ଭବାନୀପାଟଣା(ସ୍ବ.ପ୍ର.)/କୋକସରା (ଡି.ଏନ.ଏ.), ୫।୭: କଳାହାଣ୍ଡି ଜିଲା କୋକସରା ବ୍ଲକରେ ଥମୁନି ଦାଦନ ଦୁଃଖ । ପେଟ ପାଟଣା ପାଇଁ ଘର ଛାଡି ବାହାର ରାଜ୍ୟକୁ ଦାଦନ ଖଟିବାକୁ ଯାଇଥିବା ବ୍ଲକର ୬ ଜଣ ଶ୍ରମିକଙ୍କ କିଛି ମାସ ଭିତରେ ମୃତ୍ୟୁ ଘଟିଥିବା ବେଳେ ଏବେ ଆଉ କିଛି ଶ୍ରମିକ ତେଲେଙ୍ଗାନାରେ ନିର୍ଯାତନାର ଶିକାର ହେଉଥିବାର ଏକ ଭିଡିଓ ପୁଣି ସାମ୍ନାକୁ ଆସିଛି ।
ସୂଚନାନୁଯାୟୀ, କଳାହାଣ୍ଡି, ବଳାଙ୍ଗିର ଓ ସମ୍ବଲପୁର ଜିଲାର ପ୍ରାୟ ୧୪ ପରିବାରର ୨୦ ଜଣ ଦାଦନ ଶ୍ରମିକ ଠିକାଦାରଙ୍କ ନିର୍ଯାତନାର ଶିକାର ହେଉଛନ୍ତି। ଏହି ଶ୍ରମିକଙ୍କ ମଧ୍ୟରେ କଳାହାଣ୍ଡି ଜିଲାର ୨ଜଣ ଅଛନ୍ତି। ସେମାନେ ହେଲେ ଧର୍ମଗଡ ବ୍ଲକ ଛଞ୍ଚାଣବାହିଲି ପଞ୍ଚାୟତ ବେହେରାଗୁଡା ଗ୍ରାମର ସୁରେନ୍ଦ୍ର ନାଏକ ଓ କୋକସରା ବ୍ଲକର ଶ୍ରମିକ ଅନାଥ ପରାଭୋଇ। ଏହି ଶ୍ରମିକମାନଙ୍କୁ ଗତ ୭ମାସ ତଳେ ବଲାଙ୍ଗିର ଜିଲାର ବେଣୁ ଦାସ ନାମକ ଜଣେ ବ୍ୟକ୍ତି ପ୍ରଲୋଭନ ଦେଖାଇଥିଲେ। ସେ ଅଗ୍ରିମ କିଛି ଟଙ୍କା ଦେଇ ତେଲେଙ୍ଗାନାର ରଙ୍ଗାରେଡି ଜିଲା କବାଡିପଲ୍ଲି ଗାଁର କେ. ଭେଙ୍କେଟେଶ୍ୱର ନାମକ ଏକ ଇଟାଭାଟି ଠିକାଦାରଙ୍କ ପାଖରେ ବନ୍ଧା ପକାଇ ପଳାଇ ଆସିଥିଲେ। ତେବେ ଠିକାଦାରଜଣଙ୍କ ଦାଦନ ଶ୍ରମିକମାନଙ୍କୁ ଦିନରାତି ଖଟାଇ ନିର୍ଯାତନା ଦେବା ସହ ପାରିଶ୍ରମିକ ଟଙ୍କା ମାଗିଲେ ମାର୍ ପିଟ କରିବା ସହ ଘରକୁ ଫେରିବାକୁ ଦେଉନାହାନ୍ତି । ଫଳରେ ଭୋକ ଉପାସରେ ଥିବା ଶ୍ରମିକମାନେ ଉଦ୍ଧାର ପାଇଁ ଏକ ଭିଡିଓ ଜାରି କରିଛନ୍ତି । ଏହି ଭିଡିଓ ସାମାଜିକ ଗଣମାଧ୍ୟମରେ ଏବେ ଭାଇରାଲ ହେବା ପରେ ବିଭିନ୍ନ ମହଲରୁ ସେମାନଙ୍କୁ ଉଦ୍ଧାର କରିବା ପାଇଁ ଦାବି ହେଉଛ। ଅପରପକ୍ଷେ ଦାଦନ ଶ୍ରମିକଙ୍କୁ ନେଇ କଳାହାଣ୍ଡି ଜିଲା ସବୁବେଳେ ଚର୍ଚ୍ଚାରେ ରହି ଆସୁଥିବାବେଳେ ରାଜ୍ୟ ବାହାରେ ଦାଦନ ଯାଇ ଆଉ କେତେ ଦାଦନ ଶ୍ରମିକଙ୍କ ଜୀବନ ଗଲେ ପ୍ରଶାସନର ଚେତା ପଶିବ ତାହାକୁ ନେଇ ପ୍ରଶ୍ନ ଉଠିଛି ।
