ବ୍ରହ୍ମପୁର ଅଫିସ,୧୬ା୧୦: ବ୍ରହ୍ମପୁର ମହାନଗର ନିଗମ ୩୭ ନଂ.ୱାର୍ଡ ଅନ୍ତର୍ଗତ ଗୌଡବନ୍ଧ ବସ୍ତି ବାସିନ୍ଦା ବୁଧବାରଠାରୁ ଉଚ୍ଛେଦ ପରେ ସେମାନଙ୍କ ମଧ୍ୟରେ ଦିନକୁ ଦିନ ଅସନ୍ତୋଷ ବୃଦ୍ଧି ପାଇବାରେ ଲାଗିଛି। ବସ୍ତି ବାସିନ୍ଦା ବର୍ତ୍ତମାନ ରହୁଥିବା ସ୍ଥାନରେ ଘର ଦେବା ପାଇଁ ଦାବି କରିଛନ୍ତି। ଏପରିକି ଉକ୍ତ ଦାବିକୁ ନେଇ ବିଏମ୍ସି କାର୍ଯ୍ୟାଳୟ ସମ୍ମୁଖରେ ଗତ ୧୩ ତାରିଖରେ ଧାରଣା ଓ ପ୍ରତିବାଦ କରିଥିଲେ। କିନ୍ତୁ ବିଏମ୍ସି ପକ୍ଷରୁ ଗୌଡବନ୍ଧ ବସ୍ତି ଜାତୀୟ ଗ୍ରୀନ ଟ୍ରିବ୍ୟୁନାଲ ନିୟମ(ଏନ୍ଜିଟି) ବଳରେ ଭଙ୍ଗାଯାଇଥିବା ସ୍ପଷ୍ଟୀକରଣ ଦେଇଛନ୍ତି। ବସ୍ତିରେ ରହୁଥିବା ୧୦୯ ପରିବାରଙ୍କୁ ନେହେରୁନଗର ଓ ଆଇନା ବନ୍ଧ ସାହି ସ୍ଥିତ ରାଜୀବ ଆବାସ ଯୋଜନା ଆପାର୍ଟମେଣ୍ଟରେ ସେମାନଙ୍କ ନାମରେ ଆବଣ୍ଟନ ପତ୍ର ମଧ୍ୟ ହୋଇଛି। ଏଣୁ ବସ୍ତି ବାସିନ୍ଦାମାନେ ଆବଣ୍ଟନ ପତ୍ର ବିଏମ୍ସି କାର୍ଯ୍ୟାଳୟରୁ ଗ୍ରହଣ କରି ରାଜୀବ ଆବାସ ଆପାର୍ଟମେଣ୍ଟ୍କୁ ସ୍ଥାନାନ୍ତର ପାଇଁ ଅନୁରୋଧ କରାଯାଇଛି। କିନ୍ତୁ ବସ୍ତି ବାସିନ୍ଦା ନିଜ ଜିଦ୍ରେ ଅଟଳ ରହିବା ସହ ଭଙ୍ଗା ଦଦରା ଘରେ ପଲିଥିନ୍ ଟାଣି ଜୀବନ ଅତିବାହିତ କରୁଛନ୍ତି।
୪ ଦିନ ହେଲା ଏଭଳି ଖୋଲା ଆକାଶ ତଳେ ନିଜ ପରିବାର ସହ ଛୋଟ ଶିଶୁଙ୍କୁ ଧରି ରହୁଛନ୍ତି। ଏଭଳି ସ୍ଥିତିକୁ ଦୃଷ୍ଟିରେ ରଖି ଶୁକ୍ରବାର ସନ୍ଧ୍ୟାରେ ବିଏମ୍ସି ଅତିରିକ୍ତ କମିଶନର ନୀଳମାଧବ ଭୋଇ, ଡେପୁଟି କମିଶନର ଆଶୀର୍ବାଦ ପରିଡା, ନୋଡାଲ ଗୋଷ୍ଠୀ ସଂଯୋଜିକା ଗୀତାଞ୍ଜଳି ସାମନ୍ତରାୟ ଓ ସ୍ମିତା ଦାଶ ଘଟଣାସ୍ଥଳକୁ ଯାଇ ବସ୍ତି ବାସିନ୍ଦାଙ୍କୁ ବୁଝାଶୁଝା କରିଥିଲେ। ବସ୍ତି ବାସିନ୍ଦାଙ୍କୁ ରାଜୀବ ଆବାସ ଆପାର୍ଟମେଣ୍ଟକୁ ଯିବା ପାଇଁ ଅନୁରୋଧ କରିଥିଲେ। କିନ୍ତୁ ସେମାନେ ଜିଦରେ ଅଟଳ ରହିବା ସହ ବସ୍ତିରେ ହିଁ ଘର ପ୍ରଦାନ ପାଇଁ ଦାବି କରିଥିଲେ। କିନ୍ତୁ କୌଣସି ସୁଫଳ ମିଳି ନ ଥିଲା। ଶନିବାର ପୂର୍ବାହ୍ନରେ ଗୋଷାଣୀନୂଆଗଁା ଥାନାରେ ମଧ୍ୟ ବସ୍ତି ବାସିନ୍ଦାଙ୍କୁ ଡକାଯାଇ ବିଏମ୍ସି କର୍ତ୍ତୃପକ୍ଷ ବୁଝାଶୁଝା କରିଥିଲେ। ତଥାପି ବର୍ତ୍ତମାନ ସୁଦ୍ଧା କୌଣସି ସମାଧାନର ବାଟ ଫିଟି ନାହିଁ।
ଅନ୍ୟପଟେ ବସ୍ତି ବାସିନ୍ଦାଙ୍କ କହିବା ମୁତାବକ, ରାଜୀବ ଆବାସ ଆପାର୍ଟମେଣ୍ଟରେ ପ୍ରଦାନ କରାଯାଇଥିବା ଗୃହଗୁଡିକ ଛୋଟ ରହିଛି। ଯେଉଁଠାରେ ଏକ ବଡ ପରିବାର ବସବାସ କରିବା ସମ୍ଭବପର ନୁହେଁ ବୋଲି ବସ୍ତି ବାସିନ୍ଦା ଅଭିଯୋଗ କରିଛନ୍ତି। ଏ ନେଇ ନୋଡାଲ ଗୋଷ୍ଠୀ ସଂଯୋଜିକା ସ୍ମିତା ଦାଶଙ୍କ ସହ ଯୋଗାଯୋଗ ବେଳେ କହିଛନ୍ତି, ଲୋକଙ୍କୁ ବୁଝାଶୁଝା ପ୍ରକ୍ରିୟା ଜାରି ରହିଛି। ଖୁବ ଶୀଘ୍ର ସେମାନେ ରାଜୀବ ଆବାସ ଆପାର୍ଟମେଣ୍ଟକୁ ସ୍ଥାନାନ୍ତର ହେବେ ।
