ଭୁବନେଶ୍ୱର,୧୩।୨(ବ୍ୟୁରୋ): ମାଓବାଦୀ ଗୋଷ୍ଠୀ ଦ୍ୱାରା ଆତଙ୍କବାଦୀ ପାଣ୍ଠି ବ୍ୟବହାର ସମ୍ପର୍କିତ ଏକ ମାମଲାରେ ନ୍ୟାଶନାଲ ଇନଭେଷ୍ଟିଗେଶନ୍ ଏଜେନ୍ସି (ଏନ୍ଆଇଏ)ର ଟିମ୍ ଓଡ଼ିଶାର ଭୁବନେଶ୍ୱର ସମେତ ବିହାର, ଝାଡ଼ଖଣ୍ଡ ଏବଂ ଆନ୍ଧ୍ରପ୍ରଦେଶର ମୋଟ ୨୬ଟି ସ୍ଥାନରେ ଶନିବାର ଚଢ଼ାଉ କରିଛି। ଚଢ଼ାଉ ସମୟରେ ଏନ୍ଆଇଏ ଟିମ୍ ୩ଟି ଦେଶୀ ବନ୍ଧୁକ, ଗୋଟିଏ .୩୧୫ ବୋର ରାଇଫଲ, ୫୯ ଗୁଳି, ବହୁ ଡିଜିଟାଲ ଡିଭାଇସ୍, ମାଓବାଦୀ ପୁସ୍ତକ, ଆପରାଧିକ କାଗଜପତ୍ର ଏବଂ ୪ କେଜିର ନିଶାଦ୍ରବ୍ୟ ଜବତ କରିଛି। ଚଢ଼ାଉ ବେଳେ କୌଣସି ପ୍ରକାର ଅପ୍ରୀତିକର ପରିସ୍ଥିତି ଏଡ଼ାଇବା ପାଇଁ ଏନ୍ଆଇଏ ଟିମ୍ ସ୍ଥାନୀୟ ପୋଲିସ ଏବଂ ସ୍ବତନ୍ତ୍ର ଟାସ୍କ ଫୋର୍ସ ଏବଂ ସିଆର୍ପିଏଫ୍ର ସହାୟତା ନେଇଥିଲା। ତେବେ ଭୁବନେଶ୍ୱରର କେଉଁ ସ୍ଥାନରେ ଚଢ଼ାଉ ହୋଇଥିଲା ଏବଂ ଏନ୍ଆଇଏ ଟିମ୍ରେ କେତେଜଣ ଥିଲେ, ସେନେଇ କମିଶନରେଟ ପୋଲିସ ପକ୍ଷରୁ କୌଣସି ସୂଚନା ଦିଆଯାଇନାହିଁ। କେନ୍ଦ୍ର ସରକାରଙ୍କ ସଂସ୍ଥା ଚଢ଼ାଉ କରିଥିବାରୁ ଉକ୍ତ ସଂସ୍ଥା ହିଁ ସବିଶେଷ ତଥ୍ୟ ଦେଇପାରିବେ ବୋଲି ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ କହିଛନ୍ତି। ମିଳିଥିବା ସୂଚନା ଅନୁସାରେ ବିହାରର ମଗଧ ଅଞ୍ଚଳରେ ସକ୍ରିୟ ଥିବା ସିପିଆଇ ମାଓବାଦୀମାନେ ଏକ ବଡ଼ ନେଟଓ୍ବର୍କ ମାଧ୍ୟମରେ ଆତଙ୍କବାଦୀ ପାଣ୍ଠି ପରିଚାଳନା କରୁଥିବାନେଇ ଅଭିଯୋଗ ହୋଇଥିଲା। ଉକ୍ତ ଅଭିଯୋଗକୁ ଆଧାର କରି ଏକ ମାମଲା ରୁଜୁ କରାଯାଇ ଉକ୍ତ ମାଓବାଦୀ ଗୋଷ୍ଠୀ ସକ୍ରିୟ ଥିବା ୪ ରାଜ୍ୟରେ ଚଢ଼ାଉ କରାଯାଇଛି ବୋଲି ଏନ୍ଆଇଏର ଜଣେ ଅଧିକାରୀ କହିଛନ୍ତି। ମାଓବାଦୀମାନେ ସେମାନଙ୍କର ଘୃଣ୍ୟ ଉଦ୍ଦେଶ୍ୟକୁ କାର୍ଯ୍ୟକାରୀ କରିବା ପାଇଁ ଅସ୍ତ୍ରଶସ୍ତ୍ର ଏବଂ ଗୁଳିଗୋଳା କ୍ରୟ ନିମନ୍ତେ ପାଣ୍ଠି ସଂଗ୍ରହ କରିବାକୁ ସେମାନେ ନିରନ୍ତର ଚେଷ୍ଟା କରୁଛନ୍ତି। ଏପରି କି ଏହି ଅଞ୍ଚଳରେ ମାଓବାଦୀ କାର୍ଯ୍ୟକଳାପକୁ ପୁନର୍ଜୀବିତ ତଥା ମଜଭୁତ କରିବା ପାଇଁ ଅଭିଯୁକ୍ତମାନେ ବିଭିନ୍ନ ଜେଲ୍ରେ ଥିବା ମାଓବାଦୀ, ଓଭର ଗ୍ରାଉଣ୍ଡ ୱାର୍କର୍ସ (ଓଜିଡବ୍ଲ୍ୟୁଏସ୍) ଙ୍କ ସହ ଯୋଗାଯୋଗରେ ନୂତନ କ୍ୟାଡର ନିଯୁକ୍ତ କରୁଥିବା ଜଣାପଡ଼ିଛି। ତେଣୁ ଏହାକୁ ରୋକ୍ ଦେବାକୁ ମାଓବାଦୀ ଗତିବିଧି ଥିବା ୨୬ସ୍ଥାନରେ ଚଢ଼ାଉ କରାଯାଇଛି। ସେଥିମଧ୍ୟରେ ବିହାରର ଜାହାନବାଦ୍, ପାଟନା ରୁରାଲ, ଅରଓ୍ବାଲ,ନାଳନ୍ଦା, ଗୟା, ନାଓ୍ବଡା ଏବଂ ଔରଙ୍ଗାବାଦ୍ ଜିଲାର ୨୩ସ୍ଥାନ , ଝାଡ଼ଖଣ୍ଡର କୋଡେର୍ମା ଜିଲା, ଓଡ଼ିଶାର ଭୁବନେଶ୍ୱର ଏବଂ ଆନ୍ଧ୍ରର ନେଲୋରର ଗୋଟିଏ ଲେଖାଏ ସ୍ଥାନରେ ଚଢ଼ାଉ କରାଯାଇଥିବା ଏନ୍ଆଇଏ ଅଧିକାରୀଙ୍କ ଠାରୁ ସୂଚନା ମିଳିଛି।
