ପାଟନା,୧୨।୫: ବିହାରର କଟିହାର ଜିଲାରୁ ଏକ ଖବର ଆସିଛି ଯାହା କେବଳ ସାମାଜିକ ମର୍ଯାଦାକୁ ସମ୍ପୂର୍ଣ୍ଣ ଭାଙ୍ଗି ଦେଇଛି ନୁହେଁ ବରଂ ଆଇନ ଶୃଙ୍ଖଳା ବ୍ୟବସ୍ଥାକୁ ମଧ୍ୟ ଚ୍ୟାଲେଞ୍ଜ ସୃଷ୍ଟି କରିଛି । କୁର୍ସେଲା ପୋଲିସ ଷ୍ଟେସନ ଅଧୀନସ୍ଥ ଗୋବ୍ରାହି ଦିଆରାରେ, ଗାଁ ଲୋକମାନେ – ‘ତାଲିବାନ ପରି’ ମାନସିକତା ପ୍ରଦର୍ଶନ କରି ଦୁଇଟି ନାବାଳକ ପିଲାଙ୍କୁ ବଳପୂର୍ବକ ବିବାହ କରାଇ ଦେଇଛନ୍ତି। ‘ତାଲିବାନ ଶୈଳୀର ନ୍ୟାୟ’ ପ୍ରଦାନ କରି, ଗାଁ ଲୋକମାନେ ନାବାଳକ ପୁଅର ମୁଣ୍ଡର ଅଧା ଭାଗ ମଧ୍ୟ କାଟି ଦେଇଛନ୍ତି। ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି ।
ରିପୋର୍ଟ ଅନୁଯାୟୀ, କଟିହାର ଜିଲାର ଗାନ୍ଧୀଗ୍ରାମ ବିଣ୍ଟୋଲିର ବାସିନ୍ଦା ଜଣେ ୧୧ ବର୍ଷୀୟ ଝିଅ ଏବଂ ଜଣେ ୧୨ ବର୍ଷୀୟ ପୁଅକୁ ଗାଁ ଲୋକେ ଏକାଠି ଦେଖିଥିଲେ । ପରବର୍ତ୍ତୀ ସମୟରେ ଯାହା ଘଟିଲା ତାହା ମାନବତାକୁ ଲଜ୍ଜିତ କରିଛି। ଆଇନକୁ ହାତକୁ ନେଇ ଲେକେ ପ୍ରଥମେ ହଙ୍ଗାମା ସୃଷ୍ଟି କରିଥିଲେ ଏବଂ ତା’ପରେ ଦଣ୍ଡ ସ୍ୱରୂପ, ନାବାଳକ ପୁଅର ମୁଣ୍ଡର ଅଧା ଭାଗ କାଟି ଦେଇଥିଲେ । ଝିଅର ବାପା ଏବଂ ଗାଁ ଲୋକଙ୍କ ଚାପରେ, ଦୁଇଟି ନିର୍ଦ୍ଦୋଷ ପିଲାଙ୍କୁ ଜୋରଜବରଦସ୍ତି ବିବାହ କରାଯାଇଥିଲା।
ଯେଉଁ ବୟସରେ ଏହି ପିଲାମାନଙ୍କ ହାତରେ କଲମ ଏବଂ ପୁସ୍ତକ ରହିବା ଉଚିତ ଥିଲା, ସେହି ବୟସରେ ସମାଜର ଆତ୍ମଘୋଷିତ ରକ୍ଷକମାନେ ସେମାନଙ୍କୁ ବିବାହ କରାଇଥିଲେ । ବାଲ୍ୟବିବାହ ନିଷେଧ ଆଇନ ଅନୁଯାୟୀ, ଏହା କେବଳ ଏକ ଅପରାଧ ନୁହେଁ, ବରଂ ଶିଶୁମାନଙ୍କ ମୌଳିକ ଅଧିକାରର ଉଲ୍ଲଂଘନ। ଆଶ୍ଚର୍ଯ୍ୟର କଥା, ଏହି ଘଟଣାର ବ୍ୟାପକତା ସତ୍ତ୍ୱେ, ଏପର୍ଯ୍ୟନ୍ତ ପ୍ରଶାସନ ପକ୍ଷରୁ କୌଣସି ଠୋସ୍ କାର୍ଯ୍ୟାନୁଷ୍ଠାନ ନିଆଯାଇଥିବାର କୌଣସି ରିପୋର୍ଟ ମିଳିନାହିଁ।
