ବରଗଡ଼ ଅଫିସ, ୪।୬: ବରଗଡ଼ ସହରରେ ଟ୍ରାଫିକ ସମସ୍ୟା ଦିନକୁ ଦିନ ଜଟିଳ ହୋଇପଡୁଛି। ସହରର ଭଟଲି ଛକ, ଥାନା ଛକ, ଲେଙ୍ଗୁ ମିଶ୍ର-ଲମ୍ବା ବିଲ୍ଡିଂ ରାସ୍ତା, ଗାନ୍ଧୀ ଛକ, ଗୁରୁଦ୍ୱାରା ଛକ ଆଦି ସ୍ଥାନରେ ଟ୍ରାଫିକ ସମସ୍ୟା ଅନିୟନ୍ତ୍ରିତ ହୋଇପଡିଛି। ବିଭିନ୍ନ ସ୍ଥାନରେ ଟ୍ରାଫିକ ପୋଷ୍ଟ ଥିବାବେଳେ ପୋଲିସ ପଇଁତରା ମାରୁଥିଲେ ମଧ୍ୟ ତାହା ଧର୍ମକୁ ଆଖିଠାର ଭଳି ହୋଇଛି। ରାସ୍ତାକୁ ମାଡ଼ି ବସି ଜବରଦଖଲ, କୋଠାବାଡ଼ି ନିର୍ମାଣ ଯୋଗୁ ଏଭଳି ସମସ୍ୟା ଉପୁଜିଥିବା ସାଧାରଣରେ ଅଭିଯୋଗ ହୋଇଛି। ଅନ୍ୟପଟେ ଟ୍ରାଫିକ ସମସ୍ୟା ପାଇଁ ଲୋକେ ହଇରାଣ ହେଉଥିବାବେଳେ ବିଭିନ୍ନ ସମୟରେ ଦୁର୍ଘଟଣାର ସମ୍ମୁଖୀନ ମଧ୍ୟ ହେଉଛନ୍ତି ।
ଶନିବାର ରାତି ପ୍ରାୟ ୮ଟାରେ ସହରର ବ୍ୟସ୍ତବହୁଳ ଭଟଲି ଛକରେ ଏଭଳି ସମସ୍ୟା ଲାଗି ରହିଥିଲା। ଉକ୍ତ ଛକରୁ ଗୋଟିଏ ପଟେ ଲମ୍ବା ବିଲ୍ଡ଼ିଂ ଏବଂ ଅନ୍ୟପଟେ ଭଟଲି ପଟକୁ ରାସ୍ତା ଯାଇଥିବାବେଳେ ବାକି ଦୁଇ ଦିଗକୁ ବରଗଡ଼-ବଲାଙ୍ଗୀର ରାସ୍ତା ଲମ୍ବିଛି। ବ୍ୟସ୍ତବହୁଳ ଏହି ଛକରେ ଯୋଜନା ବିହୀନ ଭାବେ ବହୁ କୋଠାବାଡ଼ି, ଦୋକାନ, ବଜାର ଆଦି ପ୍ରତିଷ୍ଠାନ ନିର୍ମାଣ କରାଯାଇଥିବା ବେଳେ ସମ୍ମୁଖରେ ୨ଚକିଆ, ୪ଚକିଆ ଯାନଠାରୁ ଆରମ୍ଭ କରି ମାଲବାହୀ ଗାଡ଼ିଗୁଡ଼ିକ ମଧ୍ୟ ଦୀର୍ଘ ସମୟ ଧରି ଅଟକି ରହୁଛି। ଏଠାରେ ଏକ ଟ୍ରାଫିକ ପୋଷ୍ଟ ରହିଛି। କିନ୍ତୁ ସେଠାରେ ଉପସ୍ଥିତ ଜଣେ, ୨ଜଣ ଟ୍ରାଫିକ କର୍ମଚାରୀଙ୍କ ପକ୍ଷରେ ଟ୍ରାଫିକ ନିୟନ୍ତ୍ରଣ ଅସମ୍ଭବ ହୋଇପଡ଼ୁଛି। ଶନିବାର ଏଭଳି ସ୍ଥିତି ଉପୁଜିଥିବାବେଳେ ଦୀର୍ଘ ସମୟ ଧରି ଲୋକଙ୍କୁ ସେଠାରେ ଅଟକିବାକୁ ପଡ଼ିଥିଲା। ସ୍ଥିତିରେ ସୁଧାର ଆଣିବା ପାଇଁ ଟ୍ରାଫିକ ପୋଲିସ କର୍ମଚାରୀଙ୍କୁ ମଧ୍ୟ ନୟାନ୍ତ ହେବାକୁ ପଡ଼ିଥିଲା।
କେବଳ ସହରର ଭଟଲି ଛକ ନୁହେଁ, ଲେଙ୍ଗୁ ମିଶ୍ର ଛକରୁ ଲମ୍ବା ବିଲ୍ଡ଼ିଂ ରାସ୍ତା ମଧ୍ୟ ସଙ୍କୁଚିତ ହୋଇପଡ଼ିଛି। ରାସ୍ତା ଉପରେ ଯାନବାହନ ଗୁଡ଼ିକ ରଖାଯାଉଛି। ସେହିପରି ମାଲବାହୀ ଟ୍ରକ, ମିନିଟ୍ରକ ମଧ୍ୟ ରାସ୍ତା ଉପରେ ଦୀର୍ଘ ସମୟ ଧରି ଅଟକି ରହୁଥିବା ଯୋଗୁ ଲୋକଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡ଼ୁଛି। ଅନୁରୂପ ଭାବେ ଘରୋଇ ବସଷ୍ଟାଣ୍ଡ ଛକର ଗୋଟିଏ ପଟେ ଭେଡ଼େନ ରାସ୍ତା ଏବଂ ଅନ୍ୟପଟେ କଟାପାଲି ରାସ୍ତା ରହିଥିବାବେଳେ ବାକି ଦୁଇ ଦିଗରେ ବରଗଡ଼-ସମ୍ବଲପୁର ଓ ବରଗଡ଼-ବଲାଙ୍ଗୀର ପଟକୁ ରାସ୍ତା ଲମ୍ବିଛି। ଫଳରେ ସେଠାରେ ମଧ୍ୟ ବିଭିନ୍ନ ସମୟରେ ଟ୍ରାଫିକ୍ ଜାମ୍ ହେଉଛି। କେତେକ ସ୍ଥାନରେ ୨ଥାକିଆ ରାସ୍ତା ହୋଇଛି। କିନ୍ତୁ ଛକସ୍ଥାନ ଗୁଡ଼ିକରେ ରାସ୍ତା ଜବରଦଖଲ ସହିତ ବିଭିନ୍ନ ପ୍ରତିଷ୍ଠାନ ଗଢ଼ି ଉଠିଥିବାରୁ ଏହି ସମସ୍ୟା ବଢିବାରେ ଲାଗିଛି। ସହରର ଏଭଳି ପ୍ରମୁଖ ସମସ୍ୟାର ସମାଧାନ ଦିଗରେ ତ୍ୱରିତ ପଦକ୍ଷେପ ନେବାକୁ ବିଭିନ୍ନ ମହଲରେ ଦାବି ହେଉଛି ।
