ନୂଆଦିଲ୍ଲୀ,୨୩ା୨: ନର୍ଥ ଆଟଲାଣ୍ଟିକ୍ ଟ୍ରିଟି ଅର୍ଗାନାଇଜେଶନ(ନାଟୋ)ରେ ୟୁକ୍ରେନ୍ ସାମିଲ ହେଲେ ପାଶ୍ଚାତ୍ୟର ସୈନ୍ୟ ରୁଷିଆ ସୀମାରେ ମୁତୟନ ହେବେ। ଏହାକୁ ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ ଗ୍ରହଣ କରିପାରି ନ ଥିଲେ। ତେଣୁ ସେ ବିଚ୍ଛିନ୍ନତାବାଦୀଙ୍କ କଥା ମାନି ପୂର୍ବ ୟୁକ୍ରେନ୍ରୁ ଡୋନ୍ବାସକୁ ବିଚ୍ଛିନ୍ନ କରି ଡୋନେସ୍କ ଓ ଲୁହାନସ୍କ ନାମରେ ଦୁଇଭାଗ କରିଦେଇଛନ୍ତି। ପୁଟିନ୍ଙ୍କ ବିସ୍ତାରବାଦୀ ମହତ୍ତ୍ୱାକାଂକ୍ଷା ବିଶ୍ୱ ପାଇଁ ଅଡ଼ୁଆ ସ୍ଥିତି ସୃଷ୍ଟି କରିଥିବାବେଳେ ଭାରତ ଏବେ ଦୋଛକିରେ ପଡ଼ିଯାଇଛି। ଗୋଟିଏ ପଟେ ପ୍ରତିରକ୍ଷା କ୍ଷେତ୍ରରେ ରୁଷିଆ ଉପରେ ନିର୍ଭରଶୀଳତା ଓ ଅନ୍ୟପକ୍ଷେ ଆମେରିକାର ଚାପ। ଭାରତ କାହା ସପକ୍ଷରେ ଯିବ ତାହା ଏବେ ବଡ଼ ପ୍ରଶ୍ନ।
ୟୁକ୍ରେନ୍ ସଙ୍କଟକୁ ନେଇ ଆଲୋଚନା ନିମନ୍ତେ ଆମେରିକା, ଫ୍ରାନ୍ସ ଓ ବ୍ରିଟେନର ଅନୁରୋଧ କ୍ରମେ ସୋମବାର ବିଳମ୍ବିତ ରାତିରେ ଜାତିସଂଘ ସୁରକ୍ଷା ପରିଷଦ ବୈଠକ ବସିଥିଲା। ଉକ୍ତ ବୈଠକରେ ଭାରତ ମାପିଚୁପି ମନ୍ତବ୍ୟ ରଖିଛି। ଏଭଳି ସମ୍ପୃକ୍ତ କ୍ଷେତ୍ରରେ ସ୍ଥିତି ଶାନ୍ତି ଓ ନିରାପତ୍ତାକୁ ବିପନ୍ନ କରିବା ଆଶଙ୍କା ଥିବାରୁ ଉତ୍ତେଜନା ହ୍ରାସ ପାଇଁ ଉଦ୍ୟମ ହେଉ ବୋଲି ଭାରତ କହିଛି। ସେହିପରି ମଙ୍ଗଳବାର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ମଧ୍ୟ ରୁଷିଆ ବିରୋଧରେ ମନ୍ତବ୍ୟ ଦେବାରୁ ଦୂରତା ଅବଲମ୍ବନ କରିଛନ୍ତି। ୟୁପିର ବାଲିଆରେ ଭାଜପା ପକ୍ଷରୁ ନିର୍ବାଚନୀ ସଭା ବେଳେ ଖବରଦାତାଙ୍କ ପ୍ରଶ୍ନର ଉତ୍ତରରେ ରାଜନାଥ କହିଛନ୍ତି, ୟୁକ୍ରେନ୍ ସଙ୍କଟର କୂଟନୈତିକ ସମାଧାନ ହେବା ଉଚିତ। ଆମେରିକା ରାଷ୍ଟ୍ରପତି ଜୋ ବାଇଡେନ୍ ରୁଷିଆ ପ୍ରତିପକ୍ଷଙ୍କ ସହ ଆଲୋଚନା ପାଇଁ ପ୍ରସ୍ତୁତ ଥିବା କହିଛନ୍ତି। ବାଇଡେନ୍ ନିଜ ପକ୍ଷରୁ ପଦକ୍ଷେପ ନେଇଛନ୍ତି। ଭାରତ କୌଣସି ପ୍ରକାରେ ଶାନ୍ତି ଚାହେଁ। ଆଲୋଚନା ହେଲେ ବାଟ ବାହାରିବ ବୋଲି ରାଜନାଥ କହିଛନ୍ତି। ଭାରତ କାହା ସପକ୍ଷରେ ଯିବ ବୋଲି ପ୍ରଶ୍ନ ହେବାରୁ ରାଜନଥ କହିଥିଲେ, ଆମେ ଶାନ୍ତି ଚାହୁଁ।
