ପ୍ରୟାଗରାଜ,୨୮।୩: ୪୪ ବର୍ଷ ଧରି ଅପରାଧ ଜଗତରେ ଆତଙ୍କ ଚଳାଇଥିବା ଅତିକ ଅହମ୍ମଦଙ୍କୁ ପ୍ରଥମ ଥର ପାଇଁ ଦଣ୍ଡିତ କରାଯାଇଛି। ୨୦୦୬ ଉମେଶ ପାଲ ଅପହରଣ ମାମଲାରେ ପ୍ରୟାଗରାଜର ଏମ୍ପି-ଏମ୍ଏଲ୍ଏ କୋର୍ଟ ଅତିକ ଅହମ୍ମଦ, ହନିଫ ଏବଂ ଦିନେଶ ପାସିଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଏତତଦ୍ ବ୍ୟତୀତ ଏହି ୩ଜଣ ଦୋଷୀଙ୍କୁ ୧-୧ଲକ୍ଷ ଟଙ୍କାର ଜରିମାନା ଲଗାଇଛନ୍ତି କୋର୍ଟ। ଏହି ଟଙ୍କା ଉମେଶ ପାଲଙ୍କ ପରିବାରଙ୍କୁ କ୍ଷତିପୂରଣ ଆକାରରେ ଦେବାକୁ ନିର୍ଦ୍ଦେଶ ରହିଛି। ତେବେ କୋର୍ଟଙ୍କ ଏହି ନିଷ୍ପତ୍ତି ବିରୋଧରେ ଅତିକ ଅହମ୍ମଦ ହାଇକୋର୍ଟ ଯିବେ ବୋଲି ଜଣାପଡ଼ିଛି। ଅନ୍ୟପଟେ ଦଣ୍ଡାଦେଶ ଶୁଣିବା ପରେ ଅତିକ ଅହମ୍ମଦ ତାଙ୍କୁ ସାବରମତିି ଜେଲକୁ ପଠାଇବାକୁ କୋର୍ଟଙ୍କୁ ଅନୁରୋଧ କରିଥିଲେ। ଅତିିକ କହିଥିଲେ ଯେ, ମୋତେ ସାବରମତି ଜେଲକୁ ପଠାଇଦିଅନ୍ତୁ, ମୁଁ ଏଠାରେ ରହିବାକୁ ଚାହେଁ ନାହିଁ। ପୋଲିସ ମୋ ବିରୋଧରେ ମାମଲାର ବୋଝ ଲଦିଦେବ ବୋଲି ସେ କୋର୍ଟକୁ କହିଥିଲେ। ତେବେ ଅତିକଙ୍କ ଅନୁରୋଧ ପରେ ବି ପୋଲିସ ତାଙ୍କୁ ପୁନର୍ବାର ନୈନି ଜେଲକୁ ଆଣିଥିଲା, କିନ୍ତୁ ତାଙ୍କୁ ଉକ୍ତ ଜେଲରେ ରଖିବାକୁ ପୋଲିସ ପାଖରେ ନିର୍ଦ୍ଦେଶ ନ ଥିଲା। ତେଣୁ ବର୍ତ୍ତମାନ ଅତିକ ଅହମ୍ମଦଙ୍କୁ ସାବରମତି ଜେଲକୁ ପଠାଯିବ। ଆଉ କିଛି ସମୟ ପରେ ପ୍ରୟାଗରାଜ ପୋଲିସ ତାଙ୍କୁ ସାବରମତି ଜେଲକୁ ନେଇଯିବ। ଅହମ୍ମଦାବାଦ ଯିବା ପାଇଁ ସମସ୍ତ ପ୍ରସ୍ତୁତି ଆରମ୍ଭ ହୋଇସାରିଛି। ଅନ୍ୟପଟେ ଅତିକଙ୍କ ଭାଇ ଅଶରଫଙ୍କୁ ମଧ୍ୟ କୋର୍ଟରୁ ସିଧା ବରେଲୀ ଜେଲକୁ ପଠାଯାଇଥିଲା।
