ବାଙ୍ଗିରିପୋଷି, ୧୨।୧୧(ସଞ୍ଜୟ କୁମାର ଅଗ୍ରୱାଲା)-ଆଲୋକର ପର୍ବ ଦୀପାବଳି ପାଇଁ ସମସ୍ତେ ପ୍ରସ୍ତୁତିରେ ଲାଗି ପଡ଼ିଛନ୍ତି। କିଏ ଘର ସାଜସଜ୍ଜା ପାଇଁ ସାମଗ୍ରୀ ତ ଆଉ କିଏ ବିଭିନ୍ନ ପ୍ରକାର ରଙ୍ଗିନ ଦୀପ କିଣିବାରେ ବ୍ୟସ୍ତ। ପ୍ରତିବର୍ଷ ଲୋକେ ବିଦେଶୀ ଦୀପ କିଣିବାକୁ ପସନ୍ଦ କରୁଥିବା ଦେଖିବାକୁ ମିଳେ। ବିଭିନ୍ନ ପ୍ରକାର ଦୀପ କିଣି ନିଅନ୍ତି। ଚଳିତବର୍ଷ ମୟୂରଭଞ୍ଜ ଜିଲା ବାଙ୍ଗିରିପୋଷି ଅଞ୍ଚଳରେ ଦେଶୀ ଦୀପର ଅଧିକ ଚାହିଦା ଦେଖିବାକୁ ମିଳିଛି। ବାଙ୍ଗିରିପୋଷି ବଜାରରେ ବିଭିନ୍ନ ସ୍ଥାନରେ ବ୍ୟବସାୟୀମାନେ ଦୀପ ପସରା ଧରି ବସିଛନ୍ତି। ସେମାନଙ୍କ ନିକଟରେ ଚାଇନା ଦୀପ ସହ ଦେଶୀ ଦୀପ ମଧ୍ୟ ରହିଛି। ଦାମ୍ ବେଶୀ ଥିଲେ ମଧ୍ୟ ଗ୍ରାହକମାନେ ଅଧିକ ଦେଶୀ ଦୀପ କିଣୁଥିବା ଦେଖିବାକୁ ମିଳିଛି।
ଗ୍ରାହକ ମନୋରଞ୍ଜନ ବାରିକ କହନ୍ତି, ଦେଶୀ ଦୀପରେ ଦୀପାବଳି ପାଳନ କଲେ ଯେଉଁ ଆନନ୍ଦ ମିଳେ, ତାହା ବିଦେଶୀ ଦୀପରେ ମିଳେ ନାହିଁ। ଲୋକେ ଦେଶୀ ଦୀପ କିଣି ଦୀପାବଳି ପାଳିବା କଥା। ଫଳରେ ଏହାକୁ ପ୍ରସ୍ତୁତ କରୁଥିବା କୁମ୍ଭାର ପରିବାର ଦୁଇ ପଇସା ରୋଜଗାର କରି ପରିବାର ପ୍ରତିପୋଷଣ କରିପାରିବେ ବୋଲି ଗ୍ରାହକ ବିକେଶ ମହାନ୍ତ କହିଛନ୍ତି। ଏ ଅଞ୍ଚଳର ବ୍ୟବସାୟୀମାନେ କହନ୍ତି, ନିଶ୍ଚିନ୍ତା, କୁସୁମବନ୍ଧ, ଜାମଦାପାଳ, ମଣଦା ଆଦି ଅଞ୍ଚଳର କୁମ୍ଭାରମାନଙ୍କ ପାଖରୁ ସେମାନେ ଦେଶୀ ଦୀପ ଆଣିଛନ୍ତି। ସେମାନେ ଯଦି କୁମ୍ଭାରଙ୍କଠାରୁ ଦୀପ ନ କିଣିବେ, ସେମାନଙ୍କ ବେଉସା ବୁଡ଼ି ଯିବ। ବଜାରରେ ଦୀପ ବିକ୍ରି କରୁଥିବା ପ୍ରଶାନ୍ତ ଗୋଚ୍ଛାୟତ କହିଛନ୍ତି, ଏବର୍ଷ ସେ ଅଧିକ ଦେଶୀ ଦୀପ ଆଣିଛନ୍ତି। ଦେଶୀ ଦୀପର ଅଧିକ ଚାହିଦା ପରିଲକ୍ଷିତ ହେଉଛି। ଗ୍ରାହକମାନେ ଦେଶୀ ଦୀପ ଅଧିକ କିଣିବା ପାଇଁ ପସନ୍ଦ କରୁଛନ୍ତି। କାରଣ ଏବେ ଲୋକେ ସଚେତନ ହେଲେଣି। ଆମ ରାଜ୍ୟର ବା ଅଞ୍ଚଳର ମାଟି କାରିଗରମାନେ ଯେପରି ନିଜର କୌଳିକ ବୃତ୍ତିକୁ ବଞ୍ଚାଇ ରଖିବେ ସେନେଇ ସମସ୍ତେ ପ୍ରୟାସ ଜାରି ରଖିଛନ୍ତି।
