ନୂଆଦିଲ୍ଲୀ,୨୦ା୯: ପୁରୁଣା ସଂସଦ ଭବନକୁ ‘ସମ୍ବିଧାନ ସଦନ’ ଭାବେ ନାମିତ କରାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ପୁରୁଣା ଭବନରୁ ତାଙ୍କର ଶେଷ ଅଭିଭାଷଣ ଦେବାବେଳେ ଏହା ଘୋଷଣା କରିଛନ୍ତି। ପରେ ସେ ସମସ୍ତ ଏମ୍ପିଙ୍କୁ ସାଙ୍ଗରେ ନେଇ ଚାଲି ଚାଲି ନୂଆ ପାର୍ଲାମେଣ୍ଟ ବିଲ୍ଡିଂକୁ ଯାଇଥିଲେ। ତାହା ଏବେ ଆନୁଷ୍ଠାନିକ ଭାବେ ଭାରତୀୟ ସଂସଦ ଭବନର ପରିଚୟ ହାସଲ କରିଛି। ଗଣେଶ ଚତୁର୍ଥୀର ପବିତ୍ର ଦିନରେ ଆମେ ପୁରୁଣା ସ୍ଥାନ ଛାଡ଼ି ନୂଆ ପାର୍ଲାମେଣ୍ଟ ବିଲ୍ଡିଂକୁ ଯାଉଛୁ। ଏହି ଭବନର ଗୌରବରେ ଆଦୌ କମ୍ ହେବା ଉଚିତ ନୁହେଁ। ଆମେ ଏହାକୁ କେବଳ ପୁରୁଣା ପାର୍ଲାମେଣ୍ଟ କହିବା ନାହିଁ। ଯଦି ଆପଣମାନେ ଅନୁମତି ଦିଅନ୍ତି, ତେବେ ଉକ୍ତ ବିଲ୍ଡିଂ ସମ୍ବିଧାନ ସଦନ ଭାବେ ପରିଚିତ ହେବ, ଯାହା ଦ୍ୱାରା ଏହା ସବୁଦିନ ପାଇଁ ସମସ୍ତଙ୍କର ପ୍ରେରଣା ହୋଇ ରହିବ ବୋଲି ପ୍ରଧାନମନ୍ତ୍ରୀ ତାଙ୍କ ପାଖରେ ବସିଥିବା ଲୋକ ସଭା ବାଚସ୍ପତି ଏବଂ ରାଜ୍ୟ ସଭା ଅଧ୍ୟକ୍ଷଙ୍କୁ ନିବେଦନ କରିଥିଲେ। ପୁରୁଣା ସଂସଦ ଭବନର ଡିଜାଇନ୍ ବ୍ରିଟିଶ ସ୍ଥପତି ସାର୍ ଏଡ୍ଓ୍ବିନ୍ ଲୁଟ୍ୟେନ୍ ଏବଂ ହର୍ବର୍ଟ ବେକର କରିଥିଲେ। ୧୯୨୭ରେ ବିଲ୍ଡିଂର ନିର୍ମାଣ କାର୍ଯ୍ୟ ଶେଷ ହୋଇଥିଲା। ସୋମବାର ଲୋକ ସଭାରେ ଉଦ୍ବୋଧନ ଦେବାବେଳେ ପ୍ରଧାନମନ୍ତ୍ରୀ ପୁରୁଣା ବିଲ୍ଡିଂର ପ୍ରତି ଇଟାକୁ ଶ୍ରଦ୍ଧାଞ୍ଜଳି ଜଣାଇଥିଲେ। ଏମ୍ପିମାନେ ନୂଆ ସଂସଦ ଭବନରେ ନୂଆ ଆଶା ଓ ଆତ୍ମବିଶ୍ୱାସ ନେଇ ପ୍ରବେଶ କରିବେ ବୋଲି ପ୍ରଧାନମନ୍ତ୍ରୀ କହିଥିଲେ।
