ଭୁବନେଶ୍ୱର, ୧।୨ (ବ୍ୟୁରୋ): ଛତିଶଗଡ଼ ଓ ଓଡ଼ିଶା ସବ୍ ଏରିଆ କମାଣ୍ଡର ହେଲେ ବ୍ରିଗେଡିୟର ଭିଗ୍ନେଶ ମହାନ୍ତି। ବ୍ରିଗେଡିୟର୍ ପ୍ରଶାନ୍ତ ଚୌହାନଙ୍କଠାରୁ ସେ ଦାୟିତ୍ୱ ଗ୍ରହଣ କରିଛନ୍ତି। ବିଦାୟୀ ସବ୍ଏରିଆ କମାଣ୍ଡର ବ୍ରିଗେଡିୟର୍ ଚୌହାନ୍ ରାଜ୍ୟ ସରକାରଙ୍କ ସହ ଏକ ଉତ୍ତମ ସମ୍ପର୍କ ବିକାଶ, ଛତିଶଗଡ ଓ ଓଡ଼ିଶାରେ ସଶସ୍ତ୍ର ବାହିନୀକୁ ଦୃଢ଼ ତଥା ପ୍ରୋତ୍ସାହିତ କରିବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ତେବେ ନୂଆ ଦାୟିତ୍ୱ ଗ୍ରହଣ କରିଥିବା ସେନା ପଦକପ୍ରାପ୍ତ ବ୍ରିଗେଡିୟର୍ ମହାନ୍ତି, ଏହାକୁ ଆହୁରି ଆଗକୁ ନେବେ ବୋଲି ଆଶା କରାଯାଉଛି। ତାଙ୍କର ୩ ଦଶନ୍ଧିରୁ ଅଧିକ ସମୟ ଧରି ସାମରିକ କ୍ୟାରିୟର ରହିଛି। ନ୍ୟାଶନାଲ ଡିଫେନ୍ସ ଏକାଡେମୀ (ଖଡକ୍ୱାସ୍ଲା), ଆର୍ମି ସ୍କୁଲ ଅଫ୍ ଆମ୍ୟୁଶନିଶନ(ୟୁକେ), ଡିଫେନ୍ସ ସର୍ଭିସ ଷ୍ଟାଫ୍ କଲେଜ (ୱେଲିଂଟନ) ଏବଂ ନ୍ୟାଶନାଲ ଡିଫେନ୍ସ କଲେଜ (ଫିଲିପାଇନ୍ସ)ରୁ ତାଲିମ ଗ୍ରହଣ କରିଛନ୍ତି। ସେ କଶ୍ମୀର ଉପତ୍ୟକାରେ ଜଣେ ଇଞ୍ଜିନିୟର ରେଜିମେଣ୍ଟ ଏବଂ ଇଷ୍ଟର୍ନ ଥିଏଟରରେ ଏକ ମାଉଣ୍ଟେନ ବ୍ରିଗେଡକୁ ନିର୍ଦ୍ଦେଶ ଦେଇଛନ୍ତି। ଏହାସହ ଭୁଟାନରେ ଭାରତୀୟ ସାମରିକ ତାଲିମ କଣ୍ଟିଜେଣ୍ଟର ଏକ ଅଂଶ ହୋଇଛନ୍ତି। ସେନା ମୁଖ୍ୟାଳୟ ସମେତ ଆର୍ମିର ବିଭିନ୍ନ ସଂଗଠନରେ ତାଙ୍କୁ ଗୁରୁତ୍ୱପୂର୍ଣ୍ଣ ପଦବୀରେ ନିଯୁକ୍ତ କରାଯାଇଥିଲା। ତାଙ୍କର ଅଭିଜ୍ଞତା, ସାମର୍ଥ୍ୟକୁ ଆଧାର କରି ସେ ଭାରତୀୟ ସେନା ପାଇଁ ଏହି ଦୁଇ ରାଜ୍ୟରେ କାମ କରିବେ।
