ମୁମ୍ବାଇ,୧୩ ।୨: କରୋନା ମହାମାରୀକୁ ମୁକାବିଲା କରିବାକୁ ସରକାରଙ୍କ ତରଫରୁ ଗଢିଉଠିଥିଲା କୋଭିଡ ସେଣ୍ଟର । ଏହି କ୍ରମରେ ପୁଣେରେ ୧୦୦ କୋଟି ଟଙ୍କା ବ୍ୟୟରେ ଏକ କୋଭିଡ ସେଣ୍ଟର ନିର୍ମାଣ ଲାଗି ମୁମ୍ବାଇର ଜଣେ ଚା’ବାଲାଙ୍କୁ ଠିକା ଦିଆଯାଇଥିବା ଜଣାପଡିଛି । ଏହି ଅଭିଯୋଗ ଆଣିଥିବା ବ୍ୟକ୍ତି କିରିଟ ସୋମୈୟା ମୁମ୍ବାଇର ସେହି ଚା’ ଦୋକାନୀଙ୍କୁ ଖୋଜିବା ସହ ଶନିବାର ମୁମ୍ବାଇର କେଇଏମ ହସ୍ପିଟାଲ ସାମ୍ନାରେ ଥିବା ଏହି ଦୋକାନରେ ଚା’ ପିଇବାକୁ ପହଞ୍ଚି ଯାଇଥିଲେ ।
ପୂର୍ବତନ ଏମ୍ପି କିରିଟ ସୋମୈୟା ଗଣମାଧ୍ୟମକୁ ଏହି ସୂଚନା ଦେବା ସହ ଠିକା ଦିଆଯାଇଥିବା ବ୍ୟକ୍ତିଙ୍କ ନାମ ରାଜୀବ ସାଲୁଖେ ବୋଲି କହିଛନ୍ତି । ଏଥିରେ ଠାକରେ ସରକାର ବଡ ଘୋଟାଲା କରିଥିବା ସେ ଅଭିଯୋଗ କରିଛନ୍ତି । ସେ କହିଛନ୍ତି ଏହା ସିଧାସଳଖ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ଇସାରାରେ ହୋଇଛି । ସେ କହିଛନ୍ତି ସାଲୁଖେ ଲାଇଫ ଲାଇନ ହସ୍ପିଟାଲ ମ୍ୟାନେଜମେଣ୍ଟର ସର୍ଭିସର ଭାଗିଦାର ଆଉ ଏହା ବ୍ଲାକଲିଷ୍ଟେଡ କମ୍ପାନୀ । ଏହି କମ୍ପାନି ସୁଜିତ ପାଟକରଙ୍କର । ପାଟକର ଶିବସେନା ଏମ୍ପି ସଞ୍ଜୟ ରାଉତଙ୍କ ପାର୍ଟନର । ସୂଚନାଯୋଗ୍ୟ, ଗତ ସପ୍ତାହରେ କିରିଟ ସୋମୈୟା ଯେତେବେଳେ କୋଭିଡ ସେଣ୍ଟର ଘୋଟାଲର ଯାଞ୍ଚ ଦାବି କରି ପୁଣେ ମହାନଗରପାଳିକା ଯାଇଥିଲେ ସେତେବେଳେ ମହାନଗରପାଳିକା କାର୍ଯ୍ୟାଳୟର ଗେଟ ନିକଟରେ ତାଙ୍କ ଉପରକୁ ଶିବସେନା କର୍ମୀମାନେ ମରଣାନ୍ତକ ଆକ୍ରମଣ କରିଥିଲେ । ଏ ସମ୍ପର୍କରେ ସେ ରାଜ୍ୟପାଳ ଭଗତସିଂ କୋଶୟାରି ଓ କେନ୍ଦ୍ରୀୟ ଗୃହ ସଚିବଙ୍କ ସହ ସାକ୍ଷାତ୍ କରି ଅଭିଯୋଗ ଆଣିଥିଲେ ।
