ପୁରୀ ଅଫିସ,୫।୭:ରଥଯାତ୍ରା ପୂର୍ବରୁ ମହାପ୍ରଭୁ ଶ୍ରୀଜଗନ୍ନାଥଙ୍କ ନନ୍ଦିଘୋଷ ରଥ ଚକରେ ଫାଟ ହୋଇଥିଲା। ଏବେ ବାହୁଡ଼ା ଯାତ୍ରା ପୂର୍ବରୁ ପ୍ରଭୁ ବଳଭଦ୍ରଙ୍କ ତାଳଧ୍ୱଜ ଓ ଦେବୀ ସୁଭଦ୍ରାଙ୍କ ଦର୍ପଦଳନ ରଥ ଚକରେ ଫାଟ ଦେଖିବାକୁ ମିଳିଛି। ତାଳଧ୍ୱଜ ରଥର ପଡ଼ିନାହାକା ଚକ ଓ ଦର୍ପଦଳନ ରଥର ବଡ଼ଉଛୁଳା ଚକରେ ଫାଟ ହୋଇଛି। ରଥ ନିର୍ମାଣର ବୈଷୟିକ ଟିମ୍ ସୋମବାର ରଥ ଯାଞ୍ଚ କରିବାବେଳେ ଫାଟ ସ୍ଥାନକୁ ଚିହ୍ନଟ କରିଛି। ଏହା ଯଥେଷ୍ଟ ଗଭୀର ହୋଇଥିବା ବେଳେ ତୁରନ୍ତ ମରାମତି ପାଇଁ ଉଦ୍ୟମ ଆରମ୍ଭ ହୋଇଛି। ଏଥିପାଇଁ ରଥ ଚକରେ କ୍ଲାମ୍ପ ଲଗାଯିବାକୁ ନିଷ୍ପତ୍ତି ନିଆଯାଇଛି। ଶନିବାର ବାହୁଡ଼ାଯାତ୍ରା। ତେଣୁ ବୁଧବାର ଶ୍ରୀଗୁଣ୍ଡିଚା ମନ୍ଦିର ସିଂହଦ୍ୱାର ସମ୍ମୁଖରୁ ତିନିରଥକୁ ନାକଚଣା ଦ୍ୱାରକୁ ଦକ୍ଷିଣମୋଡ଼ କରି ଅଣାଯିବ। ଦକ୍ଷିଣମୋଡ଼ ପୂର୍ବରୁ ରଥ ମରାମତି କାର୍ଯ୍ୟ ଶେଷ କରାଯିବ ବୋଲି ସୂଚନା ମିଳିଛି।
ଏ ନେଇ ବରିଷ୍ଠ ରଥ ତତ୍ତ୍ବାବଧାରକ ଡ. ଏନ୍.ସି. ପାଲ୍ କହିଛନ୍ତି, ତାଳଧ୍ୱଜ ରଥର ତିନୋଟି ସ୍ଥାନ ଓ ଦର୍ପଦଳନ ରଥର ଦୁଇଟି ସ୍ଥାନରେ ମରାମତି ଆବଶ୍ୟକ। ସେଠାରେ ଆବଶ୍ୟକସଂଖ୍ୟକ ୟୁ କ୍ଲାମ୍ପ ଏବଂ ଏଲ୍ କ୍ଲାମ୍ପ ଲଗାଯିବ। ମଙ୍ଗଳବାର ସକାଳୁ ରଥ ମରାମତି କରାଯିବ। ରଥରେ ଫାଟ ଓ ମରାମତି ଏକ ସ୍ବାଭାବିକ ପ୍ରକ୍ରିୟା। ତେଣୁ ବିଶେଷ କିଛି ବଡ଼ ଧରଣର ସମସ୍ୟା ଉପୁଜି ନାହିଁ। ଦକ୍ଷିଣମୋଡ଼ ପୂର୍ବରୁ ରଥ ପ୍ରସ୍ତୁତ ହୋଇଯିବ। ସେହିପରି ନନ୍ଦିଘୋଷ ରଥର କମାରସେବକ ଦାଶରଥି ମହାରଣା କହିଛନ୍ତି, ଏତେ ବଡ଼ ରଥ ଟର୍ଣ୍ଣିଂ ବେଳେ ଏଭଳି ଫାଟ ଦେଖାଯାଏ। ଏହାକୁ ସହଜରେ ମରାମତି କରାଯାଇପାରିବ। ସେବକମାନେ ମରାମତି କାର୍ଯ୍ୟ ପାଇଁ ସଜାଗ ରହିଛନ୍ତି ବୋଲି ସେ ପ୍ରକାଶ କରିଛନ୍ତି। ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ କୁମାର ଜେନା କହିଛନ୍ତି, ରଥ ଗଡ଼ିବା ପରେ ବିଭିନ୍ନ ସ୍ଥାନରେ ଛୋଟ ଫାଟ ପଡ଼ିଥାଏ। ଏବେ ଚିହ୍ନଟ ହୋଇଥିବା ଫାଟକୁ ବୈଷୟିକ ଟିମ୍ ସହାୟତାରେ ମରାମତି କରାଯିବ। ବୈଷୟିକ ଟିମ୍ ଯାଞ୍ଚ ଶେଷ କରିଛି। ସୂଚନାଯୋଗ୍ୟ, ଗତବର୍ଷ ତାଳଧ୍ୱଜ ରଥ ପହିରେ ଫାଟ ହୋଇଥିଲା। ନୂଆ ପହି ସଂଯୋଗ କରାଯାଇ ରଥକୁ ଦକ୍ଷିଣ ମୋଡ଼ କରାଯାଇଥିଲା। ସାଧାରଣତଃ ଚକରେ ଛୋଟ ଫାଟ ହେଉଥିବା ବେଳେ ଏଥର ତାଳଧ୍ୱଜ ରଥ ପଡ଼ିନାହାକା ଚକର ଫାଟ ଗଭୀର ବୋଲି ଜଣାପଡ଼ିଛି।
