ପାଟଣା,୧୧ା୩(ସ୍ବ.ପ୍ର.): କେନ୍ଦୁଝର ଜିଲା ପାଟଣା ଥାନା ଉପାନ୍ତ ଅଞ୍ଚଳ ରାଇଡିହା ପଞ୍ଚାୟତରେ ଶୁକ୍ରବାର ନାଏବ ସରପଞ୍ଚ ନିର୍ବାଚନ ଚାଲିଥିବା ବେଳେ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ଘଟିଛି। ଫଳରେ ଉତ୍ତେଜନା ସୃଷ୍ଟି ହେବା ସହ ଏକ ଏକ ଗୋଷ୍ଠୀର ମହିଳାଙ୍କ ଆକ୍ରମଣରେ ସାହାରପଡ଼ା ଫାଣ୍ଡି ଅଧିକାରୀ ଶିବ ପ୍ରସାଦ ଆଇଚ ଆହତ ହୋଇଥିବା ବେଳେ ତାଙ୍କର ଡାହାଣ ହାତ ଭାଙ୍ଗିଯାଇଛି। ଘଟଣାସ୍ଥଳରେ ପାଟଣା ଥାନାଧିକାରୀ ରାଜେନ୍ଦ୍ର ସ୍ବାଇଁ ଏକ ସେକ୍ସନ ପୋଲିସ ଫୋର୍ସ ମୁତୟନ କରି ସ୍ଥିତି ସମ୍ଭାଳିରେ ଲାଗିଛନ୍ତି।
ମିଳିଥିବା ସୂଚନାନୁଯାୟୀ ରାଇଡିହା ପଞ୍ଚାୟତ ନାଏବ ସରପଞ୍ଚ ନିର୍ବାଚନ ଥିବାରୁ ୨ ଗୋଷ୍ଠୀ ମୁହାଁମୁହିଁ ହୋଇଥିଲେ। ଆଶାୟୀ ନାଏବ ସରପଞ୍ଚ ମମିତା ମହାନ୍ତ ୭ ଓ୍ବାର୍ଡ ସଦସ୍ୟଙ୍କୁ ନେଇ ପଞ୍ଚାୟତରେ ପଶିବା ବେଳକୁ ବିରୋଧୀ ଗୋଷ୍ଠୀ ଧସ୍ତାଧସ୍ତି ହେବା ସହ ଗୋଷ୍ଠୀ ସଂଘର୍ଷ ଆରମ୍ଭ କରିଥିଲେ। ୬ ଜଣ ପୋଲିସ କର୍ମଚାରୀଙ୍କୁ ନେଇ ଫାଣ୍ଡି ଅଧିକାରୀ ଆଇନଶୃଙ୍ଖଳା ରକ୍ଷା କରିବାକୁ ଯାଇ ନିଜେ ଗୁରୁତର ହୋଇଛନ୍ତି। ଘଟଣାସ୍ଥଳରେ ଉତ୍ତେଜନା ଲାଗି ରହିଛି। ଅଧିକ ପୋଲିସ ଫୋର୍ସ ଅଣାଯାଉଥିବା ସୂଚନା ମିଳିଛି।
