ପରଜଙ୍ଗ, ୮।୪(ଡି.ଏନ୍.ଏ.) ବିଭାଗୀୟ ଅଧିକାରୀଙ୍କ ଅବହେଳାରୁ ଶୋଚନୀୟ ହୋଇପଡ଼ିଛି ରେଙ୍ଗାଳି ବାମପାର୍ଶ୍ୱ ମୁଖ୍ୟ କେନାଲରୁ ବାହାରିଥିବା ଶାଖା କେନାଲ ରାସ୍ତା। ଶତାଧିକ ଚାଷୀ ଏବଂ ଗ୍ରାମବାସୀଙ୍କ ଜୀବନରେଖା ଭାବେ ପରିଚିତ ଏହି ଗ୍ରାମାଞ୍ଚଳ ରାସ୍ତା ମରଣଯନ୍ତା ପାଲଟି ଥିବାବେଳେ ଏଥିପ୍ରତି ଗୁରୁତ୍ୱ ଦିଆଯାଉନାହିଁ, ଯାହାକୁ ନେଇ ଅସନ୍ତୋଷ ତୀବ୍ର ହେବାରେ ଲାଗିଛି।
ଢେଙ୍କାନାଳ ଜିଲା ପରଜଙ୍ଗ ବ୍ଲକ ଅଞ୍ଚଳ ଦେଇ ଯାଇଛି ରେଙ୍ଗାଳି ବାମ ପାର୍ଶ୍ୱ ମୁଖ୍ୟ କେନାଲ। ଆଭ୍ୟନ୍ତରୀଣ ଜମିକୁ ଜଳସେଚନ ପାଇଁ କାନ୍ତୋର ନିକଟରୁ ଏକ ଶାଖା କେନାଲ ଖୋଳାଯାଇଛି। ଏହି କେନାଲ ପରଜଙ୍ଗ, ଖଣ୍ଡୁଆଳମୁଣ୍ଡା, କନ୍ଦରସିଂହା, ଲୋଧଣୀ, ସାଆନ୍ଦା ଗ୍ରାମ ଦେଇ କାମାକ୍ଷାନଗରକୁ ଲମ୍ବିଛି। ଗମନାଗମନ ସୁବିଧା ପାଇଁ ଶାଖା କେନାଲକୁ ଲାଗି ଏକ ପିଚୁ ରାସ୍ତା ନିର୍ମାଣ କରାଯାଇଥିଲା। ଉକ୍ତ ରାସ୍ତା ଦେଇ କେନାଲ ରକ୍ଷଣାବେକ୍ଷଣ କାର୍ଯ୍ୟରେ ନିୟୋଜିତ ଅଧିକାରୀଙ୍କ ଗାଡ଼ି, ଆଖପାଖ ଅଞ୍ଚଳର ଲୋକେ ଏବଂ ଚାଷୀମାନେ ଜମିକୁ ହଳ ଓ ଟ୍ରାକ୍ଟର ନେଇ ସୁବିଧାରେ ଯିବାଆସିବା କରୁଥିଲେ। ହେଲେ ଦୀର୍ଘଦିନ ଧରି ମରାମତି ଅଭାବରୁ ଏହା ଖାଲଖମାରେ ଭର୍ତ୍ତି ହୋଇଛି। ବିଭାଗ ପକ୍ଷରୁ କାମଚଳା ଭାବେ ମରାମତି କରାଯାଉଥିଲେ ମଧ୍ୟ ତାହା ଦୀର୍ଘସ୍ଥାୟୀ ହୋଇପାରୁନାହିଁ। କାରଣ ପିଚୁ ବଦଳରେ ଖାଲଖମା ସ୍ଥାନରେ ମାଟି ପକାଇ ସମତୁଲ କରାଯାଉଛି। ଫଳରେ ବର୍ଷା ହେଲେ କିମ୍ବା ଗାଡ଼ିମୋଟର ଚଳାଚଳ କଲେ ରାସ୍ତାରେ ପୁଣି ଗର୍ତ୍ତ ସୃଷ୍ଟି ହେଉଛି। ସାମାନ୍ୟ ବର୍ଷା ହେଲେ କାଦୁଅରେ ଭର୍ତ୍ତି ହୋଇଯାଉଛି। ଗାଡ଼ିମୋଟର ତ ଦୂରର କଥା ପାଦରେ ଚାଲିକରି ଯିବା ମଧ୍ୟ କଷ୍ଟକର ହୋଇପଡୁଛି। ଚାଷୀମାନେ ସମସ୍ୟାରେ ପଡୁଛନ୍ତି। ତେଣୁ ଶୋଚନୀୟ ହୋଇପଡ଼ିଥିବା ରାସ୍ତାକୁ ପୁନରୁଦ୍ଧାର କରିବା ସହିତ ପିଚୁ ଢଳେଇ କରିବାକୁ ଅଞ୍ଚଳର ଚାଷୀ ଦାବି କରିଛନ୍ତି।
ଏ ସଂକ୍ରାନ୍ତରେ ବିଭାଗୀୟ ଯନ୍ତ୍ରୀ ଚିନ୍ମୟ ସାହୁ କୁହନ୍ତି, ଗତବର୍ଷ ଉକ୍ତ ରାସ୍ତା ନିର୍ମାଣ ପାଇଁ ଅଟକଳ କରାଯାଇ ଅନୁଦାନ ମଞ୍ଜୁରୀ ପାଇଁ ପଠାଯାଇଥିଲା। ଚଳିତ ବର୍ଷ ଆଉଥରେ ଅଟକଳ କରି ପଠାଇବାକୁ ଚିଠି ଆସିଛି। ଖୁବ୍ଶୀଘ୍ର ଏଷ୍ଟିମେଟ୍ କରି ଚିଠି ପଠାଯିବ ବୋଲି ସେ କହିଛନ୍ତି।
