ନନ୍ଦପୁର,୧୨।୫ (ତୁଷାର କାନ୍ତ ମହାନ୍ତି): କୋରାପୁଟ ଜିଲା ନନ୍ଦପୁର ବ୍ଲକ ଖୁର୍ଜୀ ପଞ୍ଚାୟତ ନନ୍ଦୀଗାଁରେ ସୋମବାର ଜଣେ ନବବିବାହିତାଙ୍କ ଝୁଲନ୍ତା ମୃତଦେହ ଉଦ୍ଧାର ଘଟଣାରେ ନୂଆ ମୋଡ଼ ନେଇଛି। ଝିଅ ଘର ପକ୍ଷରୁ ଯୌତୁକ ପାଇଁ ବଧୂ ହତ୍ୟା ଅଭିଯୋଗ ହେବା ପରେ ନନ୍ଦପୁର ପୋଲିସ ମାମଲା (କେସ୍ ନଂ ୬୬/୨୦୨୬) ରୁଜୁ କରି ତଦନ୍ତ ଚଳାଇଥିଲା। ଏହି ଘଟଣାରେ ମଙ୍ଗଳବାର ପୋଲିସ ତିନି ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି। ଗିରଫ ବ୍ୟକ୍ତିମାନେ ହେଲେ ସ୍ୱାମୀ ମନୋଜ ଚମ୍ପୀ, ଶାଶୁ ଜମ୍ବୁବତୀ ଚମ୍ପୀ ଓ ଶଶୁର କୁଶ ଚମ୍ପୀଟ
ପରିବାର ପକ୍ଷରୁ ଦିଆଯାଇଥିବା ଏତଲାରେ ମୃତକଙ୍କ ବୟସ ୧୭ ବର୍ଷ ଉଲ୍ଲେଖ ଥିଲା। ମାତ୍ର ଆଧାର କାର୍ଡ ଓ ସ୍କୁଲ ପ୍ରମାଣପତ୍ର ଯାଞ୍ଚ ପରେ ମୃତ ନବବଧୂ ଈଶ୍ୱରୀଙ୍କ ବୟସ ୧୯ ବର୍ଷ ବୋଲି ଜଣାପଡ଼ିଛି। ସେ ନାବାଳିକା ନୁହନ୍ତି ବରଂ ସାବାଳିକା ବୋଲି ଥାନାଧିକାରୀ ତ୍ରିନାଥ ତୋଟାପାଡିଆ ସୂଚନା ଦେଇଛନ୍ତି। ଘଟଣାର ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ଏସଡିପିଓ ଦେବେନ୍ଦ୍ର ମଲ୍ଲିକ ନନ୍ଦପୁର ପୋଲିସ ଦଳକୁ ପ୍ରଶଂସା କରିଛନ୍ତି।
ସୂଚନା ମୁତାବକ, ନନ୍ଦପୁର ବ୍ଲକ ବାଲଡ଼ା ଗ୍ରାମର ଡମ୍ବୁରୁ ଜାନାମଙ୍କ ଝିଅ ଈଶ୍ୱରୀଙ୍କ ସହ ନନ୍ଦୀଗାଁ ଗ୍ରାମର ମନୋଜ ଚମ୍ପୀଙ୍କର ବର୍ଷକ ତଳେ ପ୍ରେମ ସମ୍ପର୍କ ଗଢ଼ିଉଠିଥିଲା। ପରେ ମନୋଜ ତାଙ୍କୁ ବିବାହ କରିବାକୁ କହି ନିଜ ଗାଁକୁ ନେଇଯାଇଥିଲେ। ଉଭୟ ପରିବାର ପୁଅ-ଝିଅଙ୍କ ଇଚ୍ଛାକୁ ସମ୍ମାନ ଦେଇ ବିବାହକୁ ସ୍ୱୀକୃତି ଦେଇଥିଲେ। କିନ୍ତୁ ସୋମବାର ସକାଳୁ ଈଶ୍ୱରୀଙ୍କ ଝୁଲନ୍ତା ମୃତଦେହ ଶାଶୁଘରୁ ଉଦ୍ଧାର କରାଯାଇଥିଲା। ଶାଶୁଘର ଲୋକେ ଏହାକୁ ଆତ୍ମହତ୍ୟା ବୋଲି କହୁଥିବା ବେଳେ, ଝିଅର ଦାଦା ତ୍ରିଲୋଚନ ଜାନାମ ଯୌତୁକ ନିର୍ଯାତନା ଦେଇ ହତ୍ୟା କରାଯାଇଥିବା ନେଇ ଥାନାରେ ଏତଲା ଦେଇଥିଲେ। ପୋଲିସ ମାଜିଷ୍ଟ୍ରେଟ୍, ସାଇଣ୍ଟିଫିକ୍ ଦଳ ଓ ଏସଡିପିଓଙ୍କ ଉପସ୍ଥିତିରେ ଶବ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଥିଲା। ଅନ୍ୟପଟେ ଗିରଫ ଶାଶୁ ଓ ଶଶୁର ଯୌତୁକ ଅଭିଯୋଗକୁ ଅସ୍ୱୀକାର କରିଛନ୍ତି; ସ୍ୱାମୀ-ସ୍ତ୍ରୀଙ୍କ ମଧ୍ୟରେ କଳହ ଯୋଗୁଁ ସେ ଏଭଳି ଚରମ ନିଷ୍ପତ୍ତି ନେଇଥାଇ ପାରନ୍ତି ବୋଲି ସେମାନେ କହିଛନ୍ତି।
