ଭୁବନେଶ୍ବର,୨୩ା୬(ସୁନିତ୍ ମିଶ୍ର): ଜାତୀୟ ରାଜପଥ(ଏନ୍ଏଚ୍)-୧୬ରେ ଆସୁଥିବା ଖୋର୍ଦ୍ଧାରୁ ଚଣ୍ଡିଖୋଲ ରାସ୍ତା ମଧ୍ୟରେ ଦୁର୍ଘଟଣା ଏବଂ ମୃତ୍ୟୁହାର ବୃଦ୍ଧି ପାଇବାରେ ଲାଗିଛି। ଏହାକୁ ହ୍ରାସ କରିବାକୁ ଗତ ମାସରେ ଅନୁଷ୍ଠିତ ବୈଠକରେ ନିଆଯାଇଥିବା ନିଷ୍ପତ୍ତିକୁ ତ୍ୱରିତ କାର୍ଯ୍ୟକାରୀ କରିବା ସହ ଧାର୍ଯ୍ୟ ସମୟରେ କାର୍ଯ୍ୟ ଶେଷ କରିବାକୁ ଏନ୍ଏଚ୍ଏଆଇ ମୁଖ୍ୟ ଜେନେରାଲ ମ୍ୟାନେଜରଙ୍କୁ ବୁଧବାର ବାଣିଜ୍ୟ ଓ ପରିବହନ ସଚିବ ଉଷା ପାଢୀ ଚିଠି ଲେଖିଛନ୍ତି।
ଖୋର୍ଦ୍ଧାରୁ ଚଣ୍ଡିଖୋଲ ରାସ୍ତା ମଧ୍ୟରେ ରାସ୍ତା ପାର୍ଶ୍ୱରେ ବେଆଇନ ପାର୍କିଂ ଏବଂ ଜବରଦଖଲ ହଟାଇବା ନେଇ ଗତ ମାସ ୪ ତାରିଖରେ ଏକ ବୈଠକ ଅନୁଷ୍ଠିତ ହୋଇଥିଲା। ଉକ୍ତ ବୈଠକରେ ଆସନ୍ତା ଜୁଲାଇ ୧୫ ତାରିଖ ସୁଦ୍ଧା ଭୁବନେଶ୍ୱର-କଟକ ରାସ୍ତାରେ ଲେନ୍ ଡ୍ରାଇଭିଂ ଲାଗୁ କରାଯିବାକୁ ନିଷ୍ପତ୍ତି ହୋଇଥିଲା। ଏଥିସହ ଏନ୍ଏଚ୍ଏଆଇ ହେଲ୍ପ ଲାଇନ ନମ୍ବର ୧୦୩୩ ସମ୍ପର୍କରେ କ୍ୟାମ୍ପେନ କରାଯିବାକୁ କୁହାଯାଇଥିଲା। ପୋଲିସ ଏବଂ ଏନ୍ଏଚଏଆଇ ପାଟ୍ରୋଲିଂ ଗାଡ଼ି ମଧ୍ୟରେ ସମନ୍ବୟ ରଖି କାର୍ଯ୍ୟ କରିବା, କ୍ରାସ୍ ଆନାଲିସିସ୍ ଟିମ୍କୁ କାର୍ଯ୍ୟରେ ଲଗାଯିବା, ଖୋର୍ଦ୍ଧା-ଚଣ୍ଡିଖୋଲ ରାସ୍ତା ଉନ୍ନତିକରଣ, ପ୍ରଶସ୍ତିକରଣ ଲାଗି ଅଡିଟ୍ ଟିମ୍ ଦେଇଥିବା ସ୍ବତନ୍ତ୍ର ପ୍ରସ୍ତାବକୁ ଜୁଲାଇ ୩୧ ସୁଦ୍ଧା କାର୍ଯ୍ୟକାରୀ କରାଯିବା ଉପରେ ଗୁରୁତ୍ୱ ଦିଆଯାଇଥିଲା। ସେହିପରି ସେଭ୍ ଲାଇଫ ଫାଉଣ୍ଡେଶନ ଏହି ରାସ୍ତାରେ ଥିବା ମୁଖ୍ୟ ୫ଟି ବ୍ଲାକ ସ୍ପଟକୁ ନେଇ ଦେଇଥିବା ପ୍ରସ୍ତାବ କାର୍ଯ୍ୟକାରୀ କରାଯିବା ସହ ଚଣ୍ଡିଖୋଲ ଛକକୁ ଇଞ୍ଜିନିୟରିଂ ଟିମ୍ ଦ୍ୱାରା ପୁନଃନିର୍ମାଣପରିବର୍ତ୍ତନ କରାଯିବା ନେଇ ମଧ୍ୟ ଆଲୋଚନା ହୋଇଥିଲା। ଅସ୍ଥାୟୀ ଜବରଦଖଲ ସ୍ଥାନ ଗୁଡ଼ିକରେ ପାର୍କିଂ ନ କରିବା ଲାଗି ସାଇନ୍ ବୋର୍ଡ ଲଗାଇବା ସହ ମଙ୍ଗୁଳି, ଡ୍ରିମ୍ ଛକ, ପାହାଳ ଭଳି ସ୍ଥାନରୁ ସ୍ଥାୟୀ ଜବରଦଖଲ ଉଚ୍ଛେଦ କରିବା ଏବଂ ଜୁଲାଇ ୩୧ ସୁଦ୍ଧା ରାସ୍ତା ପାର୍ଶ୍ୱରେ ଲୁହା ବାଡ଼ କରିବା ସମ୍ପର୍କିତ ନିଷ୍ପତ୍ତି ଉପରେ ତ୍ୱରିତ ପଦକ୍ଷେପ ନେବାକୁ ପାଢ଼ୀ ଚିଠିରେ ଉଲ୍ଲେଖ କରିଛନ୍ତି। ଏହାସହ ଚଳିତ ମାସ ଶେଷ ସପ୍ତାହରେ ଏନେଇ ଆଉ ଏକ ବୈଠକ ହେବ ବୋଲି ସେ କହିଛନ୍ତି।
