ନୂଆଦିଲ୍ଲୀ,୭।୫: ଆଜିର ଅତ୍ୟାଧୁନିକ ଯୁଗରେ ଟେକ୍ନୋଲୋଜି ଆମ ଜୀବନଶୈଳୀକୁ ଅନେକ ସହଜ କରିଦେଇଛି। ପୂର୍ବରୁ ଗ୍ୟାସ ସିଲିଣ୍ଡର ବୁକିଂ ପାଇଁ ଗ୍ରାହକଙ୍କୁ ଗ୍ୟାସ ଏଜେନ୍ସିକୁ ଦୌଡ଼ିବାକୁ ପଡ଼ୁଥିଲା କିମ୍ବା ଫୋନ କଲ କରି ଲମ୍ବା ସମୟ ଅପେକ୍ଷା କରିବାକୁ ପଡ଼ୁଥିଲା। କିନ୍ତୁ ଏବେ ଭାରତ ସରକାରଙ୍କ ’ଉମଙ୍ଗ’ (UMANG) ଆପ ଏହି ସମସ୍ୟାର ସମାଧାନ କରିଛି। ମାତ୍ର କେଇ ମିନିଟ ମଧ୍ୟରେ ନିଜ ସ୍ମାର୍ଟଫୋନ ସାହାଯ୍ୟରେ ଆପଣ ଗ୍ୟାସ ବୁକ କରିବା ସହ ଅନଲାଇନ ପେମେଣ୍ଟ ମଧ୍ୟ କରିପାରିବେ।
ଉମଙ୍ଗ ଅଥାତ’ୟୁନିଫାଇଡ ମୋବାଇଲ ଆପ୍ଲିକେସନ ଫର ନିଉ-ଏଜ ଗଭର୍ଣ୍ଣାନ୍ସ’। ଏହା ଏକ ସରକାରୀ ପ୍ଲାଟଫର୍ମ ଯେଉଁଠାରେ ୧୫୦୦ରୁ ଅଧିକ ସରକାରୀ ସେବା ଉପଲବ୍ଧ। ଆପଣ ଭାରତ ଗ୍ୟାସ, ଇଣ୍ଡେନ କିମ୍ବା ଏଚ୍ପିି ଗ୍ୟାସ – ଯେକୌଣସି କମ୍ପାନୀର ଗ୍ରାହକ ହୋଇଥାନ୍ତୁ ନା କାହିଁକି, ଏହି ଆପ ମାଧ୍ୟମରେ ବୁକିଂ କରିପାରିବେ। କେବଳ ସେତିକି ନୁହେଁ, ପୁରୁଣା ବୁକିଂ ଇତିହାସ ଏବଂ ସବସିଡି ଷ୍ଟାଟସ ମଧ୍ୟ ଏଠାରେ ଯାଞ୍ଚ କରିହେବ।
କିପରି କରିବେ ବୁକିଂ? (ଷ୍ଟେପ-ବାଇ-ଷ୍ଟେପ)
ଷ୍ଟେପ ୧: ପ୍ରଥମେ ନିଜ ମୋବାଇଲର ପ୍ଲେ-ଷ୍ଟୋର୍ କିମ୍ବା ଆପ ଷ୍ଟୋରରୁ UMANG App ଡାଉନଲୋଡ କରନ୍ତୁ।
ଷ୍ଟେପ ୨: ମୋବାଇଲ ନମ୍ବର ଏବଂ ଓଟିପି (OTP) ଜରିଆରେ ରେଜିଷ୍ଟ୍ରେଶନ କରନ୍ତୁ।
ଷ୍ଟେପ ୩: ଆପ ଲଗ-ଇନ କରିବା ପରେ ସର୍ଚ୍ଚ ବାର୍ରେ’Gas Booking’ ଟାଇପ କରନ୍ତୁ କିମ୍ବା ’Refill’ ବିକଳ୍ପକୁ ବାଛନ୍ତୁ।
ଷ୍ଟେପ ୪: ନିଜର ଗ୍ୟାସ ପ୍ରଦାନକାରୀ କମ୍ପାନୀ (HP, Indane କିମ୍ବା Bharat Gas) ଚୟନ କରନ୍ତୁ।
ଷ୍ଟେପ ୫: ନିଜର ଗ୍ରାହକ ନମ୍ବର (Consumer ID) କିମ୍ବା ପଞ୍ଜିକୃତ ମୋବାଇଲ ନମ୍ବର ଦିଅନ୍ତୁ।
ଷ୍ଟେପ ୬: ସମସ୍ତ ତଥ୍ୟ ଯାଞ୍ଚ କରିବା ପରେ ’ବୁକ୍’ ବଟନ ଉପରେ କ୍ଲିକ କରନ୍ତୁ।
ସୁରକ୍ଷିତ ଅନଲାଇନ ପେମେଣ୍ଟର ସୁବିଧା:
ସିଲିଣ୍ଡର ବୁକିଂ କରିବା ସହିତ ଆପଣ ୟୁପିଆଇ (UPI), ଡେବିଟ କାର୍ଡ କିମ୍ବା ନେଟ ବ୍ୟାଙ୍କିଙ୍ଗ ଜରିଆରେ ତୁରନ୍ତ ଟଙ୍କା ପୈଠ କରିପାରିବେ। ଏହାଦ୍ୱାରା ଡେଲିଭରି ସମୟରେ ଖୁଚୁରା ଟଙ୍କାର ଚିନ୍ତା ରହେନାହିଁ। ଅନେକ ସମୟରେ ଡିଜିଟାଲ ପେମେଣ୍ଟ ଉପରେ କ୍ୟାସବ୍ୟାକ ଅଫର୍ ମଧ୍ୟ ମିଳିଥାଏ।
ଉମଙ୍ଗ ଆପ ୧୩ଟି ଆଞ୍ଚଳିକ ଭାଷାରେ ଉପଲବ୍ଧ, ଯାହାଦ୍ୱାରା ସାଧାରଣ ଲୋକେ ସହଜରେ ଏହାକୁ ବ୍ୟବହାର କରିପାରୁଛନ୍ତି। ଗ୍ୟାସ ବୁକିଂ ବ୍ୟତୀତ ନୂଆ କନେକ୍ସନ ପାଇଁ ଆବେଦନ ଏବଂ ବିତରକଙ୍କ ବିରୋଧରେ ଅଭିଯୋଗ କରିବାର ସୁବିଧା ମଧ୍ୟ ଏହି ଆପ୍ରେ ରହିଛି।
ସରକାରଙ୍କ ଏହି ଡିଜିଟାଲ ପଦକ୍ଷେପ ଗ୍ରାହକଙ୍କ ସମୟ ବଞ୍ଚାଇ ରଖିବାରେ ବେଶ ସହାୟକ ହେଉଛି।
