ଢାକା,୧୨ା୫: ଅଧିନାୟକ ନଜମୁଲ ହୋସେନ ଶାଣ୍ଟୋଙ୍କ ଶତକ ପରେ ମେହିଦି ହାସନ ମିରାଜ ଓ ନାହିଦ ରାଣାଙ୍କ ୫ ଉଇକେଟ ସଫଳତା ବଳରେ ପାକିସ୍ତାନ ବିପକ୍ଷରେ ଖେଳାଯାଇଥିବା ପ୍ରଥମ ଟେଷ୍ଟକୁ ବାଂଲାଦେଶ ୧୦୪ ରନରେ ଜିତି ନେଇଛି। ଘରୋଇ ମାଟିରେ ପାକିସ୍ତାନ ବିପକ୍ଷରେ ଏହା ବାଂଲାଦେଶ ଦଳର ପ୍ରଥମ ଟେଷ୍ଟ ବିଜୟ। ଏହି ବିଜୟ ସହ ବାଂଲାଦେଶ ୨ ମ୍ୟାଚ୍ ବିଶିଷ୍ଟ ସିରିଜ୍ରେ ୧-୦ର ଅଗ୍ରଣୀ ହାସଲ କରିଛି।
ପ୍ରଥମ ଇନିଂସରେ ବାଂଲାଦେଶ ୪୧୩ ରନ କରିଥିବା ବେଳେ ପାକିସ୍ତାନ ୩୮୬ ରନ କରିଥିଲା। ଫଳରେ ୨୭ ରନରେ ଆଗୁଆ ଥିବା ବାଂଲାଦେଶ ମ୍ୟାଚ୍ର ଅନ୍ତିମ ଦିନ ତଥା ମଙ୍ଗଳବାର ଅସମାପ୍ତ ଦ୍ୱିତୀୟ ଇନିଂସ ସ୍କୋର ୧୫୨/୩ରୁ ବ୍ୟାଟିଂ ଆରମ୍ଭ କରି ୯ ଉଇକେଟ ୨୪୦ ରନରେ ପାଳି ସମାପ୍ତି ଘୋଷଣା କରିଥିଲା। ଦଳ ପାଇଁ ମୋମିନୁଲ ହକ ୫୬ ଓ ପ୍ରଥମ ଇନିଂସରେ ଶତକ କରିଥିବା ଅଧିନାୟକ ଶାଣ୍ଟୋ ୮୭ ରନ କରିଥିଲେ। ପାକିସ୍ତାନ ପକ୍ଷରୁ ହାସନ ଅଲୀ ଓ ନୋମାନ ଅଲୀ ୩ଟି ଲେଖାଏ ଉଇକେଟ ନେଇଥିଲେ। ୨୬୭ ରନର ଟାର୍ଗେଟର ପିଛା କରୁଥିବା ପାକିସ୍ତାନ ନାହିଦ ରାଣାଙ୍କ ଘାତକ ବୋଲିଂର ସମ୍ମୁଖୀନ ହୋଇ ନ ପାରି ୧୬୩ ରନରେ ଅଲଆଉଟ୍ ହୋଇଯାଇଥିଲା। ପାକିସ୍ତାନ ପାଇଁ କେବଳ ଅବଦୁଲ ଫାଜଲ ୬୬ ରନ କରିଥିବା ବେଳେ ଘରୋଇ ଦଳ ପକ୍ଷରୁ ନାହିଦ ରାଣା ୫ ଉଇକେଟ ନେଇଥିଲେ। ଏହା ପାକିସ୍ତାନ ବିପକ୍ଷରେ ବାଂଲାଦେଶର କ୍ରମାଗତ ତୃତୀୟ ଟେଷ୍ଟ ବିଜୟ।
