ସମ୍ବଲପୁର,୯ା୮(ବ୍ୟୁରୋ): ରେଢ଼ାଖୋଲ ନିର୍ବାଚନ ମଣ୍ଡଳୀର ପୁରୁଣା ଓ ଯୁବ କର୍ମକର୍ତ୍ତାମାନେ ସୋମବାର ଏକ ବୈଠକ କରି ୨୦୨୪ ସାଧାରଣ ନିର୍ବାଚନରେ ଏହି କ୍ଷେତ୍ରର ପ୍ରାର୍ଥୀ ପାଇଁ ଜଣେ ସ୍ଥାୟୀ ବାସିନ୍ଦାଙ୍କ ନାମ ଘୋଷଣା କରାଯାଉ ବୋଲି ଦାବି କରିଛନ୍ତି। ଯୁଯୁମୁରା ବ୍ଲକ ଦେବଝରନଠାରେ ଅନୁଷ୍ଠିତ ଭାଜପା ସମାବେଶରେ ଏହି ମତ ପ୍ରକାଶ ପାଇଥିଲା। ରାଜ୍ୟ କାର୍ଯ୍ୟକାରିଣୀ ସଦସ୍ୟ କୃଷକମୋର୍ଚ୍ଚା ଆହ୍ବାନ କ୍ରମେ ସଭାରେ ପ୍ରତାପ ପ୍ରଧାନ ଅଧ୍ୟକ୍ଷତା କରିଥିଲେ। ଭାରତମାତାଙ୍କ ପୂଜନ ପରେ ହରଘର ତ୍ରିରଙ୍ଗା କାର୍ଯ୍ୟକ୍ରମକୁ କିଭଳି ପାଳନ କରିବେ ସେ ନେଇ ଆଲୋଚନା ହୋଇଥିଲା। ପରେ ଦଳ ସଂଗଠନ ନେଇ ନେତାମାନେ ମତ ରଖିଥିଲେ। ସେମାନେ ଦର୍ଶାଇଥିଲେ, ଏବେ ରେଢାଖୋଲ ଦାୟିତ୍ୱରେ ଥିବା ନେତୃତ୍ୱ ପୁରୁଣା କର୍ମୀଙ୍କୁ ଅଣଦେଖା କରୁଛନ୍ତି। ସେମାନେ ଦଳୀୟ କାର୍ଯ୍ୟକ୍ରମ ସମ୍ପର୍କରେ ସୂଚନା ଦେଉନାହାନ୍ତି। ଦଳର ରାଜ୍ୟ, ଜିଲା, ବ୍ଲକସ୍ତରୀୟ ନେତୃତ୍ୱ ରହିଛନ୍ତି। ହେଲେ ସେମାନଙ୍କୁ ମଧ୍ୟ ଅଣଦେଖା କରାଯାଉଛ। ରେଢାଖୋଲ ନିର୍ବାଚନ ମଣ୍ଡଳୀରେ ସ୍ଥାୟୀ ବାସିନ୍ଦାଙ୍କୁ ପ୍ରାର୍ଥୀ କରାଯାଉ ନାହିଁ। ଯେଉଁମାନଙ୍କୁ ଦଳ ପ୍ରାର୍ଥି କରୁଛି ସେମାନେ ଗ୍ରାମାଞ୍ଚଳ ଲୋକଙ୍କ ସହ ସମ୍ପର୍କ ରଖୁ ନାହାନ୍ତି। କେବଳ ନିର୍ବାଚନ ସମୟରେ ଆସି ଭୋଟ ଭିକ୍ଷା କରୁଛନ୍ତି। ତେଣୁ ଲୋକମାନେ ଗ୍ରହଣ କରୁନାହାନ୍ତି। ରାଜ୍ୟ ଓ ଜିଲାସ୍ତରୀୟ ନେତାମାନେ ଏହା ଉପରେ ପଦକ୍ଷେପ ଗ୍ରହଣ କରନ୍ତୁ ବୋଲି ଦାବି କରିଥିଲେ। ଆଗକୁ ନିର୍ବାଚନ ମଣ୍ଡଳୀରେ ଭାଜପା ଯେଭଳି ଭଲ ପ୍ରଦର୍ଶନ କରିବ ସେ ନେଇ ଏକଜୁଟ ହୋଇ କାମ କରିବାକୁ ସ୍ଥିର ହୋଇଥିଲା। ବୁର୍ଡା ସରପଞ୍ଚ ରାଜା ପାଳ, କୁମାରେଶ ସ୍ବାଇଁ, ସଞ୍ଜୟ କୁମାର, ସାହୁ, ରାଜେନ୍ଦ୍ର ବେହେରା, ସତ୍ୟନାରାୟଣ ପ୍ରଧାନ, ଅଜିତ କୁମାର ପ୍ରଧାନ, ଆଶୁତୋଷ ପ୍ରଧାନ, ହରିହର ସାହୁ, ଚନ୍ଦ୍ରମଣୀ ସାହୁ, ଅଶୋକ କୁମାର ସାହୁ, ହରିହର ମହାନନ୍ଦ ପ୍ରମୁଖ ଉପସ୍ଥିତ ଥିଲେ।
