ଦେବଗଡ,୧୨।୫(ଶଶାଙ୍କ ଶେଖର ଝାଙ୍କର): ଦେବଗଡ ଜିଲ୍ଲା ବାରକୋଟ ବ୍ଳକ ଦେବଗଡ ବନଖଣ୍ଡ ଦନ୍ତାରିବାହାଲ ଗ୍ରାମରେ ଦନ୍ତା ହାତୀଙ୍କ ଆତଙ୍କ ଦେଖିବାକୁ ମିଳିଛି । ଗାଁର ମତୁଆଳି ନାଳରେ ଦୀର୍ଘ ସମୟ ଧରି ଦନ୍ତା ହାତୀ ଜଳକ୍ରୀଡା କରୁଥିବା ଦେଖାଯାଇଛି । ଏହାକୁ ଦେଖିବା ପାଇଁ ଗ୍ରାମବାସୀଙ୍କ ଭିଡ ଲାଗିଛି ।
ଅନ୍ୟପଟେ ଦନ୍ତା ହାତୀ କେତେବେଳେ ବି ଗାଁ ମୁହାଁ ହେବାର ଭୟ ରହିଥିବା ବେଳେ ଗ୍ରାମବାସୀଙ୍କ ମଧ୍ୟରେ ହାତୀ ଆତଙ୍କ ଦେଖାଦେଇଛି । ସୋମବାର ନିକଟସ୍ଥ ଜଙ୍ଗଲରୁ ଦନ୍ତା ହାତୀଟି ବାହାରି ଆସିଥିବା ବେଳେ ଦନ୍ତାରିବାହାଲ ଗ୍ରାମରେ ଆତଙ୍କ ମଚାଇଛି । ଏବେ ସୁଦ୍ଧା କୌଣସି କ୍ଷୟକ୍ଷତିର ଖବର ଆସିନଥିଲେ ମଧ୍ୟ ଲୋକ ଭୟଭୀତ ଅଛନ୍ତି ।
ଖବର ପାଇ ବନ ବିଭାଗ କର୍ମଚାରୀ ଘଟଣାସ୍ଥଳରେ ପହଂଚିଥିବା ବେଳେ ହାତୀର ଗତିବିଧି ଉପରେ ନଜର ରଖାଯାଇଛି । ଦନ୍ତାହାତୀର ଉପସ୍ଥିତି ଯୋଗୁଁ ଅଂଚଳରେ ଭୟର ପରିବେଶ ସୃଷ୍ଟି ହୋଇଥିବା ବେଳେ ବନବିଭାଗ ପକ୍ଷରୁ ପରିସ୍ଥିତି ଉପରେ କଡା ନଜର ରଖାଯାଇଥିବା ଜଣାପଡିଛି ।
