଲାଏନ୍ସ ଫାଉଣ୍ଡେଶନର ପ୍ରତିଷ୍ଠାତା ତଥା ଅଧ୍ୟକ୍ଷା ନୀତା ଏମ୍. ଅମ୍ବାନୀ କହିଛନ୍ତି, ସିଆଇଆଇ ସ୍ପୋଟର୍ସ ବିଜ୍ନେସ୍ ଆୱାର୍ଡ ସମାରୋହରେ ସ୍ପୋଟର୍ସ ଲିଡର ଅଫ୍ ଦି ଇୟର ପୁରସ୍କାର ଏବଂ କ୍ରୀଡ଼ାକୁ ପ୍ରୋତ୍ସାହନ ଦେଉଥିବା ଶ୍ରେଷ୍ଠ କର୍ପୋରେଟ ପୁରସ୍କାର ଗ୍ରହଣକରି ମୁଁ ବେଶ୍ ଗୌରବାନ୍ବିତ ଅନୁଭବ କରୁଛି। ବିଶେଷକରି କ୍ରୀଡା ଏକ ଅନନ୍ୟ ଏକତା ଓ ସମାନତା ସୃଷ୍ଟିକାରୀ ଏବଂ ଶକ୍ତି ପ୍ରଦାନକାରୀ ବୋଲି ମୋର ଦୃଢ଼ ବିଶ୍ୱାସ ରହିଛି। ଚଳିତ ବର୍ଷ (୨୦୨୩ ବର୍ଷ) ବାସ୍ତବରେ ଭାରତର କ୍ରୀଡ଼ା ଉତ୍କର୍ଷର ବର୍ଷ ହୋଇଥିବାବେଳେ ବିବିଧ କ୍ରୀଡ଼ାରେ ମେଡାଲ ଜିତି ଓ ବିଜୟୀ ହୋଇ ଆମ ଆଥ୍ଲେଟମାନେ ବିଶ୍ୱସ୍ତରରେ ଦେଶର ଗୌରବ ବଢ଼ାଇଛନ୍ତି। ଅପରପକ୍ଷରେ ୧୪୧ତମ ଆନ୍ତର୍ଜାତିକ ଅଲିମ୍ପିକ କମିଟି ଅଧିବେଶନ ମୁମ୍ବାଇଠାରେ ଆୟୋଜିତ କରି ଆମେ ଅଲିମ୍ପିକ ଅଭିଯାନକୁ ୪୦ବର୍ଷ ପରେ ଭାରତକୁ ନେଇ ଆସିଛୁ। ରିଲାଏନ୍ସ ଫାଉଣ୍ଡେଶନରେ ଆମେ ଭାରତର ଯୁବପିଢ଼ିକୁ ବିଶ୍ୱସ୍ତରୀୟ ସୁବିଧା ସୁଯୋଗ ଓ ସହାୟତା ପ୍ରଦାନକରି ଭାରତକୁ ବିଶ୍ୱର କ୍ରୀଡ଼ା ଶକ୍ତି କେନ୍ଦ୍ରରେ ପରିଣତ କରିବାକୁ ପ୍ରତିବଦ୍ଧ ରହିଛୁ।
