ଲଣ୍ଡନ,୫।୩ : ଫାଲ୍କଲ୍ୟାଣ୍ଡ ଚୁକ୍ତିନାମାକୁ ଏକପାଖିଆ ବାତିଲ କରିବାକୁ ଆର୍ଜେଣ୍ଟିନା ନିଷ୍ପତ୍ତି ଯୋଗୁଁ ବ୍ରିଟେନରେ ଅସନ୍ତୋଷର ବାତାବରଣ ସୃଷ୍ଟି ହୋଇିଛି। ଆର୍ଜେଣ୍ଟିନାର ଏହି ନିଷ୍ପତ୍ତି ଉପରେ ବ୍ରିଟିଶ ସରକାରଙ୍କ ପ୍ରତିକ୍ରିୟା ତୁଳନାତ୍ମକ ଭାବେ ସାମାନ୍ୟ ଥିଲା। ଏନେଇ ସମାଲୋଚକମାନେ କହିଛନ୍ତି ଯେ, ସଙ୍କଟରେ ପଡ଼ିଥିବା ବ୍ରିଟେନକୁ ବର୍ତ୍ତମାନ ଦୁନିଆର ଏକ ଦୁର୍ବଳ ଦେଶ ଭାବରେ ଦେଖାଯାଉଛି। ସୋସିଆଲ ମିଡିଆରେ ଏଭଳି କଥା କୁହାଯାଇଛି।
କେତେକ ପର୍ଯ୍ୟବେକ୍ଷକଙ୍କ କହିବାନୁସାରେ, ବ୍ରିଟେନ ବର୍ତ୍ତମାନ ୟୁକ୍ରେନକୁ ସାମରିକ ସହାୟତା ପାଇଁ ଜଡ଼ିତ ଥିବାବେଳେ ଆର୍ଜେଣ୍ଟିନା ଏଭଳି ପଦକ୍ଷେପ ନେବାକୁ ଉପଯୁକ୍ତ ସମୟ ଭାବରେ ଚିନ୍ତା କରିଛି। ଏଥି ସହିତ ବ୍ରିଟେନରେ ମଧ୍ୟ ମୁଦ୍ରାସ୍ଫୀତି ଏବଂ ସାମାଜିକ ସମସ୍ୟା ଗୁରୁତର ହେବାରେ ଲାଗିଛି।
ବ୍ରିଟିଶ ସରକାରୀ ଅଧିକାରୀ ଆର୍ଜେଣ୍ଟିନାର ଏହି ନିଷ୍ପତ୍ତିକୁ ନିରାଶାଜନକ ବୋଲି ବର୍ଣ୍ଣନା କରିଛନ୍ତି। ଫାଲ୍କଲ୍ୟାଣ୍ଡ ଆର୍ଜେଣ୍ଟିନାରେ ମାଲଭିନସ ଦ୍ୱୀପପୁଞ୍ଜ ଭାବରେ ଜଣାଶୁଣା। ୧୮୩୩ ମସିହାରେ ବ୍ରିଟେନ ଏହି ଦ୍ୱୀପପୁଞ୍ଜକୁ ଦଖଲ କରିଥିଲା, ଯାହା ଆର୍ଜେଣ୍ଟିନା ଦ୍ୱାରା ସର୍ବଦା ଦାବି ହୋଇଆସୁଛି। ୧୯୮୨ ମସିହାରେ, ଆର୍ଜେଣ୍ଟିନା ଏହି ଦ୍ୱୀପପୁଞ୍ଜକୁ ଜବରଦଖଲ କରିଥିଲା, ଯାହା ଦ୍ୱାରା ଦୁଇ ଦେଶ ମଧ୍ୟରେ ଯୁଦ୍ଧ ହୋଇଥିଲା ଯେଉଁଥିରେ ଆର୍ଜେଣ୍ଟିନା ପରାସ୍ତ ହୋଇଥିଲା। ୭୪ ଦିନ ଧରି ଚାଲିଥିବା ଏହି ଯୁଦ୍ଧରେ ଆର୍ଜେଣ୍ଟିନାର ୬୪୯ ସୈନିକ ଏବଂ ବ୍ରିଟେନର ୨୫୫ ସୈନ୍ୟ ନିହତ ହୋଇଥିଲେ।
୨୦୧୬ ରେ ବ୍ରିଟେନ ଏବଂ ଆର୍ଜେଣ୍ଟିନା ମଧ୍ୟରେ ଫାଲ୍କଲ୍ୟାଣ୍ଡ / ମାଲଭିନସ ଦ୍ୱୀପପୁଞ୍ଜ ବିଷୟରେ ଏକ ଚୁକ୍ତି ହୋଇଥିଲା । ବର୍ତ୍ତମାନ ଆର୍ଜେଣ୍ଟିନା ଏକପାଖିଆ ଭାବେ ଏଥିରୁ ଓହରିଯିବାକୁ ନିଷ୍ପତ୍ତି ନେଇଛି।
