ମୁମ୍ବାଇ: ମନ ମୁତାବକ କାମ ମିଳୁ ନ ଥିବା କହିଛନ୍ତି ହିନ୍ଦୀ ଜଗତର ନାମକରା ଅଭିନେତ୍ରୀ ସ୍ବରା ଭାସ୍କର। ନିକଟରେ ସେ ଦେଇଥିବା ଏକ ସାକ୍ଷାତ୍କାରରେ କହିଛନ୍ତି ଯେ, ଇଣ୍ଡଷ୍ଟ୍ରିରେ ସେ ଜଣେ ଦକ୍ଷ ଓ ଅଭିଜ୍ଞ ସମ୍ପନ୍ନ କଳାକାର ହୋଇଥିଲେ ହେଁ ତାଙ୍କୁ ଆବଶ୍ୟକତା ଅନୁସାରେ କାମ ମିଳୁନାହିଁ। ତାଙ୍କ ଅଭିନୀତ ୬ରୁ ୭ଟି ଫିଲ୍ମ ବକ୍ସ ଅଫିସ୍ରେ ସୁପରହିଟ୍ ହୋଇଥିବାବେଳେ ଓ୍ବେବ୍ ସିରିଜ୍ରେ ମଧ୍ୟ ତାଙ୍କ ଅଭିନୟକୁ ଦର୍ଶକେ ଖୁବ୍ ପସନ୍ଦ କରିଛନ୍ତି। ଏତେସବୁ ପରେ ମଧ୍ୟ ଇଣ୍ଡଷ୍ଟ୍ରିରେ ତାଙ୍କୁ କାମ ମିଳୁନାହିଁ। ସାମାଜିକ ପ୍ରସଙ୍ଗରେ ନିଜର ମତ ପ୍ରକାଶ କରି ଚର୍ଚ୍ଚାରେ ରହୁଥିବା ସ୍ବରା ମାଧୋଲାଲ କିପ୍ ଓ୍ବାକିଂ ଜରିଆର ୨୦୦୯ରେ ବଲିଉଡ୍ରେ ଡେବ୍ୟୁ କରିଥିଲେ। ଏଥିସହ ରାଞ୍ଛଣା, ପ୍ରେମ ରତନ ଧନ ପାୟୋ, ନିଲ ବଟେ ସନାଟା, ଅନାରକଲି ଅଫ୍ ଆର୍ହା ଆଦି ଫିଲ୍ମରେ ସେ ଅଭିନୟ କରିଛନ୍ତି। ଅନେକ ସମୟରେ ନିଜ ପସନ୍ଦ ଅନୁସାରେ ଫିଲ୍ମକୁ ବାଛିବା ନେଇ ତାଙ୍କୁ ବହୁ ଅସୁବିଧା ଦେଇ ଗତି କରିବାକୁ ପଡ଼ିଥିବା ସ୍ବରା କହିଛନ୍ତି। କଂଗ୍ରେସ ପକ୍ଷରୁ ଚାଲିଥିବା ଭାରତ ଯୋଡ଼ ଯାତ୍ରାରେ କଂଗ୍ରେସ ନେତା ରାହୁଲ ଗାନ୍ଧୀଙ୍କ ସହ ସାମିଲ ହୋଇ ଏବେ ସ୍ବରା ଲାଇମ୍ ଲାଇଟ୍ରେ ଅଛନ୍ତି। ଆଗାମୀ ଦିନରେ ସ୍ବରାଙ୍କ ଅଭିନୀତ ମର୍ଡରମିଷ୍ଟ୍ରି ମୀମାଂସା ରିଲିଜ୍ ହେବାକୁ ଥିବାବେଳେ ନାରୀ କୈନ୍ଦ୍ରିକ ଡ୍ରାମା ଫିଲ୍ମ ମିସେସ୍ ଫଲାନିରେ ସେ ନଜରକୁ ଆସିବେ ।
